Кеше Ұлттық музейдің ұйымдастыруымен Халықаралық әйелдер мерекесіне орай Франц Бирбаум және Карл Фаберже ордендерінің иегері, «ZergerIlyas» брендінің негізін қалаушы Ілияс Сүлейменовтің «Тұмар тәжі» көрмесі ашылды.
Баспасөз мәслихатымен басталған жиында сөз алған Заманауи өнер орталығының жетекшісі Роза Әбенова әлемге әйгілі шебер-зергер Ілияс Сүлейменовтің жұмыстары туралы терең тебіреніспен пікір білдірді.
– Ілияс Сүлейменов қазақтың талантты зергерлерінің бірі. Оның әшекей бұйымдарының қай-қайсын алсаңыз да, халқымыздың тарихымен, ұлттық болмысымен байланысып жатыр. Тарихқа сүйене отырып мұндай бұйымдарды жасай білу әркімнің қолынан келе бермейді. Ол өз кезегінде терең білімді, көп жылдық тәжірибені қажет етеді. «Тұмар тәжін» мұқият бақылап қараған адам, көне тарихты көрген болар еді. Оның басты құндылығы осында. Бүгін таныстырылып отырған туындылар ұлттық мәдениетіміздің дамуына қосылған қомақты үлес деп есептеймін, – деді ол.
Зергер Ілияс Сүлейменов Ұлттық музейдің төл туындыларына жасаған қамқорлығына алғыс білдіре келе, көрмеге жиналған қонақтарға еңбектерін таныстырды.
– Бұл жай ғана тәж емес. Кешегі көне түркі халықтарының ұлы патшайымы Тұмардың батырлық бейнесіне негізделіп жасалған дүние. Осы уақытқа дейін менің жұмыстарым әлемнің көптеген елдерінде таныстырылды. Алайда, өз Отаным бәрінен артық. Көп жылғы зерттеулердің нәтижесінде дайын болған екі жұмысыма да Алтын залының төрінен орын берілгеніне қуаныштымын. Ұлттық музей тарапынан көрсетілген осыншама құрметке дән ризамын, – деді автор ағынан жарыла.
Көздің жауын алатын екі құнды бұйымды да Ұлттық музейдің Алтын залынан көріп, тамашалауға болады.
Рауан ҚАЙДАР,
«Егемен Қазақстан».