Күй ордасының күйі болмай тұр...

Тәттімбет таршылық көріп тұр. Қарағандыда осыдан 65 жыл бұрын іргетасы қаланып, ұлы күйшінің аты берілген өнер колледжінің әлі күнге дейін ғимараты жоқ. Колледж көшпенділердің күйін кешуге мәжбүр. Қазір бұрынғы қан орталығында отырған оқу орны осы уақытқа дейін 4 ғимарат ауыстырыпты. Көшіп-қонып жүргенде қаншама аспаптар сынған... Кеңжайлау күйлерді тар бөлмеде мехнатты азаппен бірге тартып отырған өнер иелеріне обал-ақ... Ұстаздар мен студенттердің айтуынша, шырқай ән салып, шыр айнала билеуге құрқылтайдың ұясындай тар ғимарат тіпті де қолайсыз. Музыкалық аспаптарды орналастыру, сахна жасақ­тау, көрермен тарту және ең маңыз­дысы, бір-біріне бөгет жасамай дәріс алу мүмкін емес. Әрі бұл орын өнер кол­леджіне қойылатын сани­тарлық-техникалық, эпиде­миологиялық талаптарға өрес­кел қайшы. Ғимараттың тар дәліздерінде ауыр музыкалық аспаптарды алып жүруді былай қойғанда, екі адамның қатар жүруі де мұң болып тұр. Ал сынып жетпей қалған студенттер осы дәлізде тұрып дәріс алуға, емтихан сынақтарына дайындалуға мәжбүр. Колледж басшылығы тар ка­бинеттерді біріктіріп, кеңейткен. Бірақ әу баста өзге салаға бейім­деліп жасалған ғимараттың жайы келіспей тұр. Тәттімбет атын­дағы өнер колледжі үрмелі аспаптар оркестрінің дирижері Қайыр­жан Қасымовтың айтуынша, дыбыс­тар гуілдеп, шығармалардың таза орындалуына кедергі келтіреді екен. Әрі дәл іргедегі өзге сынып­тардағы сабақтарға бөгет жасайды. Сахна деген атымен жоқ. Есесіне емтихан, академиялық концерттер осында өтеді. Әрине, талапқа сай келмейді. Бірақ басқа амал да жоқ. − Бізде 500-ге жуық студент бар. 19 мамандық бойынша шәкірт тәрбиелеп отырмыз. Театр әртістері, мәдениет қызметкерлері, кәсіби әнші-күйшілер мен кітапханашыларға білім ұстартып келеміз. Бір кем дүние – ғимарат. Осы жағдайда отырып, жақсы нәтижелерге қол жеткізуге тырысамыз. Былтыр сырттан бақылау рейтингісі бойынша республикада Тәттімбет колледжі бірінші орын алды. Біздің де концерт бергіміз, дамығымыз келеді. Бірақ, репетиция жасайтын орын жоқ. Білім басқармасы дыбыс студиясын, интерактивті тақта бермекші. Оны қайда орнатпақпыз? Тәжірибелік сабақтар жатақ­хана­да, қаладағы театрларда өтеді. Биыл колледждің құрылғанына 65 жыл толады. Түйткілді мәселені оңтайлы шешуге облыс басшылығы қам жасап жатыр дейді. Ғимарат беріліп жатса, – үлкен той сол болмақ, – деді колледж директоры, белгілі әнші Мейірхан Адамбеков. Бұл бірнеше жылдан бері шешімін тапай келе жатқан мәселе. Мәжіліс депутаты, «Нұр Отан» фракциясының мүшесі Нұрлан Дулатбеков ғимараттың жағдайы адам шошырлық екен. Бұл Қарағандының мәдени мұра­сы емес пе? Сондықтан, өте өкінішті. Біз мәселені Білім және ғылым, Мәдениет және спорт министрліктерінің алдына қойып, түбегейлі шешуге атсалысамыз. Өйткені, Тәттімбет колледжінің мүшкіл халі бәрімізді алаңдатады. Таяу арада жаңа ғимаратқа көші­рілуі үшін табанды жұмыс жүргі­земіз, деп уәде беріп отыр. Жағдай осылай болса-дағы, соңғы 5 жылда колледждің 40-тан астам студенті халықаралық байқауларда бақ сынап, жүлделі орындардан көрінген. Ән орта­лығын қан орталығынан жаңа ғимаратқа дереу көшірсек, алдағы уақытта бұл жетістіктердің еселене түсетініне күмәніміз жоқ. Мирас АСАН, «Егемен Қазақстан» ҚАРАҒАНДЫ