«Қазақстанның Үшінші жаңғыруы: жаһандық бәсекеге қабілеттілік» атауымен 31 қаңтарда Елбасының кезекті Жолдауы жарияланды. Өзім тарих пәні мұғалімі болғандықтан, Жолдауды бірден оқып, танысып шықтым. Ауылда тұрғандықтан, мені ауыл болашағы алаңдатады. Жолдауда бірінші басымдықтың төртінші саласы аграрлық сектор экономиканың жаңа драйверіне айналуы керек делінген. Жолдауда «Бес жыл ішінде 500 мыңнан астам жеке үй шаруашылықтары мен шағын фермерлерді кооперативтерге тартуға мүмкіндік беретін жағдай жасау керек», деп жазылған. Елбасының ауыл өніміне үлкен қолдау көрсетуі мені де қатты қуантты. Мен де оқушыларыма ауылшаруашылық өнімін өндірумен шұғылданудың тиімділігін айтып отырамын. Әрбір жеке үй шаруашылықтары заманауи техникамен жабдықталып, мал өсіру, құс асырау, бау-бақша өсірумен кәсіби түрде шұғылданса, сапалы да мол өнім алары анық. Әрі Жолдауда бұдан былай өз кәсібін ашу үшін қалада да, ауылда да 16 миллион теңгеге дейін шағын несие беріледі делінген. Ауылда жеке үй шаруашылығымен айналысса, әрі ауқатты, әрі өз ісінің қожайыны болатынын жастарға түсіндірумен келемін.
Елбасының Жолдауында төртінші басымдық адами капитал сапасын жақсарту дей келе, қала мен ауыл мектептері арасындағы білім беру сапасының алшақтығын азайту керек екендігі айтылған. Сондай-ақ, 2019 жылдан бастап қазақ тілінің басымдығын сақтай отыра, кейбір пәндер ағылшын тілінде оқытылады делінген. Мен де бұл қадамды құптаймын. Үш тілді қатар меңгеру мәселесі біраз жылдан бері айтылып келеді. Сөзден іске көшетін уақыт жетті. Бұл – заман талабы. Біздің мектептің мұғалімдері де біліктілікті арттыру курстарына барып, білімдерін үнемі жетілдіріп отырады.
Соңғы уақытта адамдардың жаппай қалаға көшуі тоқталып, жеке қожалықтар көбейіп, мал, құс ұстап, егін егумен айналысатын шаруашылықтардың саны артып келеді. Дегенмен, ауылымызда әлі де тындырар шаруа жетерлік. Соның бірі ауылдың маңындағы ағып жатқан өзеннің бөгеті бұзылып қалып, суы тартылып қалды. Бұрын ауыл тұрғындары жағасына бау-бақша егіп, мал суарып, балық аулап, жазда ыстықта суға түсіп демалатын еді. Сол бөгет қалпына келтірілмей, ауылдың сәні кетіп тұр. Көгілдір отын жүргізілсе, жастар ауылға тұрақтап, кәсіптің небір түрлерін ашып, жаңадан тұрғын үйлер салынар еді. Әйтпесе, тұрғындардың көпшілігі әбден тозығы жеткен ескі үйлерде тұрып жатыр. Міне, осындай мәселелер шешуін тапса, Елбасының Жолдауында айтылғандай, алдағы уақытта 30 елдің қатарына қосылып, жаңартылған мектебіміз талай шәкірттерді оқытып, тәрбиелеп, еліміздің гүлденуіне өз үлесін қоса берер еді.
Гүлмира АЯНҒАЛИЕВА
Батыс Қазақстан облысы,
Теректі ауданы,
Приречный ауылы