ҚПО-ның ИННОВАЦИЯЛЫҚ ЖОБАЛАРЫ

“Қарашығанақ Петролиум Оперейтинг Б.В.” (ҚПО) компаниясы Батыс Қазақстан облысында жүзеге асырылатын екі бірдей инновациялық жобаның тұсауын кесті. Бұл “Қарашығанақ-Орал” газ құбыры мен об­лыс орталығының жанында таяуда салынған 54-мегаваттық газтурбиналы электр станса­с­ы­нан тартылған электр және жылу желілері құрылысының жобасы. “Қарашығанақ-Орал” газ құбырының құрылысы туралы уағдаластық Қазақстан Республикасы Үкіметінің, Батыс Қазақстан облыстық әкімдігінің және Қарашығанақ жобасы бойынша әріптес – “Би Джи Групп”, “Эни”, “Шеврон” және “ЛУ­КОЙЛ” компаниялары арасында қол жет­кізілді. Аталған жобаны жүзеге асыру туралы ресми Меморандумға кейіннен Қазақстан Республикасының Президенті Нұрсұлтан Назарбаевтың қатысуымен қол қойылды. Оралдан Новопавловка кентіне дейін өтетін және Федоров ауданының елді ме­кен­дерін газбен жабдықтайтын газ құбыры­ның бастапқы учаскесінің құрылысы 2009 жылғы желтоқсанда аяқталған болатын. Бұл газ құбырының учаскесі сондай-ақ, Ақсайға, Бөр­ліге және Тұңғышқа тартылған тармақ­тарды құрамына кіргізеді. 2009 жылғы қа­занда ҚПО компаниясы Жымпиты кентіне 116 шақырымдық 10-дюймді газ құбы­ры­ның қосымша бөлгіші құрылысын бастады. Ол жұмыстардың бастапқы жоспарланған көлеміне қарай қосылды. “Қарашығанақ-Орал” газ құбыры құрылысы жобасының бағ­дарланған жалпы құны 300 миллион АҚШ долларына жуық соманы құрайды. ҚПО-ның тапсырысы бойынша газ құбы­ры­ның құрылысын қазақстандық “Каз­строй­сервис” мердігер компаниясы жүргізуде. Жымпиты кентінде 28 маусымда болған ресми рәсімде ҚПО-ның бас директоры Джузеппе Пази сөйлеген сөзінде былай деп мәлімдеді: ““Қарашығанақ-Орал” газ құбыры таяу болашақта Батыс Қазақстан облысындағы бес ауданның жүз мыңнан астам тұрғынына экологиялық отынды тұ­рақты жеткізуді қамтамасыз ететінін хабар­лауға қуаныштымын. Оның құрылысы аяқ­талу сатысында тұр. Бұл жетістік эконо­микалық, сондай-ақ әлеуметтік маңызға ие. Өйткені, маңызды құрылыс Қазақстан Республикасы мен Қарашығанақ жобасы бойынша әріптес-компаниялардың бірлес­кен ынтымақтастығының нәтижесі болып табылады. Ол Батыс Қазақстан облысының одан әрі дамуына елеулі ықпал етеді. Ау­қымды әлеуметтік жоба табиғи газдың ішкі нарығын дамытуға және Батыс Қазақстан облысының тұрғындарына ең қажетті қуат­ты жеткізуді қамтамасыз ете отырып, өнер­кәсіптік өсуге одан әрі ықпал жасайды”. “Қарашығанақ-Орал” газ құбырының құрылысы толық аяқталуы Қарашығанақ кен орны мен Орал қаласының аралы­ғындағы аумақтағы, Жайық өзенінің сол жағалауына орналасқан елді мекендер хал­қының үйлеріне табиғи газды жеткізуді қам­тамасыз етеді. Табиғи газды тұрақты жет­кізуге қосымша ретінде, аталған жобаны жү­зеге асыру жұмыс орындарын құруға, жер­гілікті әлеуетті дамытуға, технологияларды беруге және жергілікті инфрақұрылымды тиісті дамытуға қол жеткізеді. ҚПО ұсынған жобаның бірі, Оралдағы 54-мегаваттық газ турбиналы электр стан­сасының жанында таяуда салынып, одан бастау алатын электр желісінің құрылысы. Аталған жоба шеңберінде ҚПО қосалқы стансаны және 110/10kV электр беру желісін салады, сондай-ақ 110/35/10kV қолданыс­тағы екі қосалқы стансаны қайта жаңғыр­туды жүзеге асырады. ҚПО-ның тапсырысы бойынша бұл жобаны Оралдағы “Элмо” компаниясы іске асырады. Бұдан басқа, таяу болашақта ҚПО атал­ған газ турбиналы электр стансасынан жылу желісін тартады. Жоба шеңберінде сонымен бірге, облыс орталығындағы қолданыстағы жылу желілерінің бірнеше учаскелерін қайта жаңғыртуды жүргізбек. Электр және жылу желілерінің құры­лы­сы ҚПО-ның әлеуметтік-инфрақұры­лым­дық бағдарламасы шеңберінде жүзеге асы­ры­луда. ҚПО-ның бұл жобаларға құйған ин­вестицияларының жалпы көлемі 23 мил­лион АҚШ долларынан асып жығылады. “Қарашығанақ Петролиум Оперейтинг Б.В.” (ҚПО) “Би Джи Групп” (қатысудың 32,5%), “Эни” (32,5%), “Шеврон” (20%) және “ЛУКОЙЛ” (15%) бірлескен кәсіп­ор­ындары болып табылады. ҚПО әлемдегі ең ірі мұнай-газ конденсатты кен орында­рының бірі – Қарашығанақ кен орнын игеруге және дамытуға басшылық жасайды. Мұнайдың, газдың және конденсаттың бас­тапқы теңгерімдік қоры 9 миллиард баррель конденсатты және газдың (HІІP) 48 трил­лион текше футын, жалпы қордың есептік жағдайында 2,4 миллиардтан астам баррель конденсатты және газдың 16 триллион текше футын құрайды. Қарашығанақта қазіргі кезде өндірудің рекордтық деңгейіне қол жеткізілді. Кен орны Қазақстандағы ең ірі газ өндіру кәсіпорны екендігі баршаға аян. Өндіру көрсеткіштері республикада өндірілген барлық газдың 44% жуығын және сұйық көмірсутегінің жалпы өндірісінің 14,5%-ға жуығын құрайды. 2009 жылы Қарашы­ға­нақ­та шамамен 139,4 миллион баррель мұнай эквиваленті өндірілді. Марат АҚҚҰЛ, “Егемен Қазақстан”.