Ұлттық музейде «Дұрыс аңшылықты қолдау және жануарлар дүниесін қорғау» корпоративті қоры Қазақ хандығының 550 жылдығына «Қазақстанның жануарлар дүниесі» атты республикалық фотокөрме ұйымдастырды.
Қор президенті Оралбай Әбдікәрімовтің айтуынша, байқау түрінде өткізіліп жатқан фотокөрмеге 70 фотосуретшіден 231 сурет келіп түскен. Байқауға Қазақстанның ең мықты фотографтары қатысып отыр.
«Фотоөнер саласының майталман мамандарынан құралған қазылар алқасы суреттердің стилі мен сапасына, ерекшелігі мен бірегейлігіне басымдық берді. Қазылар алқасы фотокөрмеге ең үздік 40 суретті таңдап алды», – деді О.Әбдікәрімов.
Қор президентінің сөзінше, республикалық фотокөрме еліміздегі жануарлар дүниесінің саналуандығын көрсетуді көздейді және оларды қорғауды насихаттайды.
«Адамдардың табиғатқа селқос қарауының cалдарынан көптеген жануарлардың саны азайып, кейбіреулері жойылып кетіп жатыр. Бүгінде біздің елімізде қабылан, Тұран жолбарысы, Пржевальск жылқысы мүлде жоғалып бітті десе де болады. Бұған адамдардың табиғатты ластауы, түрлі табиғи апаттар мен өндіріс орындарының көбеюі бірден-бір себеп болып отыр. Бүгінгі фотокөрме ел азаматтарының жануарлар дүниесін сақтауға деген жауапкершілігін арттыруға сеп болады деген ойдамын. Біз барлығымыз бірлескенде ғана табиғатымыздың фаунасын жоғалтпай, болашақ ұрпаққа аманат етіп тапсырамыз», – деді қор президенті.
Сөз арасында О.Әбдікәрімов Қазақстанда құстардың – 490, сүтқоректілердің – 172, бауырымен жорғалаушылардың – 51, қосмекенділердің – 12, балықтың 100-ден астам түрі бар екеніне тоқталды.
«Елімізде жойылып бара жатқан және жойылудың алдында тұрған жануарларды тіркеп отыратын «Қызыл кітап» мерзімді түрде жарық көріп жатыр. 2010 жылы шыққан «Қызыл кітаптың» 4 басылымына балықтың – 18, қосмекенділердің – 3, бауырымен жорғалаушылардың – 10, құстардың – 57, сүтқоректілердің – 40, өзге жануарлардың 128 түрі енген», – деп түйді ойын қор президенті.
Көрмеде сөйлеген сөзінде мемлекет қайраткері Өмірбек Байгелди шет мемлекеттерде адамдар табиғатпен біте қайнасып кететінін, оны аялайтынын, қадірлеп қастерлейтінін, біз сияқты немкеттілік танытпайтынын тілге тиек етсе, Мәжіліс депутаты Қуаныш Сұлтанов республикалық фотокөрме дер кезінде ұйымдастырылып отырғанына тоқталып, оның берері мол болатынына сенім білдірді. Ал Ұлттық музейдің директоры Дархан Мыңбай Қазақстан Тәуелсіздік алғаннан кейін алғашқы қабылдаған заңдарының бірі жан-жануарлар мен қоршаған ортаны қорғауға қатысты заң болғанын атап көрсетіп: «Мұның өзі біздің мемлекетіміздің табиғатқа деген дұрыс көзқарасын көрсетеді және атакәсіп – аңшылықты оң бағытта дамытуға басымдық беруді қалайтынының жарқын көрінісі болып табылады», – деді.
Айта кетейік, республикалық фотокөрменің қорытындысы 20 қазан күні шығарылады.
Ерлан ОМАРОВ,
«Егемен Қазақстан».