АСТАНА. 31 наурыз. Қырғызстанның Баткен облысының аумағындағы шекара сызығы бойынан жерасты жолы табылды. Бұл туралы ras.kz-ке сілтеме жасаған egemen.kz тілшісі хабарлады.
Қырғызстан мен Өзбекстан аумақтарын жалғап жатқан тескентауды қырғыз шекарашылары тауып алды.
Хабарланғандай, туннель Қырғызстан жағынан қазылған. Ол Баткен облысы, Кадамжай ауданы, Кыргыз-Килак айылындағы бір тұрғын үйден Өзбекстанның Ферғана облысы, Олтыарык ауданындағы Борбалык қишлоғындағы келесі тұрғын үйге қарай тартылған.
Наурыздың 25-і күні Қырғызстан мемлекеттік шекара қызметінің төрағасы Райимберди Дуйшенбиев пен Өзбекстан ұлттық қауіпсіздік қызметі шекара әскерлерінің қолбасшысы Рустам Эминжанов «Кызыл-Кия-автожол» қабылдау-өткізу бекетінде өткізілген кездесудің шеңберінде аталған туннельмен танысты.
Жерасты жолының тереңдігі 7-8 метр болса, ұзындығы 110 метрді құрайды.
Талғат Райымбек.
Дерек: ras.kz.
Фото: abai.kz.