Олар парк ішіндегі жұмысты осылай атқарады
Шымкенттік полицейлер саябақ ішінде велосипедпен жүр. Таңғаларлықтай оқиға болмағанымен, қалалық полиция бөлімінің басшылары бұл қадамға еріккеннен бармаған. Бір миллионға жетеғабыл адамы бар қалада оннан астам саябақ бар. Халық көп жүрген жерде ұсақ ұры-қары дегеніңіз жыртылып-айырылады. Қалтаға түседі, шашау жатқан дүние болса, үптеп кетеді. Оларды жаяу қуып жету қиын, жықпыл-жықпылға сіңіп кетеді.
Сондықтан, осындай экспериментке баруға тура келген.
– Бұрын парктерде орналасқан камералардан көрген құқық бұзушылықтар анықталғанымен, ол жерге дер кезінде жету қиын болып тұр еді. Ал қазір осы бейнекамераларды көргеннен кейін велосипедтермен тез жетуге болады, – дейді қалалық жергілікті полиция полкі командирінің орынбасары Ерлан Ермеков.
Әзірге құны 100 мың теңгедей тұратын он велосипед алынды. Оған офицерлер емес, сержант шеніндегі тәртіп сақшылары мініп жүр.
Жалпы, бұл сынақтың үдеден қаншалықты шығатындығы белгісіз. Осыдан алты-жеті жыл бұрын саябақ ішінде тәртіпті бақылайды деп шетелден милиондаған қаржыға тұрқы биік аттар сатып алынып, полицейлерді отырғызған еді. Парк ішінде қоқыраңдап желіп жүрген сол аттар жоқ, соғымға сойылып кетті ме қазір көрінбейді.
Ал «шайтанарбаны» жей алмайсың. Шөп те, су да тілемейді. Шетел полицейлері атпен де, велосипедпен де патрульде жүреді. Біздің полицейлер аттың шаруасын бітіріп, соңғысының ершігіне отырды.
Бақтияр ТАЙЖАН,
«Егемен Қазақстан».
Оңтүстік Қазақстан облысы.