Қолжазбалар және сирек кітаптар ұлттық орталығы биылғы археографиялық экспедициялар нәтижелері бойынша есеп беріп, еліміздің тарихына қатысты көне деректер көрсетілген «Ұлы дала тарихының жазба мұралары» атты көрме ұйымдастырды.
Мемлекет басшысы Қасым-Жомарт Тоқаев Ұлттық құрылтайдың үшінші отырысында еліміздің тарихын зерттеу мен насихаттауға, тіл мәселесіне, ономастика, тарихи мұралар мен тарихи тұлғаларға, табиғи және тарихи мекендерге ерекше назар аударған еді. Сонымен қатар Президент тарихи-мәдени жәдігерлерді, олардың көшірмелерін Қазақстанға қайтару жұмыстарын жандандыру да аса маңызды екенін атап өтті.
Аталған іс-шараға Парламент депутаттары, Қазақстан мұсылмандары діни басқармасы, кітапханалар мен архив өкілдері, қоғам қайраткерлері қатысты.
Көрмеге Ұлыбританиядан әкелінген 15 қолжазба мен архивтік құжаттың көшірмелері және республика аумағында анықталған 150-ден аса көне қолжазба мен сирек құнды кітаптар қойылды. Олардың ішінде түркі-ислам мәдениетінің құнды ескерткіші, алғаш түркі тіліне аударылған қасиетті Құран кітабы (X-XII ғғ.), Әбу Насыр әл-Фараби, Қожа Ахмет Ясауи, Сүлеймен Бақырғани еңбектерінің көшірмелері, XI ғасырдағы парсы тарихшысы Гардизидің «Зейн-әл-ахбар» қолжазбасы, т.б. бар.
Алқалы жиын аясында ұлттық құндылықтарымызды жинақтау, оларды келер ұрпаққа сақтаудың маңыздылығы мен осы саладағы өзекті мәселелер талқыланды.
Сондай-ақ «Uly dala murasy» ғылыми-танымдық журналының жаңа нұсқасы мен шетелдерде анықталған көне деректер бойынша «Шетелдік қорлардағы құнды жазба мұралары» атты каталог-альбомның тұсауы кесілді.