Біз біртұтас, бөлінбейтін бірлікті көрсеттік

Ақордада Елбасы Нұрсұлтан Назарбаев Қа­зақ­стан Республикасы президенттігіне кезектен тыс сайлаудың аяқталуына байланысты отандық және шетелдік баспасөз құралдарының өкілдеріне ар­нап баспасөз мәслихатын өткізді. Оны кіріспе сөзбен аш­қан Президент Нұрсұлтан Назарбаев Орталық сайлау комиссиясының алдын-ала берген мәліметіне қара­ған­да Қазақстан Респуб­ли­ка­сын­дағы сайлау құқы бар азаматтардың 90 пайызға жуығы сайлауға қатысып, со­ның 95 пайызға жуығы өзіне дауыс бергенін атап өтті. Мұның өзі қазақ­стан­дық электораттың менің жүр­гізіп келе жатқан саяса­тымды қолдап, оның дұрыс бағдармен келе жатқанын көрсетті. Мен өзімді қолда­ған сайлаушыларға, жақтас­та­рым мен пікірлестеріме ризашылығымды білдіремін, дей келіп: Cөйтіп, бұл дода да өзінің мәресіне жетті. Қазақстан тағы да бір рет төрткүл дүниенің назарын өзіне аударып, ашық, әділ, демократиялық талаптарға сай сайлау өткізді. Бұлар ту­ралы шетелдік және ха­лықаралық ұйымдардан кел­ген байқаушылар жоғары бағалар беріп жатыр, деді. Сонымен бірге, Елбасы БАҚ өкілдеріне де Қазақстан­да­ғы сайлау процесіне қы­зы­ғу­шылық танытқандары үшін алғысын білдірді. Одан әрі Президент журна­лис­тердің көптеген сұрақ­та­рына жауап берді. Алғашқы болып ұлыбританиялық FBC телекомпаниясының журналисі Эккард Сейгар сұрақ берді. Ол Президенттен ал­ды­мыздағы бес жылда қан­дай басымдықтарды ұстана­тын­дығы және Қазақстан­ның дамуындағы негізгі элементтер қандай бола­тын­дығы туралы сұрады. – Президенттік мандат адамға мемлекеттің алдын­да тұрған міндеттерін анық­тау үшін беріледі, – деді Нұрсұлтан Әбішұлы. – Біз­дің елдің дамуындағы эко­но­микалық міндеттерге келетін болсақ, олар анықта­лып, біз 2015 және 2020 жылға дейін орын­да­латын индустриялық-инновация­лық бағдарламаны іске асы­руды қолға алдық. Өзімнің жыл сай­ынғы Жолдауымда мен биыл елді әлеуметтік жаң­ғырту мәселесін алға қойдым. Онда мен азамат­та­рымызды оқытып, маман­дық алу арқылы жұмыспен қамтуды, сон­дай-ақ тұрғын-үймен қамтамасыз ету проб­лемаларын шешу қа­жет­тігін Үкіметке тапсыр­дым. Бұл бағыттар халық­тың толық қол­дауына ие бол­ды. Ал саясат туралы ай­татын болсақ, біз алдағы уа­қытта да ұс­танған бағдары­мыздан ай­ны­майтын бола­мыз. Бола­шақ­та да Ресей Фе­де­рациясы,     Қы­­тай Халық Рес­публикасы сияқ­ты елдермен тығыз ын­тымақ­тас­тықты жалғастыра беретін бо­ламыз. Еуроодақ пен Америка Құрама Штат­тары біздің үлкен әріптес­теріміз болып қала береді. Ал аймақтағы басқа елдермен интеграциялық процестер шең­бе­ріндегі ынтымақтастықтарды жал­­ғастыра беретін боламыз. Елді саяси жаңаландыру бағытын біз одан әрі жалғастырамыз. Заң­ның үстемдігін сот жүйесін тәуел­сіздендіре түсу арқылы нығайта беретін боламыз. Біздің мемлекетіміз алып территориялы, уни­тар­лы ел болса да біз билікті ор­талықсыздандыру бағытын одан әрі жүргіземіз. Келесі сайлаудан бастап біздің Парламентіміз Конс­­титуциямыздың талабына сәйкес көппартиялы болады. БАҚ бостандығы мен тәуелсіздігіне барлық басқа да дамыған елдердегі сияқты ешқандай шек қой­ыл­майды, бұл істе біз өзіміздің батыстық әріптестеріміз бен достарымыздың ұсыныстарын үнемі ескеріп, олармен кеңесіп отыратын боламыз. Сайлау процесі кезінде ұйымдасқан «Қа­зақстан-2020» демократиялық коа­лициясы» ала­ңында біз оп­позициялық партиялар және қо­ғамдық қозғалыс­тармен елімізді экономикалық және саяси тұр­ғыдан одан әрі дамытудың проб­лемаларын тал­қы­лау жөніндегі диалогтарды жал­ғастыруға дай­ын­быз, деді Елбасы. Ресейдің ИТАР-ТАСС ақ­параттық агентті­гі­нің өкілі Свет­лана Тумакова сайлау додасында жеңілген қарсылас­та­рыңызға не айтар едіңіз деп сұ­рады. Нұр­сұлтан Әбішұлы жауа­бын: мен бүгін оларға сайлау до­дасына қатысып, белсенділік көр­сеткен­дері үшін ризашылығымды білдірдім, деп бастады. Алдағы уақытта олар қарсы болмаса, біз өзара ын­ты­мақтаса отырып, құн­ды ұсыныс­тарды бірлесе жүзеге асыруға дайынбыз, дей келіп, Елбасы оп­позициялық партиялар өкіл­де­рі­нің президенттік сайлау­ға қатыс­пағанына өкініш білдіретінін атап өтті. Әрине, бұл әр пар­тияның өзінің қалауы, бірақ біз өз тарапымыздан оларды сай­лау­ға қатысуға шақырдық, деді Президент. Қазақстанның кемел бола­ша­ғын қалай елестетесіз, сол кездегі халықтың әл-ауқаты қай деңгейде болады деген біздің сұрағымызға Елбасы оның «Қазақстан-2030» стратегиясында жазылған дең­гей­де болаты­нына сенім білдірді. Менің бар­лық істеген қызметім өз пешенеме жазылған қазақтың жаңа мемлекетін құруға, оны өр­кениетті елдермен теңестіруге арналды. Біз қираған экономи­ка­ны оңал­дырып, халықтың әл-ауқатын жақ­сартуға қол жеткіздік. Ал қа­зір қолға алып отырған бағдар­ламаларымызды іске асыр­ғанда халықтың әл-ауқаты бұдан да жақсара түседі деп санаймыз. Қазір біз ауылдағы ағайынның жұмыс істеймін дегендеріне ша­ғын несиелер беріп, мамандығы жоқтарына тегін оқыту арқылы мамандық әперіп жатырмыз. Олар­ды жұмысқа орналастыру мә­селесі де күн тәртібінен түспей отыр. Денсаулық сақтау мәселе­сін жақсарту үшін ауылға таза ауыз су жеткізу мәселесін толық­тай шешудеміз. Осындай істердің сәттілік­пен іске асуына халқы­мыз белсенді араласуы керек, сонда қа­зақстандықтардың әл-ауқаты да өркениеттің озық елдері қатары­на жетеді. Одан әрі Нұрсұлтан Әбішұлы жалпы жағдайларға тоқталып өтті. Бүгін әлемнің көп­теген елдерінде қан төгіліп жатыр, ал біз мызғымас бірлікті көрсете білдік. Басқа елдерде сайлау кезінде халық жік-жікке бөлініп, өзара дауласып кетеді, ал біз біртұтас тұрақты­лықты көр­сет­тік, деді Елбасы. «Казахстанская правда» га­зеті­нің тілшісі Лаура Түсіпбе­кованың шетелдердің көбінде дау-дамай болып, кейде қан тө­гіліп жатқанда Қазақстандағы сайлаудың тыныш өту құпиясы неде деп ойлайсыз деген сұ­рағына Н.Назарбаев Мемлекет басшысы елде үнемі жақсы ба­ғыттағы өзгерістердің болып тұрғанын қамтамасыз етуі керек, деді. Бізде ондай өзгерістер көп. Егер біз Қазақстанды постке­ңестік елдермен салыстыратын болсақ, басқа бір елде де біздегідей жақсы көрсеткіштер болған жоқ. Біз ІЖӨ-ні 700 доллардан 9 мыңға дейін жеткізіп, 12 есе өсіре алдық. Еңбекақы 5-6 есеге өсті, экономиканың өсу қарқыны жөнінде мынаны айтар едім: қазір Қазақстан экономикасы ТМД-ға қарайтын барлық Орта­лық Азия мен Қап тауындағы республикалардікін қосқандағы­дан да артық. Біздегі жұмыссыз­дық сол елдермен салыстырғанда ең төмені. Оның үстіне жаңа жұмыс орындары тұрақты түрде ашылып жатыр. Тек қана «Батыс Еуропа – Батыс Қытай» жолы 50 мың адамға жұмыс беріп отыр. 2009 жылы бүкіл әлем­дегі экономикалық дағдарыс шегіне жетіп, жұмыссыздық артып жатқанда, Қазақстан «Жол картасы» бағдарламасы арқылы жаңадан 25 мың жұмыс орнын аша білді. 2014 жылға дейін біз әлі де 160 мың жұмыс орнын ашамыз. Оның үстіне біздің хал­қымыз татулықты жоғары баға­лап, көршілерінің сенімі мен дәстүрлерін сыйлап, өзара төзім­ділікті жақтап отырады. Міне, біздегі тұрақтылықтың құпиясы осында, деді Елбасы. «Хабар» агенттігінің тілшісі Александр Аксютиц оппози­ция­ның сынына қалай қарайсыз деген сұрақ қойды. Кез келген Президентті, соның ішінде үлкен табыстарға қол жеткізіп отырған Президенттің жанында әрқашан­да сын да жүреді. Бұл қалыптағы жағдай, сондықтан мен олардың сынына байыптылықпен қарай­мын. Әділ сыннан қорытынды шығарып, оларды қабылдай ала­мын. Өз тарапымнан мен оппози­цияға: билікке таласқаннан гөрі, елдің жақсы тұрмысқа жетуіне атсалыс­саңыздар дұрыс болар еді деген ұсыныс айтар едім, деді Президент. «Қазақстан» ұлттық телеар­на­сының тілшісі Айбек Қобдабай ауыл шаруашылығына бөлінетін нақты көмектер туралы сұрады. Оған Елбасы 2003 жылдан бері үнемі ауыл шаруашылығына көмек беріліп келе жатқанын, 670 млрд. теңге қаражат бөлінгенін айтты. Ал енді ауыл шаруашы­лығы өнімдерін өңдеуге үлкен көңіл бөлеміз. 52 мал бордақылау пункттері ашылып, оның төңірегінде 2300 шағын бизнес ұйымдастырылады, деді. Мемлекетаралық «Мир» ТК тілшісі Ирина Мұхамадеева Кеден одағының келешегі туралы сұрады. Оған Елбасы жарқын болашақтың тек экономикалық интеграцияда екенін айтты. Ал Кеден одағы – Еуроодақтың үлгі­сіндегі нағыз экономикалық тиімді құрылым. Соның арқасында бір жылда ғана Қазақстан мен Ресей арасындағы сауда айналымы 30 пайызға, Қазақстан мен Беларусь арасындағы тауар алмасу екі есеге артты. Осыны көріп тұрған қандай адам Кеден одағы тиімсіз деп айта алар, деді Елбасы. «КТК» телеарнасының тілшісі Ярослав Красиенко пәтерге қолжетімділік бағытында тағы да қандай істер жасалатын болады деген сұрақ қойды. Оған Елбасы Тұрғынүйқұрылыс­жи­нақ­­банкі­не, екінші деңгейдегі банктер арқы­лы несие беру арқылы пәтер алу­дың жеңіл­детілген жолдарын ай­тып берді. Мәселен, Тұрғын­үй­құры­лыс­­жи­нақ­­банкі­не алатын пә­тер­­дің 50 пайызын жи­нақ­та­саңыз, қалға­нын несие ретінде банк береді. Ал оны пәтерге тұрып алып, жыл­дар бойы төлеп құтыла аласыз, деді Президент. Баспасөз мәслихатының со­ңын­да Президент Н.Назарбаев БАҚ өкілдеріне белсенді қыз­меттері үшін ризашылығын айтты. Жақсыбай САМРАТ.