ПЕТРОПАВЛ. 28 ақпан. Полиция қызметкерлері із кесуші-қызметтік иттердің көмегімен жыл басынан бері 80 қылмысты әшкереледі. Бұл туралы облыстық ішкі істер департаментінің баспасөз қызметі хабарлады.
Жуырда облыс орталығында ірі пәтер тонау фактісі тіркелген. Ұрлыққа қатысты дабыл түсісімен «Росси» есімді неміс овчаркасын жетелеген кинолог мамандар мен жедел тергеу тобы оқиға орнына жеткен. Иісшіл ит бірден қылмыскердің ізіне түсіп, нәтижесінде екі адам құрықталған. Мамлют ауданы тұрғынының ұрланған ұялы телефонының табылуына да төрт аяқты сенімді көмекшілердің үлкен жәрдемі тиген.
–«Россидің» иісшілдігі керемет. Бір де-бір қылмыскерді бұлтартқан емес. Өз «қызметінде» 200-ден астам қылмысты тұзақтады, дейді кинологтар.
Ізшіл иттер есірткі заттарын іздестіруге де кеңінен пайдаланылады. Олардың көмегімен 25 килоға жуық есірткі тәркіленіп, 400-ге жуық қылмыс ашылған.
Өмір Есқали.
Дерек, сурет: ОІІД-нің баспасөз орталығынан алынды.