- Қазақстанда мерзімі өтіп кеткен жалақы қарызының көлемі 2,7 есеге төмендеді. Сөйтіп, ол 276 миллионнан 10 миллион теңгеге дейін азайды. Денсаулық сақтау және әлеуметтік даму министрі Тамара Дүйсенованың айтуынша, бұған мемлекеттік еңбек инспекторларының қызметі себепші болған. Мәселен, 4 мыңнан астам тексерулер кезінде 6 мыңнан астам еңбек заңнамасын бұзушылық анықталған.
- Ұлттық экономика министрі қалалы жерлерде шағын несие беруді арттыруды ұсынды. Мұны көтерген Қуандық Бишімбаевтың айтуынша, Елбасы тапсырмасымен алдағы уақытта бірқатар маңызды шараларды қамту көзделеді. «Біріншіден, еңбек ресурстары артылатын, ауылды жерлерден жастар көбірек ағылатын қалаларда шағын несие беруді дамыту керек», – деді министр. Осы арқылы қалаға келген жастар жұмыссыздар қатарын арттырмай, кәсіпкерлікті дамытуға да мүмкіндік алулары тиіс.
- Биыл 4 облыстағы 183,4 мың гектар жерде суландыру жүйелерін қалпына келтіру жобасы жүзеге асады. Су сіңіру және суландыратын жерлерді қалпына келтіру мақсатында биылғы жылдың маусым айында Ислам даму банкі мен Еуропа Қайта құру және Даму банкінен мемлекеттік кепілдік есебінен 106 млрд. теңге (314,1 млн. АҚШ доллары) құрайтын жобаларды жүзеге асыруға қарыздар тарту бойынша жоспар қабылданды.
- Алматыда арықтар желісін жөндеуге 600 миллионға жуық теңге бөлінеді. Оңтүстік астанада көбейген нөсер жауындар арық желісіндегі кемшіліктерді айқын көрсетіп берді. Қалада арық желісінің 50 пайызы қанағаттанарлықсыз күйде. Осыған байланысты, 495 млн. теңгеге 18,2 шақырымдық арық желісіне ағымдағы жөндеу жұмыстарын жүргізу жоспарланды.
- Полиция Астана күнінде жоғалып кеткен қыз бен оның екі жасар інісін тауып алды. «Елорда полицейлері Алматы ІІД қызметкерлерімен бірлесе отырып, жоғалып кеткен балаларды Алматы автовокзалынан тауып алды. Олар Алматы қаласының ІІБ-не жеткізілді. Оқиғаның мән-жайы анықталып жатыр», – деді Астана ішкі істер департаменті баспасөз қызметінің жетекшісі Софья Қылышбекова.
- «Қазақстан балалар көзімен» атты жас суретшілер байқауы өтті. Отан-анаға деген сүйіспеншілікті дәріптеу мақсатында өткізілген конкурсқа 3 мыңнан аса шығарма келіп түскен. Кеше солардың ең таңдаулылары үздік марапатқа ие болды. Гран-при иегері атанған қарағандылық Анель Имишова бас қаланың кереметтілігін өз қаламына арқау етіпті.
