Қазақ театр өнерінің негізін қалаушы, актер Қалибек Қуанышбаев тұтынған бұйымдар туған жері – Мартбек Мамыраев ауылындағы музейдің төрінде тұр. Жақында бұл музейге сол театр абызы Қ.Қуанышбаевтың атын берген.
Жәдігерлерді Қаллекидің ғасырлық мерейтойына орай ұлдары – Андабек пен Нәдір тапсырыпты. Музей төрінде тұрған күміс таяқты жазушы Мұхтар Әуезов режиссер Шәкен Аймановқа берген. Кейіннен Шәкең бұл таяқты Қалекеңе сыйлаған. Бұдан бөлек, жәдігерлер қатарындағы 1960 жылы Қаллеки зейнетке шыққанда қаламгер Сәбит Мұқанов иығына жапқан шапан, 1940 жылы Абай рөлін сомдағанда киген тақия мен күртеше, өзбек ағайындар тарту еткен ала шапан жерлестері үшін құнды затқа айналған.
– Бұл өңірден елімізге белгілі танымал тұлғалар көптеп шыққан. Солардың бірі – Қалибек Қуанышбаев. Қазір жас ұрпақ музейге келіп, әр заттың тарихын қызыға тыңдайды. Кеуделерін мақтаныш кернейді. Қаллеки пайдаланған күміс ыдыс-аяқтар да бар. Осыдан бірнеше жыл бұрын музейге арнайы келген Халық әртісі Асанәлі Әшімов те Қалекең туралы естеліктерін айтып, қуанып кеткен болатын, – дейді Қалибек Қуанышбаев атындағы музей қызметкері Жәнібек Жантурин.
Екі қабатты музей алдында Қалибек Қуанышбаевтың 100 жылдық мерейтойына орай ашылған еңселі ескерткіші тұр. Алдыңғы жылы ғимаратқа «Жұмыспен қамтудың жол картасы» арқылы ағымдағы жөндеу жұмыстары жүргізілді.
Қарағанды облысы,
Қарқаралы ауданы