Республика күні қарсаңында ұстаздық етуден жалықпаған жандар марапатталды. «Үздік педагог» байқауының жеңімпаздары анықталып, әрқайсысы арнайы төсбелгі мен 3,6 млн теңгелік сыйақы иеленді. Жеңімпаздар арасында балабақша тәрбиешілері, мектеп мұғалімдері, колледж оқытушылары бар. Салтанатты жиынға Оқу-ағарту министрі Ғани Бейсембаев, білім саласының өкілдері қатысты.
Іс-шарада сөз алған министр Ғ.Бейсембаев әуелі барша қатысушыны, еліміздің педагогтерін ұлттық мерекемен құттықтап, сала қызметкерлерінің жұмысына жеміс, еңбегіне табыс тіледі. Осыған қоса министр қоғамдағы ұстаз рөлінің маңызын атап өтті. Оның айтуынша, жыл сайын еліміздің педагогтері халықаралық деңгейде жоғары көрсеткіштерге қол жеткізіп жүр. Мысалы, биыл біздің оқушылар әлемдік беделді пәндік олимпиадаларда 26 (сол жүлделердің екеуі – алтын) медаль жеңіп алды, ал бұл – мұғалімдердің еңбегі.
«Президент Қасым-Жомарт Тоқаев педагогтердің бірінші съезінде «Ұлт келбеті – ұстаз, ұстаз қандай болса, мемлекет сондай болады» деген қанатты сөзді алға тартты. Төрт жылдың ішінде мұғалімдердің айлығы 100 пайызға өсті. Әлемдегі ең беделді 7 халықаралық пәндік олимпиада жеңімпаздарын дайындаған ұстаздарға қомақты сыйақы да қарастырылды. Ал 2012 жылдан бастап өткізіліп келе жатқан «Үздік педагог» байқауының жеңімпаздарына 1000 айлық есептік көрсеткіш (3,6 млн теңгеден аса) көлемінде сыйақы тағайындалған. Бұл қолдаулардың барлығы ұстаздардың ел игілігіне, адам капиталын қалыптастыруға және өскелең ұрпақты тәрбиелеуге қосқан өлшеусіз адал еңбегінің мемлекет тарапынан лайықты бағаланатынын және педагог мәртебесін көтерудің жаңа кезеңін айғақтайды. Сапалы білім – мемлекетіміздің табысты болашағының негізі. Біз, ұстаздар, еліміздің оң имиджін насихаттайтын, саналы да толерантты заманауи ұрпақ қалыптастырудың қозғаушы күшіне айналуға тиіспіз», деді Ғ.Бейсембаев.
Жауапты министрлікке қарасты Орта білім комитетінің төрағасы Қаныбек Жұмашев кейінгі кезде «Үздік педагог» байқауына қызығушылықтың артқанын айтты.
«Үздік педагог» байқауына кейінгі кезде қызығушылық артқан. Қатысушылар арасында педагог-шебер, педагог-зерттеуші секілді ең жоғары санаты бар мамандарды көп кездестіреміз. Биыл 1 700-ден аса қатысушы бақ сынап, 64 адам жеңімпаз атанып отыр, кей өңірлерден 4 адамнан, кейбір облыстардан 1 адамнан дараланып шықты. Қомақты сыйақысы бар мұндай байқау педагогтерді ынталандырып, жұмысына деген құлшынысын арттыра түседі», деді Қ.Жұмашев.
Комитет басшысының айтуына қарағанда, аталған байқауды өткізудің ашықтығы мен әділдігін қамтамасыз ету мақсатында арнаулы платформа жасалған. Қатысушылар сол платформада қажетті құжаттарын, жетістіктерін дерек ретінде толтырып, өздерінің жұмыс орнынан арнайы бір рұқсат алмай-ақ өз еркімен өтінім бере алады. Байқауға балабақша, мектеп, колледж, арнайы білім, қосымша білім қызметкерлері де қатысады. Сайыс әуелі аудандық, содан соң облыстық деңгейде өтіп, өңірде оза шапқандар республикалық деңгейге өтіп, іріктелгендері Астанаға келіп тәуелсіз сарапшылар алдында ашық сабақ өткізеді. Байқау аясында әр қатысушының білім саласын дамытуға қосқан үлесі, педагог қызметінің тиімділігі, оның кәсіби шеберлігі ескеріледі. Республикалық байқау комиссияның құрамына үкіметтік емес ұйым, ата-аналар қоғамының, Білім және ғылым қызметкерлерінің Қазақстан салалық кәсіподағының өкілдері, журналистер, белсенді педагогтер кіреді.
Гүлнар Жалғасқызы биылғы «Үздік педагог» байқауының жеңімпазы атанды. Ол Ақтөбе облысы Ш.Берсиев атындағы Жоғары аграрлық-техникалық колледжінің арнайы пән оқытушысы болып жұмыс істейді. 22 жыл еңбек өтілі бар педагог сайыс кезінде қиындық болғанын, содан сүрінбеуге ұжымының сенімі сеп болғанын айтады.
«Жастарға сапалы білім беруде аянбай еңбек етіп келе жатқанымды үлкен абырой санаймын. Бұл байқауға бірінші рет қатыстым, сөз жоқ, қиындық болды. Бірақ еңбегімнің еленіп, жұмысымның жемісін көріп отырғаным сол төккен тердің нәтижесі деп білемін. Беделді педагогтер додасы қатысушыдан үздік жұмысты талап етеді, жетістіктердің болуы жеткіліксіз, мұнда оқулықтар жазу секілді ғылыми ізденіске басымдық беріледі. Шыны керек, «Үздік педагог» байқауының жыл сайын өтіп жатқанын білемін. Алайда өз еркіммен қатысуға батпай, өзімді әлі де дамытып, жұмысымды ширатуым керек деп ойлап жүрдім. Ұжымым үміт артып, сенім арқалатқандықтан, белді бекем буып, бәйгені бермеуге тырыстым», дейді Г.Жалғасқызы.
Ал Мереке Кенжебекова Жамбыл облысы Шу қаласынан келіп «Үздік педагог» атанды. Ол аталған қалада орналасқан Сәкен Сейфуллин атындағы қазақ орта мектебінде биология пәнінен сабақ береді. 32 жыл бойы білім саласында табан аудармай жұмыс істеп келе жатқан педагог.
«Оқушылары жақсы жетістіктерімен биіктерден көрінсе, адами тұлға ретінде қалыптасса, мұғалім миссиясының орындалғаны, ең бастысы еңбегінің өтеуі, бағаланғаны деп білемін. Бұл сайысқа екі жыл дайындалдым. Жарыстың ерекшелігі барлық өзіңіздің жетістігіңізді берілген қосымшалар бойынша жүйелі дайындап отырсаңыз, сайтта жұмыстарыңызға әділ бағаланған ұпайлар ашық шығып тұрады. Отыз жылдан аса уақыт бойы халықаралық пән олимпиадаларының жүлдегерлерін, ғылыми жоба бойынша үздіктерді дайындаған, осыған қоса он жылдан бері шебер-педагог санатымен өзімді көрсете жүріп, Ұлттық тестілеу орталығының сарапшысы ретінде атқарған еңбегім еленіп, жақында мұғалімдер күнінде Ы.Алтынсарин төсбелгісін иеленген едім. Мұның бәрі бізді ынталандырады. Ал байқауға жастарды шабыттандырып, мұғалім мамандығына қызығушылығын арттыру үшін қатыстым. Бұл жолда жетістіктің шыңы – артыңнан із қалдырып, өзіңнен кейінгі әріптестеріңді жанашырлықпен тәрбиелегенің, оларға жақсы үлгі бола білгенің», деді М.Кенжебекова.
Республика күніне арналған салтанатты іс-шарада оқу-ағарту жүйесінің бірқатар қызметкерлеріне «Ерен еңбегі үшін», «Еңбек ардагері» медальдері, «Ы. Алтынсарин», «Білім беру ісінің құрметті қызметкері» төсбелгілері және басқа да министрліктің наградалары тапсырылды.