ҚОСТАНАЙ. 24 мамыр. Қостанайда орман шаруашылығы және жануарлар дүниесі облыстық-аумақтық инспекциясының екі бірдей лауазым қызметкері орынтағын босатты. Бұл туралы egemen.kz тілшісі хабарлады.
Екі шенеуніктің қызметтен кетуі киіктің қырылу оқиғасына сәйкес келді. Сондықтан көпшілік олардың киіктің нәубетіне қандай қатысы бар деген ойда қалған еді. Облыстық прокуратураның 1-басқармасының бастығы Асқар Сыздықовтың журналистермен өткізген брифингінде шенеуніктердің қызметтен кету себебі де қозғалды. Прокурор инспекцияның бұрынғы бастығы Марат Бегімбетовтың қызметтен кету себебі туралы ашып ештеңе айтқан жоқ. Оны ҚР мемлекетітк қызмет және сыбайлас жемқорлыққа қарсы іс-қимыл агенттігі облыстық департаментінің баспасөз хатшысы Мөлдір Шериева хабарлады.
Мөлдір Шериева: «2015 жылы сәуірде осы аталған обылстық-аумақтық ирнспекцияға тексеру жүргізілген болатын. Онда бірқатар кемшіліктер, заң бұзушылықтар анықталды. Инспекция бастығы Марат Бегімбетов 3 жыл бас бостандығынан айырылған және 5 жылға дейін мемлекеттік қызметке кіруге құқығы жоқ Михаил Соломоновты жұмысқа алған» деді. Мемлекеттік қызмет туралы заңға сәйкес сыбайлас жемқорлыққа қатысты қылмыс жасаған адам мемлекеттік қызметке қабылданбауы тиіс. Инспекция бастығы заң талаптарын орындамаған, Михаил Соломоновты орман шаруашылығы және жануарлар дүниесі облыстық-аумақтық инспекциясының бөлім бастығы етіп қабылдаған.
Мемлекеттік қызмет және сыбайлас жемқорлыққа қарсы іс-қимыл департмаменті бұл туралы әкімшілік материал дайындады. Ол бойынша Марат Бегімбетов қызметтен кетті және 100 айлық көрсеткіш көлемінде айып төлейді. Марат Бегімбетов мұндай шешімге наразылығын білдіріп, істі сотқа берген болатын. Бірақ сот сатылары оның арызын қанағаттандырған жоқ. Ол қызметінен кетті. Сонымен қатар, Михаил Соломонов та қызметінен кетті. Қазір инспекцияның бастығы қызметінің міндетін басқа аумақтық-облыстық инспеция бастығының орынбасары Нұрқан Сәрсенов орындап отыр.
Нәзира Жәрімбетова.
Дерек, сурет: egemen.kz