АСҚАҚ ҰРАНДАРМЕН РУХТАНДЫРДЫ

Астана – тәуелсіз еліміздің бой­тұмары, халқымыздың мақтанышы. Сондықтан да жыл сайын қазақ­стан­дықтар оның шілде айындағы мерейлі мерекесін жарқын көңіл-күймен атап өтті. Өз болашақтарын ару шаһардың ертеңімен, оның гүлденіп, көркеюімен байланыс­ты­ра­ды. Осының дәлеліндей, ақындар мен батырлардың мекені саналатын Жамбыл ауданының жұртшылығы “Астана – Отанымыздың жүрегі, тәуелсіздігіміздің тірегі” атты тақы­рып­та салтанат шырайын шалқытты. Қарасай батыр атындағы орта­лық алаңда өткен мерекеге үлкен-кіші жиналып, егемен еліміздің мемлекеттік рәміздерін көкке көтер­ді. Астанамен құрдас 70 балғын, осынша домбырашылар мен әнші-бишілер тобы жиналған жұртшылық алдында өнер көрсетіп, көпшілік кө­рерменнің зор ілтипатына бөленді. Алаңда жыр алыбы Сүйінбай мен Жамбылдың, Үмбетәлінің, баһадүр батырлар Қарасай, Наурызбай, Сұраншының бейнелері асқақтап, “Отаның – біреу, жүрегің –  біреу, Ту – біреу”, “Арман қала, ақ қала, көркейе бер, Астана”, “Бар әлемді қаратқан, достығымыз жарасқан”, тағы басқа  айшықты безендірулер мерекенің мән-маңызын аша түсті. “Бірлігіміз жарасқан” акциясы аясында өткен мерекеде Жамбыл ауданының әкімі Махаббат Би­гел­диев Елбасының биылғы Жол­дау­ын­дағы айтылған тапсырмалардың тиянақты орындалғанына тоқталды. Ауданда орта және шағын кәсіп­керлікті дамыту арқылы жұмыс­сыз­дықтың алдын алу, халыққа қызмет көрсететін нысандардың қатарын көбейту және басқа шаралар ауқы­мы ойдағыдай орындалып жатыр деуге болады. Бүгінде аймақта мың­да­ған кәсіпкер аудан экономика­сы­ның нығаюына өзіндік үлесін қо­суда. Осылайша Астана күніне лайықты тарту әзірлеген жамбыл­дықтардың мерейі үстем шықты. Астананың қарыштап дамуы, сән-салтанатының жарасымы бізге де өнеге. Мәселен, іргетасы сонау 1903 жылы қаланған аудандық жұ­мыспен қамту және әлеуметтік бағ­дарламалар бөлімінің көне ғимараты орнына жаңадан сәулетті құрылыс бой көтеріп, ел игілігіне берілгенін айтсақ болады. Сондай-ақ, Жамбыл аудандық орталық кітапханасы да күрделі жөндеуден өтті. Бұдан кейін аудан орталы­ғын­дағы Абай, С.Бердіқұлов, Ш.Уәли­ха­нов, Т.Рысқұлов, Наурызбай Құт­тым­бетұлы атындағы орта мек­теп­тердің оқушылары ару қала Астананың тарихын бейнелейтін “Сәулетті шаһардың құрдастары”, “Бейбітшілік пен келісім сарайының салтанаты”, “Жасыл желекті жас қала” атты та­қырыптар бойынша бейнекөріністерді жұртшылықтың назарына ұсынды. Бүлдіршіндер жиналған қауымды “Астанадан тарайды елге бақыт шуа­ғы”, “Астана – бейбітшілік пен дос­тық қаласы”, “Астана – жастық жа­лы­ны”, “Туған күніңмен, еңселі, елор­да!” деген ұранмен рухтандырды. Күмісжан БАЙЖАН, Алматы  облысы. Суретте: Астана күнінің өту салтанатынан көрініс. КӨҢІЛ КӨККЕ ШАРЫҚТАҒАН КҮН Қызылжар өңірінде  Астана күні кеңінен аталып өтті.  Оның үстіне Петропавл қаласының туған күні осынау айшықты мерекемен тұс­па-тұс келіп, петропавлдық­тар­дың көтеріңкі көңіл-күйінде шек болған жоқ. Мерекелік шара  “Жаңа дәуірдің жаңа Астанасы” атты бағдарламамен ашылып, ол  та­ғылымды шараларға, шығарма­шы­лық ұжымдар мен әншілердің концерттік бағдар­ламасына жалғас­ты. Астанаға және отбасына сый­лық, аталымдар бойынша марапат­тау, Астана күні  сәби туған отба­сылар мен отау тіккен жас жұбай­ларды құрметтеу, қалыңдықтар шеруі, тағы басқа жарасымды рә­сім­дер кеңінен көрініс тапты.  Кө­шелер көздің жауын алардай безен­діріліп, адамдар барынша әсем киі­ніп, елордаға деген құрмет барын­ша асқақталды. “Көктөбе” сауда үйінің алдында шағын бақтың тұсауы кесілсе, қа­лалық мәдениет және демалыс сая­бағында  “Достық субұрқағының салтанатты ашылуы болды. Мұнда “Дуслык” татар-башқұрт қоғамы­ның “Сабантой меймандарды қар­сы алады” ойын-сауығы жалғасса, облыстық Ассамблея ғимараты ал­дында  этномәдени бірлестіктердің халық шығармашылығы қолдан­ба­лы  өнер бұйымдарының көрмесі өтті. Мерекелік алаңдарды  ави­трал­ды бе­зендіру  жөніндегі жеке  кәсіп­керлердің “Шар”  фестивалі, өң­деу кәсіпорындары өнімдерінің сау­дасы да қызып сала берді. Та­рихи-өлкетану мұражайында өткен “Астанаға арналған  сурет­тер” балалар суреті конкурсын, жас су­ретшілер  вернисажын, театр­лан­ды­рылған  қойылымдар бағдарла­масын, спорттық жарыс­тарды та­ма­­шалаушылар да көп болды. “Гүл­­дене бер, Астанам” акциясы, “Ол күндердің даңқы өшпейді”  әдеби-сазды ком­пози­ция, “Са­л­анг”, “Алғыс” әскери-пат­риоттық клуб­тар­дың көрме экспозициясы  да тартымдылығы­мен ерекшеленді. Қазақстанның эстрада жұлдыз­дары Мақпал Исабекованың  және “101” тобының қатысуымен өткен  концерттік бағдарламаның соңы мерекелік отшашуға ұласты. Өмір ЕСҚАЛИ, Солтүстік Қазақстан облысы. АҚЖАЙЫҚТА АЛАУЛАҒАН АЛТЫ КҮН Батыс Қазақстан облысының орталығында Елбасы жүлдесі сарапқа салынды Орал қаласында Елбасы – еліміздің Тұңғыш Президенті Нұрсұлтан Назарбаевтың жүлдесі үшін өткізілген ІV Халықтық спорт ойындары мәреге жетті. 1-6 шілде аралығында еліміздің ба­тысындағы Қазақстанның көне де жаңа қаласы Оралды мерекелік көңіл-күй ауаны кернеп тұрды. Жарыстың ашылу салтанаты кі­шігірім олимпиадаға пара-пар болғандай күй кештік. Еліміздің барлық облыстарынан, Астана мен Алматы қаласынан келген спорт­­шылардың салтанатты шара­дағы киім үлгілері мерекенің шы­райын келтіре түсті. Төрт жылда бір өте­тін халықтық ойындар бә­секесін тұрғындар сағынып-ақ қал­ған екен. Ағайын-туысы, жақыны мен жұ­рағатына жанкүйер болып кел­ген жұртта есеп болмады. Ха­лық­тық спорт ойындары сонысымен ерекше, сонысымен ыстық. – Дүбірлі доданың төртінші рет өткізілу құрметі біздің облы­сымызға бұйырды. Өйткені, өлке­мізде спорттың бұқаралық сипа­тын арттыруға, бәсекеге қабілетті ре­зерв даярлауға, спорт инфра­құ­рылымын жетілдіруге мемлекеттік тұрғыдан үлкен көңіл бөлінген. Халықтық спорт ойындары – бұл саламаттылық пен парасатты­лық­ты көтеру, денсаулықты нығайту мен өмір жасын ұзарту, жалпы алғанда ұлт саулығының кепілі. Еліміздің спорттық әлеуетін ны­ғайту арқылы жастарды пат­риот­тық рухта тәрбиелеуге қол жет­кіземіз. Отбасы ынтымақтастығын насихаттау да осы жарыстың еншісіне тиіп отыр. Еліміздің атақ-абыройын қорғап жүрген еркін күрес шебері, Бей­жіңде өткен Олимпиада ойында­рының күміс жүлдегері Таймұраз Тигиев, самбо күресінен екі мәрте әлем чемпионы Ерболат Байба­тыров, грек-рим күресінен әлем чем­пионы Артур Үмбетқалиев, ер­кін күрестен Азия чемпионы Гу­зель Манюрова, шахматтан ха­лықаралық гроссмейстер Мұртас Қа­жығалиев сынды спорт саңлақ­тары тек батысқазақстан­дық­тар­дың ғана емес, бүкіл Қазақ елінің мақтанышы. Осындай спортшы­лары бар өлкеге қош келдіңіздер! Елбасы жүлдесі үшін өтетін жа­рыстың басталуымен шын жүрек­тен құттықтаймын! – деді Батыс Қазақстан облысы әкімінің орын­басары Серік Сүлеймен жарыстың ашылу салтанатында. Алдымен жарысқа қатысушы әр облыс пен қала командалары ше­ру жасап өтті. “Бірлігіміз жа­расқан!” жалпы ұлттық акциясы аясында өткен жарыстың Астана күнімен тұспа тұс келгені көпші­лік­ке мәлім. Сөз алушылар осы ай­тулы датамен құттықтауды да ұмытпады. Жарысқа қатысушы ко­мандаларға ұйымдастыру ко­митеті атынан естелік кәдесыйлар табыс етілді. – Елбасымыз биылғы Жол­дау­ында 2020 жылға дейін еліміз­дің тұрғындарының 30 пайызын спортқа тарту жөнінде тапсырма берген болатын. Сондықтан ос­ын­дай бұқаралық спорт түрлерін көбейтудің мәні зор. Халықтық спорт ойындары төрт жылда бір өт­кізілсе, келесі жылы ұлттық спорт фестивалі ұйымдастыры­лады. Бұл фестиваль да ең әуелі ауылдық жерлерден бастау алады. Аудандық, облыстық, ең соңында республикалық жарыс өткізіледі. Осылайша жылма жыл қалың бұ­­қара арасынан спортқа тартыла­тындардың қатары көбейеді. Мен өз кезегімде жарысты жоғары дең­гейде ұйымдастыра білген Батыс Қазақстан облысы әкімдігіне, ту­ризм, дене шынықтыру және спорт басқармасына рахмет айта­мын. Олардың мұндай ірі жарыс­тарды өткізуге жинақтаған тә­жі­рибесі мол. Оралда әлем кубогы, әлем чемпионаты, тағы бірнеше ірі халықаралық жарыстар өткен болатын. Сондықтан халықтық спорт ойындарының республика­лық жарысын осында өткізу жө­нінде шешім қабылданған еді. Ұй­ым­дастырылу деңгейі көңілімізден шықты. Барлық командаларға табыс тілеймін! – деді Туризм және спорт министрлігі Спорт коми­тетінің төрағасы Елсияр Қанағатов. Жарыстың алауын жағу және туын көтеру құрметі самбо кү­ресінен екі мәрте әлем чемпионы Ерболат Байбатыровқа бұйырды. Салтанатты шараның соңы ме­рекелік отшашуға ұласты. Сонымен, 14 спорт түрінен мық­тыларды анықтау бәсекесі бас­талды. Қазақ күресінен Қы­зыл­орда облысынан келген ба­луандар бабында екен. Әп-де­геннен жарыстың жалауын қолдан бермейтінін бірден байқатты. Сөйтіп, жеңіс тұғырына көтерілді. Ал Амангелді Сатыбалдиев, Дар­хан Өрікбаев, Қуаныш Мұратов сынды балуандардың арқасында Шығыс Қазақстан облысы жалпы командалық есепте екінші орын­ды иеленді. Үшінші орын Қа­ра­ғанды облысының еншісіне тиді. Самбо күресінен Батыс Қазақстан облысында мықты мектеп барын өзге облыс мойындап болғалы қашан. Бұл жолы да Ақжайықтың сайыпқырандары осы биігінен көрінді. Медет Оңдағанов, Асхат Шайхиев, Бағдат Жарылғасов, қыздардан Айжарқын Еслямова, Гүлсезім Әубәкірова, Алмагүл Ор­ынғалиева сияқты балуандарымыз жалпыкомандалық есепте Батыс Қазақстан облысын алға шығар­ды. Екінші орын Оңтүстік Қазақ­стан облысы, үшінші орын Ақтөбе облысына бұйырды. Кір тасын көтеруде Қостанай, қол күресінде Жамбыл, бильярд­тан Павлодар, тоғызқұмалақтан Алматы, үстел теннисінен Алматы қаласы, шағын футбол, дойбы және отбасылар арасындағы жа­рыста Батыс Қазақстан, жазғы Пре­зиденттік көпсайыста Қоста­най облысы бірінші орынды ие­лен­генін айта кеткен орынды. Осы­лайша жалпы командалық есеп­те Батыс Қазақстан облысы бі­рінші орынды жеңіп алса, екін­ші орын Қостанай, үшінші орын­ды Шығыс Қазақстан облысы иеленді. “Тойдың болғанынан бола­ды­сы қызық” дегендей, көп қырлы, сан-салалы ұйымдастыру жұмыс­тарын жүргізуді қажет еткен бай­рақты бәсеке бір күнгідей болмай өте шықты. Республиканың әр қиырынан келіп Ақжайық топы­ра­ғында бас қосқан спортшылар Оралдағы қонақжайлылық пен құр­метке ризашылықтарын біл­дірді. Олар аттанар алдында Батыс Қазақстан облысы әкімдігіне, оған қарасты туризм, дене шынықтыру және спорт басқармасының бас­ты­ғы Мүсілім Оңдағановқа Ел­басы жүлдесі үшін өткізілген сай­ыс­ты ұйымдастырудағы ілкімді­лі­гіне, алымдылығы мен шалымды­лы­ғына оң баға берді. Бұл жа­рыс­тың жоғары деңгейде өткенінің бірден бір дәлелі болса керек. Аз күнде туыс-бауырдай жақындасып кеткен спортшылар бір бірімен қимай қоштасты. Нұрсұлтан Әбішұлы Назарбаев ұлт спортының үлкен жанашыры, қолдаушысы ғана емес, сонымен бірге өзі де жақсы спортшы екені белгілі. Мұның өзі Елбасы жүлдесі үшін өткізілген республикалық сайыстың мәні мен мазмұнын, Елбасы өнегесінің барша қазақ­стандықтарға тигізетін ықпалды әсерін одан әрі тереңдете түскені анық. Темір ҚҰСАЙЫН, Орал. Суреттерде: Елбасы жүлдесі үшін өткізілген сайыстардан көріністер. Суреттерді түсірген  Сайлау Майлыбаев. АВТОКЕРУЕН ШЕРУІ Солтүстік Қазақстан облыстық іскер әйелдер ассоциациясы түрлі қоғамдық-саяси шараларға белсене қатысуды дәстүрге айналдырған. Бұл жолы “Бірлігіміз жарасқан!” акциясы аясында “Әйелдер ел қуатын еселей түседі” атты шараны бастама­шыл­дықпен қолға алып, жұртшылықтың үлкен қол­дауына ие болды. Ассо­циацияның төрайы­мы, облыс әкімі жанын­дағы іскер әйелдер және отбасы-демогра­фия­лық саясат ұлттық комиссияның мүшесі Бақытжан Сәмиеваның айтына қарағанда, осындай игі істердің өз дәреже­сінде өтуіне түрлі салаларда жұмыс істейтін өңірдің қыз-келіншек­терінің үлесі зор. Олар­дың қата­рында Н. Пиро­ж­кова, Ж. Мейрем­баева, Т. Чепу­хи­на секілді белсен­ді әйелдер бар. “Петропавл – Бескөл – Смир­ново” бағыты бойынша ауылдарды аралауға шыққан автокеруен ака­де­мик М. Қозыбаев атындағы Солтүс­тік Қазақстан мемлекеттік универси­теті жанынан мәре алды. Акцияны тамашалауға келген студент-жас­тар, қала жұртшы­лығы алдында об­лыс әкімінің орын­басары Александр Чжен сөз алып, мұндай ауқымды шаралар еліміздің қоғамдық-саяси өміріндегі әйел­дер­дің рөлін арттыруға ба­ғыт­тала­тынын атап көрсетсе, Ба­қытжан Мағжанқызы Елбасының гендерлік саясатының мән-маңы­зын түсін­ді­ріп берді. Бұдан кейін әсем безен­дірілген әртүрлі маркалы 15 жеңіл көлік сап түзеген күйі жолға шық­ты. Көшті өңірімізге белгілі ди­қан, Қазақстанның Еңбек Ері Генна­дий Зенченконың келіні Валентина Николаевна бастап жүр­ді. Бескөл кентінде автокеруен шеруін Қызылжар ауданының әкімі Қайрат Пішенбаев бастаған көп­ші­лік ән-жырмен қарсы алды. Жер­гілікті ассоциацияның белсенді мү­шесі Күлшара Асқарқызы бастаған көлік жүргізушілері автокеруенге қосылып, Аққайың ауданын бетке алып жүріп кетті. Жолай олар­ды Астрахан ауылының тұр­ғын­дары тосып алып, өз құрмет­те­рін көр­сетті. Мұнда авто­керуенге 5 көлік қосылды. Осылайша Смир­нов кентіне де келіп жетті.Аудан әкімі Рүстем Елубаев жұртшылық­тың қатысуымен өткен митингіде “Бір­лігіміз жарасқан” акциясы ая­сын­да шаралардың көп жүргізіліп жат­қанын, оның түпкі мақсаты адам­дар­дың қоғамдық белсенділігін арт­ты­ру, саламатты өмір салтын, ха­лық­тар арасындағы достықты насихаттау, жасампаз істерді жан-жақты таныту болып табылатынын атап көрсетті. Жергілікті әнші Дәулет Балтабаев бірнеше ән орындап берді. – Іскер әйелдер ассоциация­сы­ның жұмыс ауқымы кең. Құрамы­мыз­ға кәсіпкер әйелдер де тартыл­ғандықтан, көп балалы, тұрмысы төмен отбасыларға, аз қамтылған жандарға, қарт адамдарға материал­дық көмек көрсетуді мұрат тұтамыз. Осыған орай “Әйелдер ел қуатын еселей түседі” шарасы бойынша қайырымдылық акциясын өткізгелі отырмыз, – деді Б. Сәмиева сөзінің соңында. Өмір ЕСҚАЛИ, Солтүстік Қазақстан облысы. БІЛІМ МЕН ЕҢБЕК  БӘРІН ДЕ ЖЕҢБЕК Жамбыл облысының әкімі Қ. Бозымбаев  70 талапкерге білім  грантын тапсырды “Бірлігіміз жарасқан!” атты республикалық әлеуметтік акцияны қолдау одан ары жалғасуда. Жақында Жамбыл облыстық қазақ драма теат­рында осы өңірдегі жоо білімгерлері, колледж, мектеп оқушылары мен тү­лектері, қала мен облыс тұрғындары, соғыс және еңбек ардагерлері, жастар мен үкіметтік емес қоғамдық ұйым­дар­дың, ұлттық-мәдени орталықтар­дың өкілдері тағылымды іс-шараның куәсі болды. Облыс әкімі Қанат Бозымбаев тұр­мысы төмен отбасылардан шыққан дарынды жастарды қолдау мақса­ты­мен 2010 жылғы мектеп түлектеріне Жамбыл гуманитарлық-техникалық университетінде оқу үшін өзі бөлген білім гранттарын тапсырды. – Мектеп бітірушілер арасында ұлттық бірыңғай тестілеуден өте жо­ғары балл алмаса да, жақсы оқыған, көп балалы және аз қамтамасыз етіл­ген отбасылардан шыққан 70 түлекке Жамбыл гуманитарлық-техникалық университетінде оқуға облыс әкімінің білім гранттарын тапсырғалы отыр­мын. Білім гранттары облыстың еңбек рыногына қажетті мамандықтарға оқыту үшін беріледі. Яғни, бұл грант­тар болашағы зор жастарға қолдау ре­тінде беріліп отыр. Ендеше, барша­ңыз­ды елорда күнімен және облыс­та­ғы бүкіл жоғары және орта оқу ор­ындарының түлектерін өмірдің үлкен жолына түсулерімен шын жүректен құттықтаймын! – деді облыс әкімі. Бүгінде облыста 6 жоғары оқу ор­ны бар. Онда 26 195 студент 60-тан ас­там мамандық бойынша білім алуда. Жо­ғары білікті мамандар даярлау мақ­сатында облыстық бюджет есебінен орта-кәсіби білім алуға жыл сайын мемлекеттік оқу гранттары бөлінуде. Соған сәйкес бүгінде 39 мыңға жуық жастар кәсіби және техникалық білім алу үстінде десек, биыл оның 7.756-сы диплом алып отыр. Жамбыл гуманитарлық-техника­лық универсиеті – облыстағы белгілі алты жоо-ның бірі. Универсиет рек­торы, профессор Жомарт Қошқаров студенттерге білім берудің әлемдік биік деңгейіне ұмтылып жүрген білікті басшылардың бірінен саналады. Әлбетте, жастарды қолдау гранттар бөлумен шектелмейтіні белгілі. Жас мамандарды ауылдық жерлерге тарту, оларға қолдау көрсету де мемлекет тарапынан жасалып отырған игі шаралардың бірі. Бүгінде Елбасының бастамасымен “Дипломмен ауылға” жобасы өз нәтижесін бере бастады. Қазір ауылдық жерлердегі жұмысқа жас мамандар көптеп тартылуда. Өткен жылы 200 ма­ман ауылдық жерлерге жұмысқа орналасса, би­ылғы жылы 140 дәрігер, 84 мұғалім, 11 мәдениет қызмет­кер­ле­рін тарту бойынша жұмыстар жүргізілуде. Бұл Ел­басының жас­тар­ға деген қамқорлығы. Облыс басшы­сы­ның өз қолынан білім гранттары мен ауыл­дық жерлерге барып еңбек етуге жолдама алған жастар егемен елінің ертеңі үшін оқу мен еңбекте үл­кен табыс­тар­ға жете­тіндеріне жинал­ған­дар­ды нық сендірді. Көсемәлі СӘТТІБАЙҰЛЫ, Жамбыл облысы. Суретте: облыс әкімі Қ.Бозымбаев пен ЖГТУ ректоры Ж.Қошқаров білім гранттарына ие болған бір топ түлек­термен бірге.