6 наурыз күні Парламенттің қос палатасы «Қазақстан Республикасының Конституциясына өзгерістер мен толықтырулар енгізу туралы» заң жобасын қабылдаған болатын. Енді Мемлекет басшысы аталған заңға қол қойды.
Орталық коммуникациялар қызметінде өткен баспасөз мәслихатында Парламент Сенатының депутаты, Аграрлық мәселелер, табиғатты пайдалану және ауылдық аумақтарды дамыту комитетінің мүшесі Мұрат Бақтиярұлы Конституцияға енгізілген өзгерістер мен толықтырулардың маңызы мен мақсаттары жөнінде әңгімеледі. Оның айтуынша, жалпы, Конституцияға енгізілген өзгерістер мен толықтырулардың маңызы өте жоғары, себебі, Мемлекет басшысының өз өкілеттіктерін басқа билік тармақтары арасында бөлуінің өзі – сирек кездесетін құбылыс.
Сенат депутаты заң жобасына сәйкес, Парламентке жүктелген жаңа міндеттер туралы айтып өтті. «Бұған дейін Парламент Қазақстан Республикасының заң шығару қызметін атқаратын ең жоғары өкілді орган болса, енді ол заң шығару билігін жүзеге асырады, – деді М.Бақтиярұлы. – Сондай-ақ, Конституцияның 57-бабының 6-тармақшасына енгізілген толықтыруға байланысты Парламент депутаттарының жалпы санының кем дегенде үштен бірінің бастамасы бойынша Үкімет мүшелерінің өз қызметтері жайлы есебін тыңдауға құқылы. Есепті тыңдау барысында депуттардың үштен екісінің, яғни көпшілігінің басым дауысымен республиканың заңдылықтары орындалмаған жағдайда Үкімет мүшелерін орындарынан босатуды Қазақстан Республикасының Президентінен сұрай алады. Мұндай жағдайда Президент Үкімет мүшелерін орнынан босатады деген өзгерістер енгізілді».
Депутаттың айтуынша, конституциялық өзгерістерге сәйкес, енді Үкімет өз қызметі үшін тек Президенттің алдында емес, сонымен қатар, Парламент Мәжілісінің алдында да жауапты болады. «Бұл Парламенттің құзыреті мен жауапкершілігін арттырумен қатар, партиялық жүйенің дамуына кең жол ашады», деді ол.
Айдар ӨРІСБАЕВ,
«Егемен Қазақстан»