Елбасымыздың тікелей қолдауымен құрылған, Тұңғыш Президенттің интеллектуалды мектептері қазіргі таңда тәуелсіз еліміздің айқын жетістіктерінің бірі ретінде табысты жұмыс атқаруда.
Жақында елордадағы Жаңа университеттің ашылу рәсімінде Мемлекет басшысы Нұрсұлтан Назарбаев бұл интеллектуалды мектептерде оқып жатқан жүзден жүйрік түлектер аталмыш білім ордасының студенттері аталатынын атап өткен еді.
Интеллектуалды мектептердің алдында тұрған мақсат – терең білімнің, кәсіби дағдылардың негізінде еркін бағдарлай білуге, өзін-өзі дамытуға, адамгершілік тұрғысынан жауапты шешімдерді қабылдауға қабілетті, Отанын, елін, жерін сүйетін, ата-анасын қадірлейтін, ақпаратты технологияны терең меңгерген, жылдам өзгеріп жататын бүгінгі заманға лайықты, жаңашыл тұлғаны қалыптастыру. Аталған талаптарға сай білім мен тәрбиені беру үшін бүгінде мектептер үздіксіз ізденіс үстінде.
Қазіргі кезде жаратылыстану, математика бағыттары бойынша, графика, статистика сияқты профильді пәндерді тереңдетіп оқытуға арналған оқу бағдарламаларын әзірлеу жұмыстары жүргізіліп жатыр. Алдымен, әрине, жағдай жан-жақты зерттеліп, отандық білім стандарттарымен қатар, әлемге танымал тәжірибелер мен оқу бағдарламалары қаралды. Жаңаша бағдарлама математика, химия, физика, биология пәндерін тереңдете оқытуға және нано, биотехнологияны кеңінен білуіне мүмкіндік береді.
Жаңа заманның талабына қарай, баланың қажеттілігі де ескерілуде. Ең бастысы, мектеп қабырғасынан шыққан бала үш тілді білетін, ақпараттық технологияларды толық меңгерген, бәсекеге қабілетті, әлемдегі кез келген оқу орнының студенті болуға лайықты болу керек.
Қазір мектептерде оқушылардың өз білімдерін жетілдіріп, шыңдауға жан-жақты жағдай жасалған. Сонымен қатар, физика, математика, химия, биология кабинеттерінің жабдықталу мәселесінде әрдайым ізденіс жолындамыз деп айтуға болады. Ақпараттық технологияларды толыққанды меңгерумен қатар, оқушылардың шығармашылық қабілеттерін, логикалық ойлауды дамытуға көп көңіл бөлінген.
Жаңа заманның талабына сай жабдықталған білім ордаларында қазіргі таңда екі мыңнан астам балғын білім алуда. Оқу жылы жағымды жаңалық әкеліп, Өскемен және Талдықорған қалаларында екі мектеп іске қосылады деп күтілуде. Алдағы уақытта мектептер барлық облыс орталықтарында ашылмақ.
Интеллектуалды мектептерде биылғы оқу жылы ауқымды іс-шаралар жүзеге асырылып, жетістіктерге жетуде. Мектеп оқушылары Мәскеу қаласында өткен халықаралық “Математика және жобалау” ғылыми жобалар конкурсында, Прагада өткен Халықаралық ғылыми олимпиада, Астанада ұйымдастырылған “Ғылым әлемін ашамыз” атты халықаралық конкурс, математика пәні бойынша Санкт-Петербург университеті ұйымдастырған Интернет-олимпиада және республикалық, облыстық олимпиадаларға қатысып, жүлдегер атанды.
Интеллектуалды мектепте де кадр мәселесіне аса мән беріледі. Жалпы, мамандарды іріктеу кезеңінде байқағанымыз, мұғалімдер біршама талаптарға сай келмейді. Атап айтқанда, жаңа методика мен ақпаратты технологияларды жетік меңгерген, көптілді мамандардың тапшылығы айқын көрінді. Бұл бағытта мектеп мұғалімдерінің кәсіби деңгейін жоғарылатумен бірге, арнайы бағдарлама бойынша кадр дайындауда мақсатты жұмыс атқарылуда. Мысалы, Астананың Назарбаев университетімен бірлескен жоба аясында педагогикалық жоғары оқу орындары түлектерінің үздіктеріне университетте магистратура курсын оқуға мүмкіндік берілді.
Қазіргі заманға сай, бәсекеге қабілетті маман еңбек нарығында біліктілігіне қарай бағаланады. Мектеп мұғалімінің жалақысы кәсіби деңгейіне тікелей байланысты. Жалақыны дамушы және ынталандырушы күш ретінде пайдалануы нарықты экономикаға тән, қалыпты жағдай.
Мұғалімнің кәсіби деңгейімен қатар, мектепке үміткер оқушының да деңгейге сай келуі үлкен мәселе. Бастысы, екі жақтың да жан-жақты дамуына оң ықпал ететін қолайлы білім жүйесі мен білім ортасын құру жолында еңбек етудеміз.
Жақында ғана Ұлыбританиядағы бірден бір жетекші оқу орнына Unіversіty College London (USL) өз білімдерін жетілдіруге он бес ағылшын пәні мұғалімін жібердік. Ұлыбритания елінде ұстаздар бір ай болады. Ал жыл бойы жақсы жетістікке ие болған жиырма оқушыны тамыз айында Тұманды альбион еліндегі Корольдік университетіне жазғы зертханалық жұмыстарға жіберуді жоспарлап отырмыз.
Бүгінде “Назарбаев Интеллектуалды мектептері” АҚ білім саласындағы отандық және әлемдік ұйымдармен тығыз байланыс орнатуда. Олардың қатарында Кембридж университетінің халықаралық экзамен кеңесі (Cambrіdge Іnternatіonal), Лондон университетінің колледжі, (Unіversіty College London (USL), Temasek Polіtechnіc университеті (Сингапур), Ломоносов атындағы Мәскеу мемлекеттік университеті, Королева институты Royal Іnstіtutіon of Great Brіtaіn, Британ Кеңесі, Астанадағы Назарбаев университеті, тағы басқа да оқу орындары бар. Білім – адам баласының ортақ қазынасы. Сол ортақ қазынаны сақтап, одан әрі дамыту, жетілдіру өзіміздің қолымызда.
Күләш ШӘМШИДИНОВА, “Назарбаев интеллектуалды мектептері” АҚ басқарма төрайымы.