Қазақстанның Ұлттық банкі кәдесый блистер жиынтығында «Сақтардың стилі» айналымдағы биколорлы монеталарын шығарады, деп хабарлайды Egemen.kz банктің баспасөз қызметіне сілтеме жасап.
«Сақтардың стилі» кәдесый блистер жиынтығында номиналы 100 теңгелік, массасы - 6,45 грамм, диаметрі - 24,5 мм болатын brilliant uncirculated дайындау сапасымен нибрасс/нейзильбер қорытпасынан жасалған биколорлы айналымдағы монеталардың бес түрі бар. Жаңа жиынтық 30 000 дана таралыммен шығады.
1.«Бұғы». Жалаулы қоймасы. Жетісу (біздің дәуірімізге дейінгі V-III ғғ.). Көшпенділердің дүниетанымында бұғы төменгі және жоғарғы әлемді байланыстыратын нышанға айналды
2. «Қанатты барыс». Есік қорғаны (біздің дәуірімізге дейінгі IV-III ғ. соңы). Қар барысы – ерлік пен байлықтың символы.
3. «Маска». Шілікті. Шығыс Қазақстан (біздің дәуірімізге дейінгі VIII-VII ғғ.) Онда отбасы - ошақ қасын қорғайтын үш кескіннің бейнесі: мысық тектес жыртқыш, екі арқар және ұшатын құс маскасы көрсетілген.
4. «Бұғы түріндегі алтын әшекей», Жалаулы, Жетісу (біздің дәуірімізге дейінгі V-III ғғ.). Қызыл бұғы бейнесі – молшылық пен ұрпақ жалғасының символы.
5. «Бүктетілген барыс». Талды-2. Орталық Қазақстан (біздің дәуірімізге дейінгі VII ғ.). Бүктетілген барыс фигурасындағы сақина пішіні – уақыттың ауысымдық және сыртқы әлеммен үйлесімділіктің белгісі.
«Сақтардың стилі» монеталары – заңды төлем құралы және олар төлемнің барлық түрі бойынша қабылдануға міндетті.