Түркітілдес мемлекеттердің ынтымақтастығы, одақтастығы – түбі бір, тілі ұқсас, ділі туыс, діні ортақ, бауырлас мемлекеттердің тәуелсіздігін, тұтастығын сақтаудың бірден-бір алғышарты.
Қазіргі таңда жаңаша ықпалдасудың заманы келді. Егер әрбір түркітілдес ел бір-бірімен байланысын одан әрі нығайтып, халқы да ынтымақтасатын болса, болашақта әлеуетті одақ құрып, үлкен саяси және экономикалық күшке, ең бастысы, әлеуметтік, рухани кеңістікке айналуға әбден болады.
Саммитте қауіпсіздік, экономика, саяси интеграция және көлік коммуникациясы әлеуетін арттыру мәселелері кеңінен сөз болды. Түркия мен Әзербайжан президенттері өз сөзінде көлік дәлізінің қажеттігіне тоқталды. Транскаспий дәлізін құруға бауырлас түркі елдері ғана емес, Қазақстан да мүдделі. Демек барлығының мұраты ортақ.
Қазіргі күрделі кезеңде көлік-транзит коммуникациясының әлеуетін арттыру және оның мүмкіндігін барынша пайдалану аса маңызды. Себебі біздің мемлекеттеріміз Батыс пен Шығысты, Солтүстік пен Оңтүстікті тікелей байланыстырады. Қазақстан, Әзербайжан, Түркия арқылы өтетін Транскаспий халықаралық көлік дәлізі – соның жарқын мысалы.
Әзербайжан да, Қазақстан да құрылықтағы, аумақтағы жағдайдың тұрақталғанына мүдделі. Екі тараптың да бейбітшілікті қуаттайтын берік ұстанымы бар. Тек осындай басқосулар арқылы біз геосаяси ахуалдың ықпалын азайтамыз. Жалпы, Еуропаға қарағанда Азия елдерінің байланысын нығайту баршамызға маңызды болып отыр.
Саммит барысында бас-аяғы 12 құжатқа қол қойылды. Ендігі кезекте Түркі мемлекеттерінің ұйымы түрлі салада осы құжаттардың негізінде бекіп, ықпалдастығы мен бірлігі нығая түсуге тиіс. Бір сөзбен айтқанда, түркі мемлекеттері үшін дамудың жаңа кезеңі басталды.
Нариман ГУСЕЙНЗАДЕ,
«ARB 24» арнасының бас редакторы