АСТАНА. 24 мамыр. Ақмола облысының әкімі Сергей Кулагин Степногорск қаласына жасаған іссапары барысында мәслихаттың кезектен тыс сессиясын өткізіп, онда қаланың жаңа басшысын тағайындады. Депутаттардың алдында облыс әкімі жаңа қызметке отырған Әнуар Күмпекеевті таныстырды. Бұл туралы zakon.kz хабарлады.
Сергей Кулагин мәслихат депутаттарына Президент Әкімшілігінің келісімімен Степногорск қаласының әкімі болып Әнуар Күмпекеев тағайындалғанын мәлімдеді. Сессияда облыс әкімі жаңа басшының мол тәжірибелі, жетекшілік қабілеті жоғары, іскер азамат екенінне ерекше тоқталды. Сондай-ақ, Сергей Кулагин жаңа әкім қаланың дамуына аянбай еңбек етіп, халықпен тығыз байланыс орнатып, жұмыс жасайды деп сенім білдірді.
Айта кетейік, Әнуар Күмпекеев 1984 жылы туған. 2005 жылы Мәскеудегі Михаил Ломоносов атындағы мемлекеттік университеттің экономист бакалавр мамандығын бітірген. Ал 2007 жылы Ұлыбританияның Бредфор университетінде экономика саласы бойынша магистратураны тәмамдаған. Сонымен қатар, «Болашақ» бағдарламасының түлегі.
Әнуар Күмпекеев еңбек жолын 2005 жылы Қазақстан Республикасы Денсаулық сақтау министрлігі қаржы және экономика департаментінде жетекші маман болып бастаған. Сондай-ақ, ол түрлі қызметтерде абройлы жұмыс істеген. 2012 жылдан осы күнге дейін Степногорск қаласы әкімінің орынбасары қызметін атқарып келді.
Сессиядан соң облыс әкімі Сергей Кулагин қала активтерімен жиын өткізіп, жаңа басшыны таныстырды.
Талғат Райымбек.
Дерек, сурет: zakon.kz.