АСТАНА. 29 қаңтар. Әлемге әйгілі австралиялық жазушы әйел Колин Маккалоу 77 жасында дүние салды. Бұл туралы РИА «Новости» хабарлады.
Әлем жұртшылығы бұл жазушыны ең алдымен «Тікенекте ән салушылар» («Поющие в терновнике») романының авторы ретінде жақсы біледі. Аталмыш шығарма бестселлерге айналып кеткелі қашан!
Жазушы өмірінің соңғы жылдарында бірнеше рет инфаркт алып, біраз уақытын мүгедек арбасында өткізді.
Колин Маккалоу 1937 жылы 1 шілдеде Жаңа Зеландияның Веллингтон қаласында (Жаңа Оңтүстік Уэльс) туған. Колиннің анасы Жаңа Зеландия жерінен еді. Оның ата-бабалары арасында осы аймақтың түпкілікті жұрты – маори тайпасының өкілі де болды. Маккалоу отбасы Австралияның Сидней қаласына келіп біржола орныққанша ұдайы көшіп-қонумен жүрді. Осында жастық шағы өткен Коллин өте көп оқып, сурет салумен айналысты, арасында өлең де жазып тұрды. Ол ата-анасының ықпалымен медицинаны таңдады. Осыған байланысты Сиднейдегі медицина университетінде оқып, нейропсихолог мамандығын алып шықты. Университетті бітіргесін Австралиялың солтүстік жағалауындағы Король ауруханасында жұмыс істеді. Ал 1963 жылы Лондонға көшіп барды. Макалоу 1967-1976 жылдары Йель университеті жанындағы Йель медицина мектебінің нейробиология бөлімшесінде ғылыми және оқытушылық іс-әрекетпен шұғылданды.
Коллин Маккалоу 1974 жылы өзінің «Тим» деп аталатын тұңғыш романын жариялады. Тағы үш жылдан кейін, яғни 1977 жылы «Тікенекте ән салушылар» жарық көрді. Бұл кітап бірден халықаралық бестселлерге айналды. Ол 20-дан астам тілге аударылды. 1983 жылы роман сюжеті кино болып шығарылды.
Романның желісі 1915 жылдан басталып, алдағы жарты ғасырды қамтиды. Оқиғаның ортасында Клиридің отбасы жүреді. Ол Жаңа Зеландияда кедейшілікте жүрген қалыптарынан Австралиядағы Дрохеда деген жерде ірі помещик деңгейіне дейін жетеді.
Жазушының соңғы романы «Ащы қуаныш» деп аталды. Ол 2013 жылы жарыққа шықты. Жалпы, Маккалоудың қаламынан туған дүниелер 25-тен аса кітап болып басылды.
Мұрат Айтқожа.
Дерек: РИА «Новости».
Сурет: spletnik.ru.
Айтқандай
Лондон университеттерінің бірінде жүргізілген зерттеу әр минут сайын әлемде «Тікенекте ән салушылар» романының екі данасы сатылып тұратынын анықтапты.