Орта салмақта жұдырықтасатын қазақстандық боксшы Қанат Ислам (29-1, 22 КО) кәсіпқой бокстағы келесі жекпе-жегін өткізіп, қарсыласынан басым түсті.
АҚШ-тың Флорида штатындағы Плант-Сити қаласында өткен бокс кешінде жерлесіміз аргентиналық Хавьер Франсиско Масьельмен (34-18, 23 КО) қолғап түйістірді. Сегіз раундқа жоспарланған айқаста 38 жастағы қазақстандық боксшы төрешілердің бірауызды шешімімен жекпе-жектің жеңімпазы деп танылды. Осылайша, отандасымыз кәсіпқой бокстағы 29-шы жеңісіне қол жеткізді. Ал өз елінде «Жыртқыш» деген лақап атымен танымал болған Масьель 18-мәрте жеңілістің кермек дәмін татты.
Айта кетейік, бұл – Қанат Исламның карьерасындағы алғашқы жеңілісінен кейінгі жеңісі. Ол осы жылдың ақпан айында британиялық Джимми Келлиден ұпай саны бойынша ұтылып қалған еді.