Семейде «Самұрық-Қазына» АҚ қолдауымен зағип, нашар көретін азаматтарға арналған, еліміздегі жаңа үлгідегі тұңғыш кітапхана салынып жатыр. Кітапхана құрылысы жыл соңына дейін аяқталып, келесі жылы пайдалануға беріледі деп жоспарланған.
Қордың қайырымдылық операторы «Samruk-Kazyna Trust» КҚ бас директоры Альфия Адиеваның айтуынша, кітапхана осындай сипаттағы алғашқы, жалғыз мәдени мекеме болмақ. Аумағы мың шаршы метрге жуықтайтын ғимарат жылына 1000 оқырманға қызмет көрсете алады.
Барлық тұрғыда қазіргі заман талаптарына сай арнайы кітапханада Брайль қарпіндегі кітаптар мен дыбысталатын әдебиеттен тыс, «Брайлист», «Жедел көмекші», «Тифлокомп» үйірмелерінде нұсқаушы мамандар білім беру қызметімен айналысады деп күтіліп отыр. Сондай-ақ жаңа рухани ошақта коворкинг-орталық шығармашылық сұхбат аясында түрлі жас шамасындағы адамдардың, оның ішінде жастардың басын қосады.
Еске сала кетсек, бұған дейін «Абай облысының кітапханаларын жаңғырту» жобасы аясында қор тарапынан Семей қаласының қазіргі жұмыс істеп тұрған зағип, нашар көретін азаматтарға арналған ескі кітапханасына арнайы техникалық құрал-жабдық табысталып, Абай атындағы облыстық әмбебап кітапханада заманауи қоғамдық кеңістік ашылды.
Заманауи кітапханалар оның материалдық-техникалық жай-күйі, коворкинг аймақтарының қызметі халық сұранысына сәйкес болуы қажет. Сондықтан жобаның негізгі мақсаты – білім берудің заманауи интерактивті, коммуникативті түрлерін құру арқылы оқырмандардың зияткерлік демалысқа деген қызығушылығын арттыру.
«Жоба аясында Семей қаласының кітапханаларына қайырымдылық көмек көрсетіліп келеді. Абай атындағы облыстық әмбебап кітапханада барлық қала тұрғынына, балаларға арналған тегін қоғамдық инновациялық роботтехника зертханасы, коворкинг-оқу залы мен ойын-шығармашылық алаңы ашылды. Ал нашар көретін азаматтарға арналған кітапхана енді өз оқырмандарына бедерлі-нүктелі қаріппен кітап шығаруға, қызметтердің кеңейтілген ауқымын көрсетуге, басқа да жерлерде іс-шаралар өткізуге қауқарлы», дейді жобаны іске асыру тапсырылған «Кемелді қадам» ҚҚ-ның төрағасы Гауһар Карменова.
Бүгінде облыстық кітапхана ересек оқырмандарды есептемегенде 2500-ден астам балаға қызмет көрсете алады.
«Кітапхананы жаңғырту нәтижесінде балалар мен жасөспірімдердің зияткерлік дамуына, олардың мәдени бос уақытын тиімді өткізуіне, шығармашылық жоспарлар мен креативті идеяларды жүзеге асыруына арналған жаңа, тартымды кеңістік пен алаң пайда болды. Жаңа орта жас оқырмандардың өздігінен білім алуына, кітапқа, шығармашылыққа деген қызығушылықтарын арттыруға септігін тигізетіні анық», дейді облыстық Абай атындағы әмбебап кітапханасының директоры Мерей Қарт.
Әзірге ескі ғимараттағы арнайы кітапхана бүгінде 1000-ға жуық оқырманға қызмет көрсетеді.
«Кітапханамызды жаңа заманауи жабдықтармен жаңартудың маңыздылығы орасан зор. Брайль жүйесімен құжаттарды, кітаптарды шығаруға арналған жабдықтардың жиынтығы бізге ерекше құнды. Енді балаларға бедерлі-нүктелі қаріппен мемлекеттік тілдегі танымал балалар әдебиетін оқуға мүмкіндік жасай аламыз», дейді арнайы кітапхана директоры Гүлнәр Гафиатуллина.
Алдаберген Кемпірбай