Чемпиондар лигасы. «Реал» өз алаңында «Наполиден» басым түсті (видео)

Чемпиондар лигасының 1/8 финалында Мадридтің «Реалы» өз алаңында Неапольдің «Наполиін» қабылдап, 3:1 есебімен басым түсті. Матч басталысымен тізгінді өз қолына алмақ болған мадридтіктердің бұл жоспары бірден жүзеге аспады. 8-минутта қақпашы Кейлор Навастың қателігін ұтымды пайдаланған Лоренцо Инсинье шамамен 30 метр жерден гол соғып, итальяндарды алға шығарды. Дегенмен, олардың бұл қуанышы ұзаққа созыла қоймады. 19-минутта Даниэль Карвахальдің әуелеткен добына бірінші болып жеткен Карим Бензема таразы басын теңестіре білді. Кездесудің екінші 45 минутында «Реал» айқын басымдыққа ие болды. 49-минутта Криштиану Роналдудың берген добын Тони Кроос қақпаға дәл бағыттап, алаң иелерін есепте алға шығарды. Арада 5 минут өткеннен кейін Каземиро мергендігімен танылып, матчтағы соңғы допты соқты. Бұдан кейін де таблодағы көрсеткішті өзгертетін мүмкіндіктер болған, алайда бәрі сәтсіз аяқталып жатты. Айта кетейік, қос команданың арасындағы қарымта кездесу 7 наурыз күні Неапольде өтеді.