«Нұр Отан» ХДП аймақтарда есептік-сайлау конференцияларын өткізеді. Оны ұйымдастыру мәселесі 20 желтоқсанда Астанада партияның аймақтық филиалдары басшыларымен болған селекторлық жиында басты тақырыпқа айналды.
Жиынды ашқан партия Төрағасының бірінші орынбасары Нұрлан Нығматулин: «Елбасы, партия Төрағасы Нұрсұлтан Әбішұлы Назарбаевтың шешіміне сәйкес, «Нұр Отан» партиясында жақында есептік-сайлау науқаны басталады. Бұл шараның ерекшелігі сол, осы жолы партиямыздың жаңа бағдарламасының жобасы қаралатын болады», деді.
Бұл бағдарламаны бүкілхалықтық деуге де болады. Өйткені, оны дайындауға танымал ғалымдар, сарапшылармен қатар, «Отандастар» акциясы арқылы 2 миллионнан астам ел азаматтары қатысты.
Партия филиалы басшылары өз кезегінде есептік-сайлау конференцияларын өткізуге дайындық, партияның жаңадан қайта жасақталып жатқан органдарына сапалы кадрлар іріктеу, сондай-ақ, Саяси кеңес жиындарының қорытындылары туралы сөз етті.
Нұрлан Нығматулин баса назар аударуды қажет ететін бірқатар мәселелерге тоқталды. Ол, ең алдымен, бастауыш партия ұйымдары жұмыстарының басым бағыттарын талқылау және ұйымның стратегиялық нұсқауларын халыққа жеткізетін, ақпараттық-насихат жұмысын жетілдіретін, съезден кейінгі белсенді жұмысты жалғастыратын партияның жергілікті жерлердегі басқарушы органдарының сапалы, тиімді құрамын қалыптастыру қажеттігі болып саналады.
«Егемен-ақпарат».