АСТАНА. 28 сәуір. Аса ірі көлемде бопсалау бойынша айыпталған кәсіпкер Қайрат Жамалиевтің дүние-мүлкі сот шешімімен қамауға қойылды. Бұл туралы қылмыстық іс бойынша апелляциялық сот алқасының төрағасы Асқаржан Кенжегариннің сөзіне сілтеме жасап, zakon.kz хабарлады.
2015 жылдың 25 сәуірінде Астана қаласы Есіл ауданының №2 аудандық соты тергеушінің өтінішін қарады. Онда Қылмыстық кодекстің 194-бабы, 4-бөлімі, 2-тармағы – күш қолдану арқылы топ болып бопсалау бойынша айыпталған күдікті Қайрат Жамалиевтің дүние-мүлкіне тыйым салуды санкциялау туралы айтылған. Аталған өтінішті Есіл аудандық прокуроры да қолдаған болатын. Бұл баптың санкциясы бойынша дүние-мүлік тәркіленеді.
Осы іске қатысты сотта: «Қазақстан Республикасы Қылмыстық іс жүргізу кодексінің 161-бабы 1-бөліміне сәйкес, азаматтық талапты қанағаттандыру үшін үкімді орындау мақсатында сотқа дейінгі тергеу жүргізетін тұлға басқа да мүліктік өндіріп алу немесе дүние-мүлкін тәркілеу үшін дүние-мүлікке тыйым салу шарасын қолдануға міндетті», – деп хабарланды.
Нәтижесінде сот Жамалиевтің «Lexus LX 570», «Mercedes Benz S500», Lamborghini Gallardo» маркалы автокөліктерін, 821303, ААВ 81012В тіркемелерін және жылжымайтын мүліктері – Астана қаласындағы пәтері мен тұрғын үйін тұтқынға алуды санкциялау бойынша қаулы шығарды. Егер кәсіпкер кінәлі деп танылса, бұл дүние-мүліктер тәркіленеді.
Апелляциялық тәртіп бойынша бұл қаулы күдіктінің шағымдану мерзімі аяқталғанда күшіне енеді.
Айта кетейік, таяуда Қайрат Жамалиевтің ұйымдастыруымен үш адам Әліби Жұмағұлов есімді жас жігітті ұрып-соққаны туралы деректер ғаламторға жарияланған болатын. Әлеуметтік желілерде қызу талқыланып, халықтың назарын аударған бұл істі еліміздің Бас прокуроры мен Ішкі істер министрі өз бақылауларына алғаны да белгілі.
Еламан Қоңыр.
Дерек, сурет: zakon.kz.