Үшемнің ата-анасы жаңа пәтерге кірді

Газетіміздің жыл басын­дағы сандарының бірінде «Жанар атты кішкентай сүй­кімді қыздары бар Медет пен Қарлығаш Танкешовтердің отбасында  үшемдер дүниеге келді. Пәтерлері жоқ жастар қазір облыс орталығындағы Лермонтов көшесі, 92-үйде орналасқан жатақхананың аядай ғана бөлмесінде тұрып жатыр, алдағы уақытта әкім-қа­ралар  үшемдер тұрған үйге барып, өз көздерімен көріп, ойланар, көмектесер...» деп жазған едік. Міне, бүгін облыс ор­та­лы­ғында тағы бір жаңа тұрғын үй пайдалануға берілді.  Об­лыс әкімі Бақытжан Сағынтаев Наурыз мейрамы қарсаңында үшемдердің ата-анасы Медет пен Қарлығашқа пәтер кілтін тап­сыр­ды.  Әкесі Нұрсұлтан атты ұлды болғанына қуанышты екенін айтса,  Қарлығаш «қазақ дәс­түрі бойынша ұлымызды еркелетіп  Сұлтан деп атаймыз», –деді бізбен әңгімесінде. Немере-шөберелерінің  пәтер алғанда­рын өз көзімен көруге шал­ғай­дағы Малайсары батыр ауы­лында тұратын әжелері де келіпті. Бір күнде үш шөберенің әжесі атанған қарт апамыз Елбасына алғысын айтқан. Тұрғындарды қуантқан 9 қабатты, 168 пәтер­ден тұратын бұл үй мемлекеттік тұрғын үй бағдарламасын жү­зеге асыру шеңберінде салынған екен. Бір айта кететін жәйт,  жаңа үйдің екі подъезі ипоте­ка­лық несиелеу жүйесі бойынша, ал қалған үш подъезі  жалға  беріліпті. Құрылысты В.Мезко бас­қаратын «Құрылыс» және А.Винерцев басқаратын «Стройимпульс» серіктестіктері жүргізіп­ті. Тұрғын үйдің бірінші қаба­ты­нан әлеуметтік-тұрмыстық ны­­сан­дар – дәріхана, аула клубы, диспетчерлік пункт, полиция бөлімшесі орналасқан. Фарида БЫҚАЙ, Павлодар.