Кеше отандық бағдарлама жасаушылар Қазақстанда тіркелген кез келген тауарды жалға алуға мүмкіндік беретін жылдам әрі ыңғайлы «Forent» атты мобильдік қосымшаның тұсауын кесті. Ол қажетті затты табуға ғана емес, тауарды ақшаға жалға беруге мүмкіндік береді.
Жоба мақсаты – қолданушы үшін түсінікті және ыңғайлы отандық қосымшаны жасап шығару болатын.
«Forent» бағдарламасын жасаған Олжас Мұқатаевтың айтуынша, бұл қосымша алдағы уақытта өмірді айтарлықтай жеңілдетеді.
– Қазіргі экономикалық жағдайды ескере отырып, біз шығыны аз, мүмкіндіктері шектеусіз балама ұсынып отырмыз. Біздің көздеген мақсатымыз – осы қосымшаның негізінде кез келген техниканы, автокөліктерді, әдеби кітаптар мен ойын-сауық құралдары, той көйлегі сияқты тауарларды қолжетімді ету. Жаңа онлайн қызмет, әсіресе, жасырын таланттарды ашуда пайдалы болмақ. Мәселен, сіз фотосурет немесе басқа да бір өнерде өз қабілетіңізді сынап көргіңіз келді, алайда кейін бұған ықыласыңыз азайды делік. Ал несиеге немесе үлкен ақшаға сатып алған кәсіби фотоаппаратыңыз үйіңізде шаң басып жатады. Мұндай жағдайда біз клиентке техниканы жалға алуды ұсынамыз, егер сіз бұл іс қолыңыздан келмейтіндігіне көз жеткізсеңіз, оны еш қиындықсыз қайтарып бере аласыз. Сол сияқты шығармасын, бастамаларын насихаттап, таныстырғысы келетіндер проекторға, интерактивтік тақтаға және басқа да қажетті техникаға оңай тапсырыс бере алады.
«Мәселен, тауарды уақытша пайдаланғысы келетіндер қосымшаға тіркелмей-ақ, оның бүкіл мүмкіндіктерін пайдалана алады. Керісінше, егер қолданушы қандай да бір тауарды жалға бергісі келсе, онда ол жаңа қолданушы ретінде тіркеуден өтуі қажет. Біз қосымшаға тіркелген акаунтқа жалға алуға дайын 100 бірегей клиентті сыйлыққа автоматты түрде бере отырып, 100 қоңыраудан кейін келісім арқылы комиссия алатын боламыз», дейді жоба авторлары.
Бүкіл басқа шешімдерден бұл сервистің негізгі айырмашылығы – жалға берушілермен келісім-шарт жасау – қауіпсіз болмақ. Яғни, қолданушының жалға беру тарихы толығымен жазылып, сондай-ақ қолданушылар өз бағалары мен пікірлерін қалдыра алатын болады.
«Біздің еліміздегі тауарларды жалға беруге арналған онлайн бизнес саласында қазір ешкім қызмет жүргізіп отырған жоқ деуге болады. Бұл бірегей жоба тұтынушылардың көңілінен шығады деп сенемін. Алдағы уақытта Астана, Алматы, Қарағанды, Шымкент, Павлодар, Ақтау, Ақтөбе және Орал секілді қалаларда қызметімізді кеңейту жоспарда бар. Келесі жылы мобильдік қосымшаны ТМД нарығына шығаруды жалғастырамыз», – дейді «Forent» мобильдік қосымшасының инвесторы Дәуіт Шайхислямов.
Айнаш ЕСАЛИ,
«Егемен Қазақстан»
АЛМАТЫ