Елімізде қыркүйек айының соңғы жексенбісі – Еңбек күні. Айтулы датаның мақсаты – қоғамдағы қарапайым еңбек адамының беделін өсіру, еңбек әулетіндегі көпжылдық дәстүрді одан әрі нығайту және еңбекшіл қоғам құру идеясын насихаттау.
Елімізде 2013 жылдан бері жыл сайын қыркүйектің әр соңғы жексенбісінде Еңбек күні мерекеленіп келеді. Биыл бұл айтулы күн 24 қыркүйекке тұспа-тұс келіп отыр. Еңбек күні күнтізбедегі еңбек мерекесі ғана емес, еңбек сапасының көрсеткіші деуге де болады. Бұған тұрақты жұмыспен қамту, еңбек қауіпсіздігі, еңбекақының лайықты деңгейі, әлеуметтік кепілдіктер жатады.
– Еңбек күнін мерекелеу дәстүрі әлемдік тәжірибеде бар. Қазір жер-жаһанның жүзден аса елі бұл күнді айрықша атап өтеді. Ал Жаңа Зеландия, Жапония, Қытай, Ресей, Беларусь қатарлы елдерде бұл күн тіпті мемлекеттік мәртебеге ие. Біз де еліміздегі еңбек құндылығын арттыру мақсатында бұл күнге айрықша мән беріп отырмыз. Мереке қарсаңында бірқатар шара өткізу жоспарланған, деді Еңбек және халықты әлеуметтік қорғау вице-министрі Ақмәди Сарбасов.
Министрліктің мәліметіне сенсек, Еңбек күні аясында үздік еңбек әулеті мен өндірістің үздік жұмыскерлерін анықтауға бағытталған жыл сайынғы «Еңбек жолы» республикалық байқауына биыл 591 өтініш қабылданыпты.
– Өңірлік кезеңнің жеңімпаздарын облыс әкімдерінің орынбасарлары басқаратын комиссиялардың қазылығымен анықталып, салтанатты түрде марапатталады. Жеңімпаздар байқаудың республикалық кезеңіне жолдама алады. Ал республикалық кезеңнің жеңімпаздарын Еңбек министрлігінің жанындағы комиссия бағалайды. Ол комиссия құрамында Парламент депутаттары, қоғамдық келісім мен әлеуметтік әріптестік өкілдері кіреді, дейді вице-министр.
Сонымен қатар Еңбек және халықты әлеуметтік қорғау министрлігінің баспасөз хатшысы Сәкен Ділдахмет республикалық және өңірлік деңгейде еңбек адамын насихаттау мақсатында ауқымды ақпараттық жұмыстар жүргізіліп жатқанын жеткізді.
– 24 қыркүйек күні «Хабар» телеарнасында 4 сағаттық телемарафон өтеді. Бұл телемарафонның басты мақсаты – Еңбек күніне орай өндірісте, ауыл шаруашылығында, әлеуметтік салаларда жұмыс істеп жатқан азаматтардың еңбегін көрсету. Бұған қоса Еңбек күнін атап өтуге байланысты телесериалдар, арнайы бағдарламалар да шығады, деді С.Ділдахмет.
Сондай-ақ вице-министр мереке қарсаңында еңбек құндылықтарын арттыру мақсатында еңбек адамдары мен түрлі кәсіп өкілдері туралы деректі фильмдер түсіру, ақпараттық материалдар, роликтер, сюжеттер шығару, студенттік пікірталастар, «Еңбек галереясы» атты фотокөрмелер және спорттық шаралар өткізілетінін айтты.
«Еңбек жолы» байқауының жеңімпаздары 22 қыркүйек күні Астанада Еңбек күніне орай өтетін форум барысында жарияланады. Жеңімпаздарға ақшалай сертификаттар мен естелік сыйлықтар табыс етіледі.