Еліміз шетелдік оқу ордаларымен жоғары білім сапасын арттыру, университеттегі ғылымды дамыту мақсатында әріптестікті нығайтып келеді. Бұл ретте бірнеше жоба жүзеге асырылып жатыр. Соның бірі – әлемнің дамыған елдеріндегі жоғары оқу орындарының Қазақстандағы филиалдарын ашу. Аталған жұмыс соңғы кезде адам капиталын өңірлерде дамытуға бағытталып жатқандай.
Мұндай ойға яки болжамға келуімізге Ғылым және жоғары білім министрі Саясат Нұрбектің Италия Республикасы Университеттер және зерттеулер министрі Анна Мария Бернинимен кездесуі себеп болған-ды. Министрліктің таратқан ақпаратына сүйенсек, кездесуде екі елдің жоғары білім мен ғылыми зерттеулер саласындағы ынтымақтастықтың басты бағыттары талқыланды. Тараптар студенттер мен оқытушылар алмасу бағдарламаларын, сондай-ақ бірлескен зерттеу жобаларын іске асыру келешегін талқылады. Екіжақты ынтымақтастықтың маңыздылығы да сөз болды. Сонымен қатар ортақ зерттеулерді өзара қызығушылық тудыратын салаларда бірлесіп қаржыландыруға келісті.
Өткен жылы Римде қол қойылған өзара түсіністік туралы меморандумды дамыту мақсатында басым бағыттарды анықтайтын, жаңа ұсыныстар әзірлейтін бірлескен басқару комитеті құрылатын болды. Сондай-ақ университеттер арасындағы келісім отандық және италиялық студенттерге арналған қос диплом бағдарламасын іске асыруды қарастырады. Жүздесудегі негізгі нәтижелердің бірі І.Жансүгіров атындағы Жетісу университетінің базасында Марке политехникалық университетінің филиалын ашу туралы келісімге қол қою болды.
Министр Саясат Нұрбек Қазақстан мен Италияның білім беру ұйымдары арасындағы ынтымақтастықтың маңызын атап, Жетісу университетінің ғылыми зерттеу қызметін дамытудағы үлесіне тоқталды. «Жетісу университеті зерттеу қызметін белсенді дамытып жатыр. Оқу орнының Марке политехникалық университеті секілді жетекші шетелдік университеттермен тығыз байланыс орнатуы өңірді білікті техникалық мамандармен қамтамасыз етудің негізгі факторына айналады. Президент Қасым-Жомарт Тоқаев еліміздегі мамандар тапшылығы мәселесін бірнеше рет атап өтті. Халықаралық серіктестермен ынтымақтастық тәжірибе алмасуға, оқытушылар құрамының біліктілігін арттыруға, білім сапасын жақсартуға мүмкіндік береді», деді Саясат Нұрбек.
Осы ретте Италия Республикасының Университеттер және зерттеулер министрі Анна Мария Бернини: «Орталық Азия – тұрақты және қауіпсіз аймақ әрі маңызды геосаяси орталық. Бұл өңір жоғары білім саласында ғана емес, экономикалық, коммерциялық тұрғыдан да үлкен мүмкіндік ұсынады, сондықтан Италия үшін стратегиялық маңызға ие», деді. Оның ойынша, еліміздің адами капиталды дамытудағы саясаты, университетаралық ынтымақтастықтағы белсенділігі – айрықша. Италия университеттері жыл сайын Қазақстаннан жүздеген студентті қабылдайды, ал бірлескен қаржыландырумен іске асырылатын ғылыми жобалар екіжақты диалогтің маңызды элементі болмақ.
Кездесу соңында Саясат Нұрбек пен Анна Мария Бернини ынтымақтастықтың табысты дамитынына сенім білдіріп, жоғары білім саласындағы интеграция және тәжірибе алмасу жолдарын жалғастыруға келісті.