Жуырда Жамбыл облыстық қазақ драма театрында жазушы Көсемәлі Сәттібайұлының «Елгезек Бағдаршам, Тоқ-Қуат және басқалар» деп аталатын ертегі-хикаятының желісі бойынша бүлдіршіндерге арналған жаңа қойылымының премьерасы болып өтті.
Шығарма бойындағы көркемдік сахнада әртістер шеберлігімен астасып, қойылым тұсаукесері сәтті шықты. Бала қиялын нәзік сезіммен шебер жымдастыра білген автордың ойын қоюшы-режиссер Анар Сағымбекова сахнаға шашау шығармай алып шыққан болса, қоюшы-суретші Рахат Сапаралиева сахнаны бояуы қанық суреттермен әсем безендірген екен. Рөлдерді сомдаған әртістердің костюмдері мен сахна декорациясы өзара үйлесіп, балғын көрермендерді баурай түсті.
Сонымен, Мәкіш әжейдің немересін жол қиылысында көлік қағып кетіп, ауруханаға түсіп қалған соң, Төлен шал басшыларға қайта-қайта барып жүріп, көшеге Бағдаршам орнаттырады. Бұрын зауыт жұмысшыларының қолынан шығып, қорап ішінде жатқан Бағдаршам кең көшеге келгенде «есін» бірден жинай алған жоқ болатын. Дегенмен ақылды Тоқ-Қуат келіп, кеңес берген кезден бастап ол айналасын «тани» бастайды. Көшедегі түрлі адамдар мен жан-жануарларды көріп, ненің жақсы, ненің жаман екенін түсінген елгезек Бағдаршам Мамақаз және оның Қазмойын, Аққанат, Ақмамық сияқты балапандармен танысады. Аусар-Алмастың бұзақылығынан жаны түршіге шошыса, тіл табысып кеткен жаңа достарының қылықтарына сүйсінеді. Сахнадағы оқиға аусар Алмастың елгезек Бағдаршамның «көзін» таспен атып, сындыруымен шиеленісе түседі.
Жеткіншектер қызыға тамашалаған қойылымда жас актерлер Ғазиз Сұраппаев (елгезек Бағдаршам), Жасұлан Қамбатыров (Тоқ-Қуат), Шапағат Ерғазиева (Мамақаз), Мақпал Құдайбергенова (Аққанат), Гүлдерай Әлімқұлова (Ақмамық), Жұлдыз Олжабаева (Қазмойын), Жандар Қырықбаев (Төлен шал), Ерсін Қалыбаева (Мәкіш әже) және Сұлтан Омаров (аусар-Алмас) ата-аналар мен балғын көрермендер көңілінен шықты.
Қорыта айтқанда, балаларға арналған «Бағдаршам» спектаклі сәбилерге бағыт-бағдар көрсетумен бірге бүлдіршіндер жанына рухани-мәдени тұрғыдан азық та болды. Демек, жазушының жақсыдан үйрену керектігін алға тарта отырып, жаманнан жирендіретін ертегі-хикаяты қойылым ретінде де сәтті шықты, демекпіз.
Ардақ ҮСЕЙІНОВА. Жамбыл облысы.