АСТАНА. 16 қазан. Қазақстан футбол федерациясының бас менеджері қызметіне белгілі ресейлік маман Дмитрий Васильев тағайындалды. Бұл туралы федерацияның баспасөз қызметі хабаарлады.
Дмитрий Пантелеевич М.В.Ломоносов атындағы ММУ жанындағы Азия және Африка елдері институтының экономика факультетін бітірген. Сонымен қатар, Экономика және кәсіпкерлік институтының заң факультетін тәмамдады. Төрт шет тілін меңгерген. Оның соңғы жұмыс орны «Жетісу» футбол клубы болды. Қысқа уақыттың ішінде қаржылық оңтайландыруға қарамастан жақсы спорттық нәтижеге қол жеткізді.
Дмитрий Васильев бұған дейін Ресейдің «Динамо» (Мәскеу), «Москва», «Урал» (Екатеринбург), «Ростов», «Тюмень» футбол клубтарында жетекшілік қызметтерді атқарды. Молдовалық «Политехника» клубының вице-президенті, Ресей футболы ұлттық лигасының президентіне үміткер болды.
Еламан Қоңыр.
Дерек, сурет: Қазақстан футбол федерациясының баспасөз қызметі.