Шымкентте өткен акция енді Таразда жалғасады
Шымкент қаласында Жеңіл атлетика спорт кешенінде Қазақстан халқы Ассамблеясының ұйымдастыруымен Қазақстан Республикасы Тәуелсіздігінің 25 жылдығына арналған «Менің елім – Мәңгілік Ел» республикалық жастар акциясы өтті.
Мерекелік шараға Қазақстан халқы Ассамблеясы Төрағасының орынбасары – хатшылық меңгерушісі Ералы Тоғжанов, Қазақстан Республикасы Президенті Әкімшілігі Басшысының орынбасары Бағлан Майлыбаев, Оңтүстік Қазақстан облысының әкімі, облыстық ҚХА төрағасы Жансейіт Түймебаев, ҚХА және аймақтық Ассамблея мүшелері, қоғам қайраткерлері, этномәдени бірлестіктер мен зиялы қауым өкілдері, жастар ұйымдарының жетекшілері мен студенттер қатысты.
Бір сүйсінетін жайт, жастар акциясына жастардың көп жиналғандығы соншалық, жартысынан астамы сарайға сыймай қалды. Осыған қарап-ақ өрендеріміздің бойындағы жастық жалын, Отанына деген шынайы сүйіспеншілік, патриотизм сезімі айқын аңғарылып тұрғандай еді.
«Байлығым менің, Тәуелсіз елім» деп ән салған 5 мыңнан астам жастың дауысынан алып сарайдың түндігі желпілдеп тұрғандай сезілген.
Салтанатты шарада сөз сөйлеген облыс әкімі Жансейіт Түймебаев: «Тәуелсіздігімізді алған сәттен Қазақстанның тарихында түбегейлі бетбұрыс басталды. Жүргізіліп отырған саясаттың арқасында халқымыз жаңа дәуірге қадам басып, «Мәңгілік Елдің» негізін қалады. Еліміздегі ырысты ынтымақ пен берекелі бірліктің арқасында барлық экономикалық-әлеуметтік салаларда орасан жетістіктерге қол жеткізіліп, халықтың тұрмысы түзелді. Шымкент –жасыл қала ғана емес, жас қала. Сіздердің орта жастарыңыз – 25, көпшіліктеріңіз Тәуелсіздіктің құрдастарысыздар. Жаңа заман, жаңа тарих, жасампаз өмірдің жаршысы сіздер. Елбасы Нұрсұлтан Әбішұлы Назарбаев ата-бабаларымыз аңсап өткен егемендіктің алтын қазығын қақса, еліміздің ұлы арман, мақсат-мұратын жүзеге асыратындар сіздердің буын. Көпұлтты халқымыз ауызбіршілікте болып, бүгінгіден де тамаша кезеңдерге бірге жетейік. Тәуелсіздік – бұл туған жерін, Отанын сүйген әрбір қазақстандық үшін ұлы бақыт әрі үлкен қуаныш. Тәуелсіздіктің 25 жылында ғасырға бергісіз жолдан өтіп, ауқымы жағынан орасан зор табыстарға қол жеткіздік»,– деді.
Президент Әкімшілігі Басшысының орынбасары Бағлан Майлыбаев әлгінде ғана бес этнос өкілінің Шәмші әндерін өз ана тілдерінде жеке-жеке шырқап, соңында қазақ тілінде Отанымыз жайлы жүректің ыстық лүпілі бар әнді айтқандарына сүйінішін білдірді. Бұл – нағыз шығармашылық инновация, дей келіп, Қазақстанда тұратын барша ұлттар мен ұлыстар өкілінің түп қазығы, қамқоры қазақ халқы, қоғамдық келісімге Елбасымыздың өзі ұйытқы екендігін, Мемлекет басшысының жастарға сенетіндігін жеткізді.
«Рухы күшті жастар еліміздің ертеңін нұрлы етеді», деп сөз сабақтаған ҚХА Төрағасының орынбасары Ералы Тоғжанов Тәуелсіздікті тұғырлы ету үшін жұмылған жұдырықтай біртұтас болу қажеттігін баса айтты. Тәуелсіздігімізді баянды етуде Елбасының қажырлы еңбегін атай келе, Қазақстандағы барлық халықтың бір мақсат, бір мүддеге ұйысатындығын сөзіне арқау етті.
Оңтүстік Қазақстан облыстық Қазақстан халқы Ассамблеясы төрағасының орынбасары Ася Мұхамедова 108 ұлт пен ұлыс өкілдеріне алтын ұя болып отырған Оңтүстіктің қасиетін сипаттады. Кезінде қуғын-сүргін көріп, Ұлы Далаға тоғытылған халықтарды қазақтардың өз бауырындай қарсы алып, қамқорлық жасағанын айтқан ол Шымкентте әр түрлі этнос өкілдерінің күшімен салынып жатқан «Қазақ халқына мың алғыс» монументінің мәнін таратты. Ол өз сөзін: «Біз бір халық, бір ұлтпыз. Елбасының қолдауымен Мәңгілік Елге айналамыз»,– деп қорытты.
Салтанатты шарада Елбасына облыс жастары атынан дайындалған үндеу оқылды. «Менің елім – Мәңгілік Ел» республикалық жастар акциясы келесі кезекте Жамбыл облысында өтетіндіктен, «Қазақстан Республикасы Тәуелсіздігінің 25 жылдығына» – «Достижения молодежи «Мәңгілік Ел» к 25-летию Независимости Республики Казахстан» кітабын еліміздің мақтанышы, Олимпиада жүлдегері Жазира Жаппарқұл мен Назарбаев зияткерлік мектебінің оқушысы Берікболсын Сүлейменов көрші облыс өкіліне салтанатты түрде табыс етті. Еліміздің барлық аймақтарында өтетін акция 28 қарашада Астанада қорытындыланып, мәресіне жетпек.
Бақтияр ТАЙЖАН,
«Егемен Қазақстан»
Оңтүстік Қазақстан облысы