Борыштан кімдер босатылды

«Қазақстан Респуб­ли­касы азаматтарының төлем қа­білеттілігін қалпына кел­тіру және банкроттығы туралы» заңы халықтың шамадан тыс несие алу мәселесін шешуге зор ықпалын тигізіп тұр. Аталған құжат былтыр күшіне еніп, қыркүйек айы­­нан бастап өтініш берген алғашқы азаматтар банкрот болып таныла бастады. Бұл үрдіс онлайн форматта жүргізіледі. Ол үшін «Жеке тұлғалардың банкроттығы» деген ақпараттық жүйе құрыл­ды. Осы жөнінде Қар­жы вице-министрі Ержан Бір­жа­нов айтып берді.

«Соттық режімде де арыздар қаралды. Бұл арыздар не­гізінде 12,2 млрд қарыз ке­ші­ріл­ді. Бүгінде жеке тұл­ға­лар – 13 мың адам банкрот де­п­ та­­нылды. Сөйтіп, барлығы 40 млрд теңге ке­шірілді», дейді ол.­

Вице-министрдің ай­туынша, 102 мың арыз­да­нушының 13 мыңы соттан тыс банкрот болып танылды. Оның ішінде 27 млрд теңге кешірілген. Көп арызданушының құжаты кері қайтарылған. Бұған мүлік пен автокөліктің болуы, банк пен қаржылық ұйымдардың тізі­мінде болмауы себеп болды.

Жауапты мекеме қабыл­данған заңға бірқатар өзгеріс енгізген. Мәселен, енді қаржы ұйым­дарымен қарым-қаты­насты реттеу құжаты болмаса, оны ақпараттық жүйеден алуға мүмкіндік беріледі. Тізімнен табылмаған арызданушы өз арызын қайта бере алады. Шетелге шығу рәсімін қалпына келтіру кезінде сот шешімі шығып, жоспар қойылғанға дейін ғана шектеу қойып, одан кейін шектеуді алып тастау көзделген.

Ал банкрот болып та­ныл­ғандардың арасында атаулы әлеуметтік көмек алатын 1 200 азамат бар. Олардың 1,4 млрд теңге қарызы кешірілді. 5 жылдан аса уақыт қарызы бар 6 500 адам банкрот деп танылған. Олардың 18 млрд теңге қарызы кешірілді.

Биылдан бастап елімізде талай жыл тайраңдап келген кейбір микроқаржы ұйым­дары лицензиясынан айырылды. Сөйтіп, оған берешегі бар азаматтар өсім­­пұлсыз қарыздарын қайта­ру­ға мүм­кін­дік алды. Тіпті кей­бір қарыздар заңсыз ресім­делгені расталса, қарыз қай­та­рыл­май­тын болды. Бұл жайт бү­гінде біраз борышкердің тынысын ашып жатқаны рас.