Былтыр Астанада өткен «Нео-фольклор» атты республикалық конкурста шарбақтылық Галина Воронкова екінші орын иеленді. Қазір шебер басқаратын «Золотое руно» жеке кәсіпкерлігі ЭКСПО-2017 көрмесіне киізден жасалған ұлттық кәдесыйлар жасауда.
Галина Воронкова аудан орталығы – Шарбақты ауылында тұрады. Кәдімгі қой жүнін іске жаратып, қазір өзінің қолөнер шығармашылығына пайдалануда.
Иә, айтса айтқандай, киіздің қыр-сырын апа-әжелерміз білген ғой. Ғасырлар бойы киіз басып, жүн иіріп, оны далалық таңғажайып іскерлікпен кәдеге жаратып отырды. Киім және аяқ-киім өндірісінде қазір табиғи материалдар сұранысқа ие. Өйткені, бұл киімдер денсаулыққа қауіпсіз, теріге жағымды, суық күндері бойды жылытады. Әттең, әлі де қыр-сырына тереңірек үңілмей жүрміз. Бренд деп шетелдік киімдер іздейміз.
–Киіз шексіз мүмкіндіктерге ие. Одан барлық өнім түрлерін жасауға болады. Экологиялық таза өнім. Денсаулық үшін пайдалы. Отандық өнім. Мысалы, Еуропада табиғи материалдардан жасалған бұйымдар сұранысқа ие, – дейді Галина Воронкова.
Сондықтан, киіз өнімдерін іске жарату жайлы бизнес-идеясын жүзеге асыруға облыстық кәсіпкерлік палатасы аудандық филиалы көмекке келді. Галина Николаевна алдымен «Бизнес-кеңесші» курсынан өтті. Одан кейін «Золотое руно» жеке кәсіпкерлігін ашты. Шағын кәсіпкерлігін дамыту үшін осы салаға бөлінген 3 миллион теңге грантты ұтып алды. Негізі, кішкене күнінен қолы шебер қыз кейін осы көркемсурет саласы бойынша білім алады. Облыс орталығындағы Еуразиялық инновациялық университеттің «Дизайн» бөлімінде білімін жетілдіреді. Қазір жеке кәсіпкерлік иесі киізден киім-кешек, аяқ киім, кәдесыйлар, ойыншықтар мен түрлі әшекей бұйымдар жасайды. Материал көлемі жеткілікті болса, өндіріс көлемін ұлғайтып, жаңа бұйымдар даярлау технологиясын үйренуге әзір. Г.Воронкова тігетін киізден жасалған бұйымдар аудан, облыс бойынша үлкен сұранысқа ие. Отандық, ауылдық өнім деген ой енді-енді санаға ене бастағандай. Шетелдіктердің не үшін қызығатынын түсінгендейміз. Киізден жасалған бұйымдарына сұраныс көбейген соң, шебер енді өндіріс орны мен өткізу нарығын кеңейтпекші.
– Бәсекелестік бизнеске серпін береді. Киізден бұйымдар жасау, киімдер тігу қазір кәсібіме айналды. Ал, ауыл фермерлері болса, қой жүнін қайда өткізерін білмейді. Бәленбай тонна жүн қоқысқа тасталмауы керек, – дейді Галина Николаевна. – Екіншіден, ауылдарда меринос тұқымды қой көптеп өсірілсе, онда біз сапалы жүнді Қырғызстаннан сатып алмас та едік. Жүнді бояу да оңай емес. Өйткені, бояу қымбат. Қой жүні таза болуы үшін, оны жуып, тазалайтын өндіріс болу керек, – деп тағы да бір ой тастап қойды.
Кәсіпкер әйел жүнді тазалап, сұрыптайтын құрылғы сатып алды. Бұл құрал күніне 8 келіге дейін жүнді тазалап сұрыптайды екен. Тапсырыстар аз емес. Солтүстікте қыс суық, қар қалың. Галинаның пималарына сұраныс үлкен. Балалар пимасы – 5 мың, үлкендердікі 10 мың теңге тұрады. Және жай жасай салмайды, пималардың сыртын өрнектеп, әсемдейді. Пима жасау қол жұмысы, еңбек осылай табыс әкеледі. Қысқы аяқ киімдер жұмсақ, аяққа ыңғайлы. Әсіресе, кішкентай балаларға арналған әсем пималарға сұраныс жоғары.
– Қой, ешкі жүнінен тұрмысқа қажетті бұйымдарды көптеп жасауға болады. Мысалы, киіз үйлер. Наурыз мейрамын тойлау кезінде киіз үйлерді жалға алу қиын әрі қымбат. Кәсіпкерлерге осы бизнес түрімен айналысуға мүмкіндік бар. Қажет материал ауылда, ұтымды пайдалана білейік, – деді Галина Николаевна бізбен әңгімесінде.
Біз сапар барысында аудан орталығындағы музей үйінде орналасқан «Шебер Мария» клубында болдық. Клуб Г.Воронкованың бастамасымен ашылыпты. Қой жүнінен әшекей бұйымдар, сөмкелер жасалады. Бұл клубқа киіз жүнінен бұйымдар жасауды үйренуге қызыққан ауылдың қыз-келіншектері, оқушы қыздар келеді. Отандық өнімнің ауылдағы шағын цехтан бастау алатынын көрдік. Айтпақшы, ЭКСПО-2017 көрмесіне келушілердің біздің өңірдегі маршруттарының бірі Шарбақты ауданындағы тарихи кесенелерді көрсетуге арналып отыр. Іздегенге – сұраған. Осы кезде Галина Николаевнаға да өз өнімдерін шетелдіктер назарына ұсынуға мүмкіндік бар.
Фарида БЫҚАЙ,
«Егемен Қазақстан»
Павлодар облысы,
Шарбақты ауданы
Суреттерді түсірген
Елизавета ВЕСЛЕНЕВА
