• 16 Ақпан, 2017

Әсет Исекешев: Астана жаһандық қалаға айналуға тиіс

317 рет

көрсетілді

2 мин

оқу үшін

Egemen Qazaqstan

Мемлекет басшысының Ұлт жоспары – 100 нақты қадамында белгілеп берген тапсырмаларын ескере отырып, 69-қадамға сәйкес, Астана Еуразия кеңістігіндегі маңызды орталыққа айналуы тиіс. Астана жайлы және жаһандық қалаға айналуы керек. Елорда әкімдігі аса өзекті өтініштерді құрылымдап, бар мәселелерді шешу бойынша алдағы 3 жылға нақты шаралар кешенін әзірледі, олар 2016-2020 жылдары Астана қаласын дамыту бағдарламасын түзету кезінде ескерілді. Бұл туралы бүгін елорда әкімі Әсет Исекешев қала халқымен есеп беру кездесуінде мәлім етті. «Біз қаланың әр ауданы бойынша егжей-тегжейлі талдау жүргіздік, «109», «Әкімдіктің бірыңғай электрондық өтініштер жүйесін» талдадық. Менің әлеуметтік нысандарды аралау, аудандар әкімдерінің халықпен есептік кездесулері, Ашық есік күндері және «Нұр Отан» партиясы филиалының желісімен өткен шаралар барысында 50 мыңнан аса сұрақ және өтініш түсті», – деді қала әкімі. «Белсенді азамат-2017» Ашық есік күнін өткізу шеңберінде Астана қаласының әкімдігіне 2845 жазбаша және 2357 ауызша өтініш түсті. Шараға 3312 елорда тұрғыны мен қонақтары қатысты. 30 қаңтар мен 8 ақпан аралығында аудандардың әкімдері Астана қаласының халқымен 22 есептік кездесу өткізді. 6589 адам қамтылды. Түскен сұрақтар/өтініштердің саны – 939, соның 553-і – жазбаша, 386-і – ауызша. Сонымен бірге, әлеуметтік зерттеулер, әлеуметтік желілердегі өтініштерге мониторинг жүйелі түрде жүргізіледі. Барлық салаларда әрбір мемлекеттік органның міндеттері мен мақсаттары анықталған», – деді Әсет Исекешев. «Түзетілген бағдарламаның басты басымдығы – қала тұрғындарының әлеуметтік әл-ауқатының деңгейін арттыру. Бұл бағыттағы жұмыс 2 міндетті шешуге бағдарланады: білім, денсаулық сақтау салаларында көрсетілетін қызметтердің деңгейін көтеру, қоғамдық көліктің жұмысын, экологияны, қауіпсіздікті, тұрғын үй жағдайларын жақсарту, азық-түлікпен қамту арқылы өмір сүру сапасын жақсартуға қол жеткізілмек. Халық кірістерінің өсуіне жаңа экономикалық стратегия арқылы, жеке инвестицияларды тарту, жаппай кәсіпкерлікті дамыту арқылы қол жеткізілмек», – деді әкім.