Бағдарламада кінәрат жоқ десек те

Сізді не толғандырады?

Өткен жылғы 23 маусымда Премьер-Министрдің атына бір топ депутат «Нұрлы көш» ауылындағы салынған сапасыз үйлер туралы және өз көзімен көрсін деп сол үйлердің суреттерін қоса тіркеп, депутаттық сауал жолдаған едік. Біздің депутаттық сауалымызда көтерілген мәселелерге қатысты арнайы тексеру нәтиже­сін­де бұрнағы жылғы қыста суық, ылғалды болға­ны және кейбір үйлердің сапасыз салынғаны тура­лы кемшіліктер бойынша актілер жаса­лып, со­ған байланысты қажетті жөндеу және қалпы­на келтіру жұмыстарын тамыздың 15-іне дейін аяқ­­тау тапсырылып, мәселені тікелей облыс әкі­мі бақылауына алғандығы  жө­нін­де жақсы хабар алып, іштей қуанып қалып едік. Бірақ, жа­қын­да 63 оралманның атынан келіп түскен арыз­ды көріп, қуанышымыз су сепкендей басылды. Красный Яр кентінің жанында орналасқан «Нұрлы көш» ауылы тұрғындарының жылап айтқан зары мен мұңын екінші рет көтеріп, Үкімет басшысының назарына салу мақсатында  қайта жазып отырмыз. «Нұрлы көш» бағдарламасының аясында са­лын­ған сапасыз үйлер туралы ұлттық телеарналар да арнайы репортаж дайындап, назарға ұсын­ған­да­рын көріп, куә болдық, ал «Қазақстан заман» газетінде екі мәрте көлемді мақала жарияланды. Ашын­ған ауыл тұрғындарының: «Енді тек Елбасы Нұрсұлтан Назарбаевқа ашық хат жазып жолдаудан басқа амалын  көріп тұрған жоқпыз», – дегенін көзіміз көрді. «Баяғы жартас – бір жартас» дегендей, мы­нан­дай көзбояушылыққа не айтарымызды білмей, сол құ­рылысты жүргізген мердігер мырзаны бір ай бала-шағасымен өзі салған үйлердің біріне тұр­ғызса, «мүмкін басқаша ойланар ма еді?» деген  де ой келді. Не істерлерін білмей, тығырыққа тірелген, көздері мұңға толған бауырларымыздың жүздеріне қарап, осы сапасыз салынған үйлерді біз салғандай күй­ кештік. Қыс болса, қылышын сүйретіп, бірден қатты суығын  ала келді. Ауыл тұрғындары: «Көп­теген оралмандар қыстап шығуға Астана және бас­қа қалаларға амалсыздан кетіп жатыр» дегенді айт­ты. Сонымен бірге, оралмандардың жұмыссыз жүр­гендері де жетерлік екен. Жазда «екі қолға – бір күрек» деп жұмыс тауып істеп, ал қыста жаппай жұмыссыз отырғандарын да алдымызға тартты. «Нұрлы көш» бағдарламасының қабылданға­ны­на екі жылдың жүзі болды. Бағдарлама атына заты сай болар деп күттік. Алайда, қазіргі таңда бұл бағ­дарламаның да шикіліктері анықталып, шеттен кел­ген қандастарымызға шарапатынан гөрі кесірін тигізіп жатқаны алаңдатушылық туғызуда. Өйт­кені, бе­рілген үйлер арзанқол құрылыс материал­дары­нан салынып, қысқы айларда олардың суық, жайсыз жағдайлары көптеп кездесуде. Сонымен қатар, жұмыссыз отбасылар ай сайынғы несиені төлеуге қауқарсыз болып отыр. Соған байланысты алдағы уақытта осындай тұрмыстық-әлеуметтік мәселелердің  түйіні қалай шешілмек? Елбасының қолдауымен әзірленген бағдарлама­ға тағар айып жоқ – сырттан келген ағайындар үшін сәтті жасалған. Сондықтан, атқарушы билік органдары мемлекет тарапынан оралмандарға көрсетілетін көмекті, әйтеуір, айтарға, жай ғана есеп үшін емес, қандастарымызды өзімізбен терезесі тең, еліміздің келешегіне өз үлесін қосатын, «бір жағадан бас, бір жеңнен қол шығаратын» ағайын  ретінде қабылдап, бауырға басу қажет. Бұл – біздің ұлттық қауіпсіздігіміздің, демографиялық дамуымыз бен жарқын болашағымыздың  кепілі. Келген ағайындарымыздың жергілікті жерлерде құқықтарының сақталуына, олардың ортаға бейімделіп, кірігуіне, республикалық бюджет есебінен бөлінетін қаражаттың мақсатты пайдаланылуына баса назар аударған жөн деп есептейміз. Құрманғали УӘЛИ, Мәжіліс депутаты.