Жол құрылысы ұзаққа созылуда

Соңғы жылдары жолдары шұрқ-тесік күйге түскен қалалардың бірі – Орал. Мұнда бір шұңқырдан қа­шып автокөлігін көлбете айдаған жүр­гізуші үш шұңқырға барып соқ­тығады. Осы орайда, қала көше­леріндегі жолдарға күрделі жөндеу жұмыстары жүргізілмейді десек, шындықтан алшақ кетіп қалармыз. Жүргізіледі. Бірақ тендерді жеңіп шыққан мердігер ұйымдардың жайбарақаттыққа салынуы салдарынан бұл істер тым ұзаққа созылып кетіп жүр. Тіпті, облыс орта­лы­ғында бұдан екі жыл бұрын бас­тал­ған көше құрылыстарының әлі күнге дейін аяқталмай келе жат­қан­дары да бар. Мұның бәрі таңғал­дырады. Осы аралықта кезінде осы жұмыстарды қолға алған бұрынғы мердігерлердің іздерін суытып кету көріністері де кездесіп қалып жүр. Мұның бас­ты мысалы олардың орнына жаңа мердігерлердің келуі деуге болады. Биыл Орал қаласында көше құры­лыстары бұрынғы жылдармен са­лыс­тырғанда әлдеқайда ерте бас­­талды. Оны сәуір айының ішін­­де қолға алу тәжірибесі, сірә, өңір­дің арғы-бергі тарихын­да болып көр­меген шығар. Биыл дәл солай болды. Бұған сәуір­дің ақ таңы кезінде барша батыс­қазақ­стандықтар е, бәсе, осылай болуы керек еді ғой деп кәдімгідей риза­­шы­лықтарын білдірген еді. Алай­да, қазіргі күндері олардың көк­тем­дегі көтеріңкі көңіл күйлері су сеп­кен­дей басылып қал­ғаны да анық. Мұның басты себебі күрделі жөндеу жұмыстарының ұзаққа созы­лып келе жатқаны десек, қате­лес­пейміз. Әсіресе, бүгінгі күні қала­ның бас даңғылы – Достықтың бойын­да жолды пайдалануға бе­ру мер­зімін кешіктіріп отыр­ған «АзияТехСтрой» ЖШС құрылыс­шы­ла­рының жұмысы мандымай-ақ қой­ғаны көзге айқын көрінеді. Абай ата­мыз «Баяғы жартас – бір жартас, қаңқ етер тіпті байқамас», деп осындай­ды айтса керек. Мүм­кін олар жұмыс сапасына бірінші кезек­те мән бергендіктен, күрделі өндіріс­тік тех­нологияларды қол­дануға ұзақ уақыт кететіндіктен кестені созып алған шығар. Бұлай деудің де ешқандай қисы­ны жоқ. Қалай дегенде де қала өте күр­делі инженерлік жүйе екен­іне ешкім талас туғыза алмайды. Соның ішінде құбырлар жүйе­сіндегі құдықтарды жөндеу ісінде ала-құлалық басым екендігі белгілі болып отыр. Сонда қалай болса солай, немкетті, сапасыз жұмыстар қабылданып кетсе не болмақ? Қо­мақ­ты қаражатты желге ұшыру деген осы емес пе? Бұдан кім ұтады? Кім ұтылады? Оның арғы жағы айт­паса да белгілі емес пе? Аталған құрылыстың ұзаққа созы­лу құбылысы мен көрінісі об­лыс­тық және қалалық әкімдік ғи­ма­раттары орналасқан тұста, ашы­ғын әрі анығын айтқанда, қала және облыс әкімдерінің тұп-тура көз­дерінің алды мен иектерінің астында орын алуда. Сонда қаланың шет жа­ғындағы жұмыс ырғағының мүл­дем қозғалмай қалмасына кім кепіл? Қазіргі қолда бар деректер «АзияТехСтрой» ЖШС жөн­деу жұмыстары кестесінен он екі па­йызға, яғни жиырма күнге кейін қалып қойғанын көрсетеді. Бұл тұр­ғыда қала көшелерін жөн­деу­ге басты сұраныс беруші КПО б.в. компаниясының өкілі Самат Сәр­­сенғалиев аталған құры­лыс компания­сына ұзаққа созып жүр­ген салдыр-салақ істері үшін айып салғанын мәлімдеді. Ал өкілі Артур Қабдығалиев болып табылатын «Балтемен» ЖШС іске шұғыл қарқын туғызбаса, оның жағдайы бұдан да ауыр болатын түрі бар. Яғни, Орал қаласының әкім­дігі қаланың жаңа шағын аудан­дары­н­дағы жол құрылысы ісін ақсатқаны әрі оны сапасыз жүр­гізгені үшін мер­ді­гер­ді сотқа бере­тін түр танытса, бұ­ған таңғалу­дың ешқандай жөні жоқ. Биыл Орал қаласындағы он төрт көшені күрделі жөндеуден өткізу көзделген. Бұл жаңадан жиырма шақырым жол салына­ды деген сөз. Аталған ауқым­ды іс КПО б.в шетел­дік компания­сының Орал өңі­рін­дегі әлеуметтік жоба­ларға бөлетін қара­жаты есебінен қаржы­лан­ды­рылған. Алдағы кезде іс алға жылжып, аталған мер­ді­гер ұйым­дар жұмыс сапасын көтеріп, кес­теде көрсетілген мер­зімді қуып жете ала ма? Әзірге бұл сауалға бір­жақ­ты жауап қай­тару қиын-ақ. Бұған уақыттың өзі төреші болмақ. ОРАЛ