Фристайл
Барларын салған Дмитрий Рейхерд пен Юлия Галышева могулдан Азиада алтынын алды Шаңғы бағдарлау жарысында абыройымызды асырып, жанкүйерлерді желпінтіп кеткен Ольга Новикованың алтынынан кейін де табыссыз болған жоқпыз. Фристайлшылардан бірінші болып доданы могулшылар бастады. Осылайша қазақстандық Дмитрий Рейхерд могулдан Азиада чемпионы атанды. Қыздар арасында Азиаданың кезекті алтынын Қазақстан қанжығасына Юлия Галышева байлады. Осы арада шейпер-архитектор Валентин Котляровтың мәлімдеуімен, «Табаған» спорттық кешеніндегі фристайл жолы бар болғаны 10 күн ішінде салынғанын айта кетелік. Қазақстандық 22 жастағы танымал могулист Дмитрий Рейхерд маусымды Финляндияда өткен әлем кубогында төртінші орын алып, жақсы көрсеткішпен бастаған болатын. Жарыс алдында Дмитрий: – Қазір бар ойым Азиадада. Өзімді де, жанкүйерлерімді де қуантқым келеді, сондықтан қайтсем де алтын алуым керек. Ол үшін барлық жағдай жасалған, мүмкіндік мол. Жарысқа мықты қарсыластардың келгеніне өте қуаныштымын. Оңай бәсеке болайын деп тұрған жоқ, – деген еді. Дмитрий 12 жасынан бастап фристайл спортымен айналысады. Спорттың бұл түрін ол өзі таңдаған. Өз қорқынышыңды жеңу – ең үлкен жеңіс деп санайды. Алтын алмай тұрып-ақ жерлесіміз: – Кез келген спортшы үшін жарыста жеңіске жету – бұл өз-өзіңді жеңу, өзіңді барынша қолға алып, жүктемені жоғары деңгейде орындау деген сөз. Бұл керемет сезім! Дегенмен, бұл жерде тәжірибенің маңызы зор. Мен 10 жылдан астам әлемдік деңгейдегі жарыстарға қатысып жүрмін, сондықтан әлемдік жарыстарды жаңадан бастап жүрген спортшыларға қарағанда маған әлдеқайда оңай. Екінші жағынан, маған жүктелер жауапкершілік те әлдеқайда жоғары, – деп ағынан жарылған еді. Қазақстандық фристайлдың жас жұлдызы болып есептелетін, Францияның Мерибел қаласында өткен Әлем кубогының жеңімпазы Юлия Галышева да Қысқы Азия ойындарында фристайлдың могул түрі бойынша алдына жан салмауға уәде беріп, қысқаша сұхбаттасып үлгерген едік. – Фристайлмен қай уақыттан бері айналысасыз? – 4 жастан 6 жасқа дейін батуттағы акробатикамен және жалпы дене шынықтырумен айналыстым. Сол уақытта жасаған жаттығулардың барлығын кейін шаңғымен секіріп жасайтынымды кім білген. Фристайлмен айналыса бастаған кезде спорттық жиындарға бардым. Көп уақытымды тауда өткіздім. Мені мұнда барлығы қызықтыра бастады. – Азия ойындары басталғанға дейінгі жаттығуларыңыз қалай өтті? – Маған аспан шайдай болған ұнайды. Күн жарқырап тұрса, көңіл күйің де көтеріңкі болады. Жарысқа жайлы жағдай жасалады. Трасса әлі жұмсақ, төбешіктер әлі кішкентай және жазылып үлгермеген. Бірақ сайыс басталғанша барлығы дұрысталады деп ойлаймын. – Өз командаңызға қандай баға бере аласыз және сізге басты қарсылас болатын кім? – Командаға ең мықты фристайл спортшылары жұмылдырылған. Бізге басты қарсылас бола алатын жапондықтар шығар. – Азиададан кейін немен айналысасыз? – Алдағы уақытта әлем кубогының кезеңдеріне қатысуды жоспарлап отырмын. Міне, осылайша тілдескенімізге тәулік өтпей жатып Галышеваның арманы да, болжамы да орындалды. Қыздар арасында екінші орында – жапондық Мики Ито, үшінші орын қытай қызы Квин Нингке бұйырды. Азиаданың жаңа чемпионы Галышева жарыстағы жеке көрсеткішін 22,09 баллға көтерді. Квалификация бойынша соңғы нәтиже көрсетіп, қола жүлдені иеленген Қытай қызы мамандар мен көрермендерді ақтық сәттерде таң қалдырып, мәре сызығына жақындағанда жапондық Тае Сатое мен Юлия Родионованы басып озды. Ерлер арасында өткен могул жарысында екінші орынды жапондық Осаму Уено алса, үшінші орын да қазақстандықтарың үлесінде. Қола жүлдені Дмитрий Бармашов жеңіп алды. Мамандар осыған дейін Азиадаға қатысатын Қазақстан могулшілері күштілердің қатарында екенін айтып келген. Солардың арасында Бармашовтың орны бөлек болатын. – Дмитрий, сіздің спорттағы алғашқы қадамыңыз қалай басталды? – Әуелі 7 жыл тау шаңғысымен шұғылдандым. Сонда жүріп 5 жыл бойы оңды-солды бұрылудың тәсілдерін үйрендім. Тек содан кейін ғана могулге ауыстым. Қазір 26 жастамын. Басқаша айтқанда, осы спорттың қыр-сырын толық меңгерген сияқтымын. – Фристайлшының басты сапалық бейнесі туралы не айтар едіңіз? – Бұл спортқа барлық жан-тәніңізбен берілуіңіз керек. Сондай-ақ, өз шеберлігіңізге міндетті түрде сенуге тиіссіз. Көңіліңізде қобалжу болса, құлап, жарақат алуыңыз әбден ықтимал. Сондықтан іс-тәжірибеңізге сеніп, тек алға ұмтылуыңыз керек. Сонымен «Табаған» спорт кешенінде өткен ерлер могулы жарысында бес елден 10 спортшы бақ сынады. Бұл спортшылардың барлығы фристайлдан бірнеше халықаралық жарыстардың жеңімпаздары болатын. Осы арада Азиада додасы басталар алдында ғана фристайл бойынша Қазақстан құрамасының бір бөлігі 25 Халықаралық қысқы Универсиада өткен Түркиядан алтын мен қола медальды жеңіп әкелгенін айта кетуге болады. – Үйге жеңіспен оралғанымызға қуаныштымыз, өйткені бұл – Азиададағы біздің фристайлшылар үшін жақсылықтың белгісі, – деп атап көрсетті могул бойынша Қазақстан құрамасының бапкері Вадим Соколов. Универсиадада Қазақстан құрамасы тек могул бойынша жарыстарға қатысқан. Қазақстандық Дарья Рыбалова екі ресейлік қыздан озып шығып, чемпион атанды. Ерлер арасында бірінші және екінші орындарды ресейліктер алса, үшінші орынды қазақстандық Денис Моисеев иеленді. Төртінші орында қазақстандық Андрей Соколов тұр. «Енді біздің спортшылар Азиадада жақсы нәтижелер көрсету керек: Алматыдағы жол қиын, ол әлемдегі қиын жолдардың бірі. Біздің жігіттерден басқа жапондықтар да алтыннан үмітті деп ойлаймын. Барлығының мақсаты бір – медаль үшін күресу», деген еді Вадим Соколов. Қазақстан құрамасының фристайлдан бас жаттықтырушысы Виктор Лемешко өз командасының могулдағы алғашқы жаттығуынан кейін трассада барлық техникалық ережелер сақталғанын айтып: – Жол өте күрделі, сондықтан жігіттер оны ойдағыдай жүріп өтуі үшін уақыт керек. Мен өз командамның күшіне сенемін, сондықтан жеңіс тұғырына көтерілетінімізге сенімдімін, – деген болатын. – Азиадаға команда қай жерде дайындалды? – Негізгі жарыстарға біз Алтайда дайындалдық. Ол жақта қар қалың, қанатты жол да жылдам жүреді, сондықтан Алтайда жаттығу өте ыңғайлы. Одан бөлек, Өскеменде де жаттығуға ыңғайлы жоталар бар. – Жаз мезгілінде қайда жаттығасыздар? – Шығыс Қазақстанда немесе Австрияда. Айнаш ЕСАЛИ. Алматы.
