Жоғарғы лауазымды тұлғалармен көбіне ел тіршілігі жөнінде сұхбат алып жатамыз. Көп жағдайларда әр деңгейдегі биліктің тұтқасын ұстап отырған азаматтардың ішкі жан дүниесі, рухани бітім-болмысы, адами қасиеттері туралы қалың оқырманның хабары бола бермейді. Батыс Қазақстан облысының әкімі Бақтықожа Ізмұхамбетовтің ақынжанды азамат екенін білетінбіз. Бірақ бұл жөнінде жазуға ол кісі ыңғай таныта бермейтін. Әйтсе де бұл жолы өзінен рұқсат сұрай отырып, облыс әкімімен болған сыр-сұхбатты оқырмандар назарына ұсынғанды жөн көрдік.
– Бақтықожа аға, сіздің өлеңдеріңіз қандай жағдайда туады? Кәсіби ақын болмағаннан кейін арнайы өлең жазбайтын шығарсыз деп ойлаймын?
– Әрине. Көп сөз шеше алмайтын, жаныңа жәй таптырмайтын жағдайда бір шумақ өлең барлық сұраққа жауап тауып жатады.
Әңгімемді мысалдармен тұздықтап отырайын. Отбасылы болып, баспанаға қол жетіп, біріміздің қуанышымызды біріміз риясыз тойлайтын жас кезімізде әзіл әңгімеге ренжіп, бір лауазымды жұмыстағы жолдасым дастарқаннан тұрып кетті. Көп жылдар өткен соң сол жігітпен кездесіп қалып, бірталай уақыттан бері көкейде жүрген мынадай екі шумақ өлеңімді оқыдым:
Дастарқаннан тұрып кеткенің,
Алдағы асты тепкенің.
Ауыртпалығы ақ дәмнің,
Мойныңа түсті тек сенің.
Жылжыған жылдар көрсетті,
Жеңгенін ниет мансапты.
Жүрермін талай, жігітім,
Есіңе салып сол сәтті.
Өлеңді естіген жолдасым абдырап, не айтарын білмей, мұңайып отырған соң, аяқастынан мынадай тағы бір шумақ туа кетті.
Көре алмай көптен, қинадың-ау деп
сөкпегін.
Жолдасым ғой деп, көңілдің кірін
төккенім,
Білемін енді, жаңадан жолдас таба
алман,
Есіңде болсын, келмейді сені жек
көргім.
– Достарыңызға разы болғанда шығарған жыр жолдарыңыз да бар шығар...
Бәріміздің басымызды қосып, ортамыздың сәні болып жүретін Мұрат деген әлеуметшіл досыма қатты разы болып:
Кінәмшіл, сыншыл болмадық елдің ұлдары,
Өкпесіз өтті өмірдің талай жылдары.
Амандық тілеп, жарасып әзіл-назымыз,
Бар болғайсыңдар Мұраттың Әди,
Алдары, – деген өлең арнадым.
Достарыма арнап жазған мынадай тағы бір өлең есіме түсіп отыр.
Көпшілікті аңсайды екен қайсы адам,
Мен достардың арасынан жай табам.
Айрылысарда құлазытып көңілім,
Асығамын кездесуге қайтадан.
Кейде табиғат пен уақыттың кейбір сәттері түрлі ойларға жетелеп жатады. Бірде ауылға бардым. Күн бата, есік алдындағы орындықта отырмын. Ай жарық. Аспанды жұлдыз жаулаған. Тым-тырыс. Ерекше әсер берер сәт. Ойыма мынадай шумақ оралды.
Күн кешкіріп, түн оралып, қайтадан,
Дүние тыныш, мен де, міне, жай табам.
Тек аналар бітпей ісі жүр әлі,
Бірі ас үйде, бірі бесік шайқаған.
Өлеңдерімнің талайы – экспромт. Кей-кейде өз-өзінен суырылып шыға келетін шумақтар да болады. Бірде қазақтың атақты композиторы Илья Жақановтың алдында інілікке салып, ағамның әнін орындадым. Ағамыздың «Жайлаукөл кештері», «Еділ мен Жайық» сияқты көпшілікке танымал біраз әндерін домбырамен айттым. Сонда жұбайым: «Илья ағаның әндерін өзі сияқты әуезді айта алмаған соң, ол кісінің алдында ән айтуға ұялмайсың ба?» – деп айтып қалды. Сол кезде мынадай шумақ туды.
Ақындарға өлең оқып, әншілерге ән айттым.
Ұнатпаған кескіндерін, көре жүре талайдың.
Десе деймін, әнші, ақын емеспін,
Ақынжанды азаматпын, ән айтуды қалаймын.
– Сіздің жан-жағыңызға дос-жолдас жинайтын қасиетіңізді жұрттың бәрі біледі. Сондай жолдастарға арнаған тағы қандай өлеңдеріңіз бар?
– Қызмет барысында жолдастарыммен көптен бері кездесе алмай, біріне телефон соқтым. Қарбалас шаруамен жұмысбасты болып, бір-бірімізден хабар алуды қойдық қой, батысқа ат басын бұрмайсыңдар ма деп базына айттым. Бірер күннен кейін жолдастарым Оралға жиналды. Арасында атақты мұнайшылар Ұзақбай Қарабалин мен Балтабек Қуандықов, белгілі геолог Серікбек Дәукеев бар. Барлығы да сұраулы көзбен қарайды, не себеппен басымызды қосты екен деп. Содан басқосудың себебін сұрай бастады. Сосын себебін айттым.
Шақырғам жоқ берейін деп,
Жоқ болмаса, алайын деп.
Жаны жақын ағайын деп,
Сағынған соң көрейін деп.
Аз-кем бірге жүрейін деп,
Әзіл айтып, күлейін деп.
Қысқа өмірім азайды-ау деп,
Кей түндерде үрейім көп.
Осыны естігеннен кейін-ақ достарым жайылып сала берді. Отырысымыз да жайнап кетті.
– Білуімізше, сіздің туған күніңіз халықаралық Білім күні – 1 қыркүйек. Жеңгеміздің де туған күні күздің алғашқы жұлдызы. Бір мектепте, бір класта оқыған екенсіздер. Ақын да, ақынжанды адам да махаббат тақырыбын айналып өтпеген. Жеңгеміз Ырысқа өлең жазбадым деп айта алмайтын шығарсыз...
– Айтқаның рас. Жұбайыммен бірге өстік, бірге оқыдық, бір ауылда тұрдық. Талай өлең жазғам. Бірақ көпшілігі әр дәптерде, әр парақта қалды. Әліге дейін естен кетпейтін мынадай екі-үш шумақ бар.
Сен мені білесің бе, жоқ білмейсің,
Кейде текке ренжіп, өкпелейсің.
Бірақ кейде байқамай, теріс бассам,
Көрмейтіндей кінәлап, сөкпегейсің.
Менің жаным өзіңдей нәзік, таза,
Абайсызда жазықсыз жаралама.
Одан да есіңе түсір келген шақты,
Мектебіңе жаңадан қара бала.
Сол күнімді бір сырды сезген, ұмытпан,
Бір-біріміз қарасақ, көзбен ұққан.
Болашақтың бақытын сенен көріп,
Қарай берген ұрланып өзге жұрттан.
Аққуындай айдынның жүзген жалғыз,
Бойжеттің көз алдымда өсіп әр күз.
Жүрсем де бір класта сені еншілеп,
Сен көріндің қол жетпес тәкаппар қыз...
Осы өлеңнің соңғы шумағы былай жалғасады:
Бір күні кетсе болып жаным пида,
Жалғызымсың, жарымсың бұл пәнида.
О дүниеде жүрермін сені күтіп,
Кластасым, ғашығым – Тұрғарина.
– Әкеден жастай қалып, өмірдің қиыншылықтарын көргеніңіз бар. Бір құрсақтан өрбіген он бауырыңыздың үлкені ретінде біраз жауапкершілік сіздің мойныңызға түскенін білеміз. Сол қиыншылықтардың шет жағасын естіп те жүрміз. Атаңыз Ізмұхамбет Уфадағы атақты Ғалия медресесінде оқыған, сауатты кісі болғаны жөніндегі деректерге де қанықпыз. Әкеңіздің қазасын көтере алмай, ізінен атаңыз да кетіпті. Өмірдің мұндай сынақтары өлеңге арқау болмай қалмаған шығар...
– Өмірде орнымды табуда маңызды рөл ойнаған жас кездегі тағдыр-тарихым төмендегі мына шумақтарда.
Жыладық та, жығылдық та, біз бірақ
Құламадық терең құзға құлдырап.
Ердік, сендік, ерінбедік, ұмтылдық,
Болашаққа сағым болған бұлдырап.
Ауыр өмір бізге ерте басталып,
Әке кетті қара жерді жастанып.
Он баланың кішілері жас сәби,
Ата тұрды сақалына жас тамып.
Тұрды ойланып, нұрлы жүзін түнерте,
Бүлдіршіндей қалай алар күнелте?
«Cоғыстан да аман келген, қарғам-ай,
Шамшырағың неге сөнді тым ерте».
Басын сүйеп талай жанды жұбатып,
Ала алмады жастан көзін құрғатып.
Сөнді ақсақал көтере алмай қайғыны,
Кете барды тағы бізді шулатып.
Әрең жүрді сол күндері Ана да,
Сүйреп бақты бізді ағайын, аға да.
Кей кездері жоқшылыққа шыдамай,
Ойланушы ем оңаша қап далада.
Жылдар өтіп, біз аяққа нық тұрдық,
Жақсылықты талай жанға жұқтырдық.
Ұмтылыстың, адал еңбек, сенімнің,
Күштілігін айналаға ұқтырдық.
– Ауыр болса да әдемі жазылған өлең екен...
– Жазған өлеңдерімді кәсіби ақындарға көрсетіп, мынаны түзеп бер, газетке берейік, кітап шығарайық деген емеспін. Мектеп жасында кейбір газетке шыққаны болмаса, саналы ғұмырымды өлең жазам деп бәлсінгенім жоқ. Жазғандарымды достарымның алдында сөз арасында оқимын, бірақ жалпақ жұртқа көрсеткенім жоқ. Бұған дейін публицист, жазушы, біраз жылдар сыйлас араласқан досым Мереке Құлкенов бірнеше өлеңімді әңгіме арасында жазып алып, 50 жасқа толғанымда дастарқан басында оқыды.
– Мектеп жасы деп қалдыңыз. Оқушы Бақтықожаның өлеңдері газетке жарияланды ма?
– Үйде сегіз қыз, екі ұлмыз. Інім киноға барғалы жатсам, мені алып кет деп қоймады. Оны алып кетейін десем, киноға кішкентай балаларды кіргізбейді. Алып кетпейін десем, көңілін қимаймын. Киноға үлкейген соң апарамын деп түсіндіріп едім, ақылымды алып, үйде қалды. Сонда аяқ астынан «Ініме» деген өлең жаздым. Алғашқы өлеңім осы. 6- сыныпта оқып жүргенімде «Қазақстан пионері» газетінде жарияланды.
Өссең де өзімменен бой таласып,
Көрмедің ақыл берсем, тайталасып.
Сол үшін жақсы көріп, әркез сені,
Қарсы алам, құшағымды айқара ашып.
Мектепте жазғандарым да әр дәптердің қойнында қалды. Кейде көңіл қалағанда газет-журналдарға жіберіп тұрдым. Өлеңдерім бірнеше республикалық және облыстық баспасөзге шықты.
Кейбір ақындар барлық өлеңдерін жатқа оқиды. Елге белгілі «Аппақ гүлдер» әнінің сөзін жазған, көп жылдары оңтүстікте мұнай базасының бастығы болған марқұм Қуаныш Төлеметов барлық өлеңін жатқа білетін. Спортқа да бейім еді. Волейбол ойнайтын. Бильярдта да шаң жуытпайтын талантты адам еді. Адаммен сөйлескенде де бауырмалдығы алыстан есіп тұратын.
– Адамдардың бойындағы қандай қасиетті жек көресіз?
– Адам бойындағы жақсы және жаман қасиеттерді Абай атамыздан артық ешкім айта алмайды. Дегенмен, әр адам өмірден ақ пен қараны ажырататын, жақсы мен жаманның парқын айыратын тәжірибе жинайды. Мен жаман көретін қасиеттердің бірі – сараңдық.
Мырза жанның көңілі кең, жолы ашық,
Айналасы тұрар ылғи толасып.
Сараңдардың, сөзім артық болмасын,
Секілді үйі бөлек тұрған молашық.
– Өмірлік ұстанымыңыз...
– Бүгін бар дәулет ертең жоқ,
Орынсыз асып-таспағын.
Бақ қонса басқа кездейсоқ,
Қалмай да білер қас қағым.
– Ән айтатын өнеріңіз анаңыздан жұғыпты. Ал ақындық пен ақынжандылық қасиетіңіз қайдан келді? Кімге қарап бой түзедіңіз?
– Әкем әдебиетші болды. Әкемнің інісі журналист еді. Мектепте журналист болам деп жүрдім. Оның үстіне, атам Ізмұхамбет Кеңес өкіметінің қаһарына ұшырап, біраз жыл жер аударылып жүрген кісі. Елді, ағайын-туманы сағынғанда жазған талай өлеңі үйде әліге дейін сақтаулы тұр. Жастайымыздан қазақ әдебиетін сүйіп оқыдым. Ақындардың өлеңін жаттап өстік. Өлеңдерім облыстық газетке атыраулық ақын Аманқос Ершуев, Төлеген Берішбаевтармен бірге шығып жүрді. Олардың жазғандарын қызыға оқып, мен де газетке жазып жіберем. Ол кезде Аманқос студент, Төлеген екеуміз көрші ауылдардағы мектептерде оқыдық. Бір-бірімізді танымасақ та, соларға еліктеп өлең жазатынмын.
– Біраз өлеңін жатқа білетін өзіңіздің сүйікті ақыныңыз Төлеген Айбергеновпен Башқұртстанда кездесіпсіз. Қалай болып еді?
– 1966 жыл. Мұстай Кәрім бастаған башқұрт жазушылары Қазақстан қаламгерлерін қарсы алды. Арасында Төлеген Айбергенов бар. Ол кезде мен Уфа мұнай және газ институтының студентімін. Кездесулердің бірінде сахнаға шығып, өзімнің өлеңімді оқыдым. Кездесу аяқталған соң Төлеген Айбергенов мені шақырып алды. Жөн сұрасты, мен «ақын болмайтынымды білемін, бірақ өлең жазғанды жаным сүйеді» дедім. «Техникалық оқу орнында оқып жүрмін деп, өлең жазуды тастама. Өлең жазған адамның жаны нәзік болады, жаны нәзік адамның ары таза болады», – деп өсиет етіп еді.
– Геологтың жұмысы ауыр. Ыстығы бар, суығы бар. Мамандығыңызға қатысты жаздыңыз ба?
– Жазған жоқпын. Айналамдағы адамдар туралы, өмір жөнінде толғандым. Мектеп кезінде біраз жаздым. Университетте ақындардың өлеңдерін оқып жүрдім, көп жазған жоқпын. Бертін келе де біраз уақыт жазбадым. Тиіп-қашып, ара-тұра шимақталған шумақтарды есептемегенде.
90-жылдардың екінші жартысында Өскеменге барып, Алтайдың аялы әсем табиғатының аясында демалып, шығармашылық шабытым ашылғандай болды. Белгілі жазушы Оралхан Бөкейдің мұражайына бардым. Апасы мұражайдың директоры екен. Үлкен әсермен қайттым.
– Домбыра мен гитарада ойнайтыныңызды білеміз. Баян да тартады деп естіп едік...
– Мен домбырашылардың елінде өстім ғой, басқа-басқа, домбыра тарта алмау, домбыраны түсінбеу маған ұят емес пе? Мектепте баян да тарттым. Ауылдың жалғыз баяншысы едім. Ауылда өтетін той атаулының барлығына қатысып, өнер көрсететінмін. Мектеп бітірген соң, қолым баяннан шығып кетті. Ал домбыра мен гитарада бүгінгі күні де бір кісідей ойнай аламын.
– Анаңыз елге белгілі күйші екенін білеміз. Музыкаға деген қабілетіңіз анамыздан дарыса керек...
– Анам Әсімә қазір де елде, Атырауда тұрады. Жасы 85-тен асты. Күйші Дина Нұрпейісованың бірнеше күйін үнтаспаға түсірген. Мысалы әйгілі «Әсемқоңыр» менің анамның орындалуымен жазылды. Сол кісінің ықпалы болса керек, бір құрсақтан тараған барлығымыз да музыкаға жақынбыз, барлығы да ән салады, түрлі аспаптарда ойнайды.
– Ақындықты кәсіп етпесеңіз де, тәп-тәуір өлеңдеріңізге қарап, ақын емес деп ешкім айта алмас. Бірақ өзіңізді ақын емес, ақынжандымын деп есептейсіз. Неге?
– Қазақтың ұлы ақыны Фариза Оңғарсынованың туысқан інісімін. «Кез келген ақымақ әуре болып, қайдағыны шатпақтап, жұрттың басын қатырады» деп Фариза апамның өлеңді шала жазатындарға ұрсатыны бар. Фариза апам сияқты кісілердің алдында қалай ақынмын дейсің, ақын емес екенім айдан анық. Өзімді ақын емес, бәлкім ақынжанды болармын деп ойлайтыным да сондықтан. Мен үшін жыр – жанымның жалауы, көңілімнің қалауы. Қуансам да, қиналсам да ақындардың кітаптарынан жүрегіме керектің бәрін де табамын.
– Біраз ақын-жазушылармен араласасыз. Оның арасында өзімен бірге қазақ поэзиясының бір керегесін алып кеткен Қадыр Мырза Әлі ағамыздың намазында «Шағын тұлғасына алып талант сыйғыза білген адам еді» деп сөз сөйледіңіз. Марқұм ақын ағамыз туралы не айтса да жарасады, десе де, осы бір сөйлемге сыйғызған мінездемеңіз өте сәтті шыққан сияқты...
– Қадыр ағамен талай кездесіп жүрдім, жанымыз жақын еді. Ол маған өз өлеңдерін оқиды, мен ол кісінің өлеңдерін жатқа оқып, өз өлеңдеріммен жалғастырамын... Қазақ әдебиетінің ұлы да текті тұлғасын соңғы сапарға шығарып салу рәсімінде өлеңдерін кішкентайымнан жата-жастана оқитын Тұманбай ағамның жалғызсырап, құрдасының қазасы жанына қатты батып тұрғанын байқап, поэзия алыбына көңіл айттым. Сондай-ақ қазақ әдебиетінің бүгінгі көрнекті өкілдері Әбдіжәміл Нұрпейісов, Әбіш Кекілбаев, Шерхан Мұртаза, Дулат Исабеков ағаларымның шығармаларының орны бөлек.
Менің шатпақтарымды талай оқыған Зейнолла Қабдолов ағамыз еді. «Айналайын, Бақтықожа, мына дүниелеріңді маған берші, жариялатайын» деп талай айтты. «Аға, мен ақын емеспін ғой, бар болғаны ақындардың оқушысымын» деп қашқақтасам да, бір реті келгенде жинақтап берермін деп жүргенмін, сұм ажал Зекеңді де сексеніне жеткізбей алып кетті. Ақын-жазушылар қайтыс болса, неге екенін қайдам, маған ерте қайтқан сияқты көрінеді де тұрады. Жаны жақын, сыйласқан ағаларымыздың арамыздан ажырауы жаныма қатты батады.
– Өмірде және өнерде кімді ұстаз санайсыз?
– Тағдыр жазып, алыс және жақын шетелдерде Елбасы өткізген кездесулер мен келіссөздерде болдым. Сол сәттерде Елбасының қазақ әдебиетін ғана емес, әлемдік әдеби классиканы да жете білетініне және сәтті қолданатынына куә болдым. Ал өмір мен саясат жолында ұстаз санап, үлгі тұтарым – Нұрсұлтан Әбішұлы Назарбаев.
– Бақтықожа Салахатдинұлы, шын көңілден ашылып айтқан әңгімеңіз үшін сізге көп рахмет!
Әңгімелескен Темір ҚҰСАЙЫН.
____________________________
Суретте: көңілдің кейбір кездері.