Паркинсон сырқаты мазалайтын 52 жастағы Астана тұрғынын дәрігерлер қимыл-қозғалыс функцияларының бұзылысынан құтқарды, деп хабарлайды Egemen.kz «Әлеуметтік медициналық сақтандыру қоры» КЕАҚ Астана қаласы бойынша филиалының баспасөз қызметіне сілтеме жасап.
«Паркинсон сырқаты мазалайтын 52 жастағы Астана тұрғынын дәрігерлер қимыл-қозғалыс функцияларының бұзылысынан құтқарды. Науқасқа «оң жақ стереотактикалық таламотомия» отасы жасалды. Басқаша айтқанда, науқас бас сүйегі арқылы мидың ортасына терең еніп, субталамикалық ядроға ток өтетін кішкентай электродтар енгізілді. Құрылғы аурудан зардап шеккен ми жасушаларының жұмысын терең ынталандырады. Импульстар мидың зақымдалған бөліктеріне тікелей еніп, олардың қызметін тездетеді. Осылайша, Паркинсон ауруының белгілерін жеңілдетуге мүмкіндік береді және оның ағымын баяулатады. Ота квота бойынша, МӘМС аясында жасалды», деп жазылған хабарламада.
Ұлттық нейрохирургия орталығына Астана қаласының 52 жастағы тұрғыны медициналық көмекке жүгінді. Науқастың айтуынша, ол 2016 жылдан бері Паркинсон ауруымен ауырып келеді. Осы уақыт ішінде ер адам үнемі Нейрохирургия орталығының мамандарынан кеңес алып тұрған. Тамырлы және функционалды нейрохирургия бөлімі мамандарының бақылауымен ұзақ уақыт бойы дәрі-дәрмектер арқылы ем (түзету терапиясын) алды. Бірақ науқастың жағдайы жақсармады, қимыл-қозғалыс функциялары бұзыла бастады, қолдары мүлдем «тыңдамайтын» болды. Екі қолы қатты дірілдейтіні соншалық, күнделікті өмірінде кедергі келтірді, бұлшық еттері икемге келмей, денесі сіресіп, қатайып кеткен. Хирургиялық емнің оң әсері мен қауіпті жақтарын таразылай келе, ер адам ота жасатуға шешім қабылдаған.
«Кейінгі кездері осы ауруға байланысты компьютерде жұмыс істей алмадым, бар зейінімді жұмысқа аудара алмадым. Күн сайын осы жағдай мені тұйыққа тірей бастады, сонымен қатар тоқтаусыз дірілден ұйқым бұзылды. Отадан кейін өзімді әлдеқайда жақсы сезінемін. Діріл енді мазаламайды. Соған өте қуаныштымын. Оң қолым да, сол қолым да толығымен қалпына келді. Бұған дейін сол қолым ырқыма мүлдем бағынбаған кезде, дірілдің қатты болғаны соншалық, ол оң қолыма да берілетін еді. Отадан кейін бәрі керемет», деді науқас.
Науқасқа ота жасаған Тамырлы және функционалды нейрохирургия бөлімшесінің нейрохирург-дәрігері Шыңғыс Сағадатұлы Нұриманов отаның мәнісін егжей-тегжейлі баяндап берді. «Ота квота бойынша, МӘМС аясында жүргізілді. Біз науқасқа «оң жақ стереотактикалық таламотомия» отасын жасадық. Басқаша айтқанда, науқас бас сүйегі арқылы мидың ортасына терең еніп, субталамикалық ядроға ток өтетін кішкентай электродтар енгізілді. Құрылғы аурудан зардап шеккен ми жасушаларының жұмысын терең ынталандырады. Импульстар мидың зақымдалған бөліктеріне тікелей еніп, олардың қызметін тездетеді. Осылайша, Паркинсон ауруының белгілерін жеңілдетуге мүмкіндік береді және оның ағымын баяулатады», деп түсіндірді нейрохирург-дәрігер Шыңғыс Сағадатұлы.
Алайда, мұндай ота жасау үшін нақты көрсетімдер және қарсы көрсетімдер бар. Сонымен қатар, асқынған ауруы бар және есте сақтау қабілеті нашар науқастарға мұндай имплантты орнықтыру нәтижелі бола қоймайды.