Халықты жұмыспен қамту мен отандық құрылыс материалдарын өндірушілерді ынталандыру мақсатында аталған бағдарлама аясында соңғы екі жыл ішінде автожол жобаларын орындауға 616 млрд теңге бөлініпті. Оның 329 млрд теңгесі Ұлттық қор есебінен қаралған. Ал министр келтірген деректерге сүйенсек, бөлінген қаражат бүгінде толық игерілген.
«Нақтылай түсетін болсақ, бұл қаржыға республика аумағы бойынша 9 жоба іске асырылды: «Батыс Еуропа – Батыс Қытай», «Орталық – Оңтүстік», «Орталық – Шығыс», «Бейнеу – Ақтау», «Алматы – Өскемен», «Астана –Петропавл», «Жезқазған – Петропавл», «Ақтөбе – Атырау» және «Орал – Каменка» жолдарында жұмыс қызу жүріп, жол құрылысымен Қазақстанның 12 аймағындағы 2 мың шақырым қамтылды. Жобаларға еліміздің 75 мың адамы қатыстырылып, материалдардың 90%-ын отандық өндірушілер дайындады. Осы аталған шаруалардың барлығы «100 нақты қадам» Ұлт жоспарының 92-қадамы шеңберінде жүзеге асырылды», – деді Ж.Қасымбек.
Қазіргі уақытта министрлік пен облыстық әкімдіктер бірлесе отырып, республикалық маңызы бар автожолдарда жол қызметінің объектілерін жаңарту жөнінде жұмыстар жүргізуде екен. Мұның сыртында, «Нұрлы жол» аясында 2020 жылға дейін негізгі халықаралық дәліздерде Ұлттық стандартқа сай келетін 260 қызмет нысандарын дамыту көзделуде. Сонымен қатар, бағдарлама аясында іске асырылып жатқан маңызы жоғары жобалардың бірі – Астанадағы жаңа темір жол вокзалының құрылысы болды. Бүгінде құрылыс нысанының әрлеу жұмыстары аяқталып келеді.
«Жаңа вокзал мамыр айында пайдалануға беріледі деп жоспарлануда. Жалпы алғанда, жаңа вокзалдың өткізу қабілеті тәулігіне 35 мың жолаушыны құрайды. Ал қолданыстағы вокзалмен қоса алғанда, тәуліктік көрсеткіш 48,8 мың жолаушыны құрайтын болады. Бұл астаналық жолаушылар ағынына, оның ішінде, халықаралық көрмені өткізу кезінде де, сапалы қызмет көрсетуді толығымен қамтамасыз етуге мүмкіндік береді», – деген министр осыдан 2 жыл бұрын Астана қаласының жаңа терминалын салу және әуежайдың ұшу-қону жолағын реконструкциялау жобасы басталғанына да тоқталып өтті.
«Жоба бойынша жаңа жолаушылар терминалының, тұрақ орындарының құрылысы, инженерлік инфрақұрылым, перронды реконструкциялау және аумақты абаттандыру көзделген. Құрылыс жұмыстарын биылғы жылғы 15 мамырда аяқтау межеленген. Қорыта келе, бұл бағдарламаның қосымша жұмыс орындарын ашуға, құрылыс материалдары, туризм, өңдеуші өнеркәсіп секілді еншілес салаларды дамытуға мүмкіндік беретін қуаты бар екендігін атап өтуіміз керек», – деді Ж.Қасымбек.
Отырыста қосымша баяндама жасаған Мәжілістің Экономикалық реформа және өңірлік даму комитетінің төрағасы Нұртай Сабильянов инфрақұрылымды дамытудың «Нұрлы жол» бағдарламасы аясындағы жеті бағытын іске асыру үшін 2015-2019 жылдарға 5 трлн 300 млрд теңге бөлу көзделгенін алға тартып, оның ішінде тек автомобиль магистральдарын дамытуға 2 трлн 400 млрд теңге жұмсалатынын алға тартты.
«Егер жаңа жобаларға байланысты бұл қаражат көбейетіндігін есепке алсақ, тиімді көлік-логистикалық инфрақұрылым құру бағдарламаның маңызды бағыттарының бірі екеніне көз жете түседі», – деді Н.Сабильянов.
Сондай-ақ, депутат өз баяндамасында Елбасы Жолдауында айтылған тапсырмаларды жүзеге асыру барысында кейбір жекелеген мәселелер бар екендігін де көлденең тартты. «Нұрлы жол» мемлекеттік бағдарламасында ұзындығы 7 мың шақырымнан асатын 11 автожол салу көзделген болса, маңызды көлік жолдарын салу кезінде жобалық шешімдерге салғырт қарау салдарынан жол қауіпсіздігіне нұқсан келуде. Мысалы, бұқаралық ақпарат құралдарында «Қапшағай – Балпық би» автожолының аяқталған учаскесінде Мұқыр өзені арқылы өтетін жаңа көпірдің тұсында Алғабас ауылының маңында жолдың ойылып кеткені туралы ақпарат болды. Бұдан басқа, аяқталған бір ғана «Батыс Еуропа – Батыс Қытай» көлік-транзит дәлізі жобасы пайдаланудың алғашқы жылының өзінде-ақ су ағынына төтеп бере алмай отыр. Жуырда Жамбыл облысында су басу қаупі салдарынан 11 шақырым жол уақытша жабылды. «Орталық – Шығыс», «Астана – Өскемен» маңызды бағыттардың бірінде мердігерлермен болып жатқан даулардың салдарынан конкурстық рәсімдер ұзаққа созылуда. Осындай жағдайларға байланысты министрлік пен құқық қорғау органдары жұртшылықты, тәуелсіз сарапшыларды тарта отырып, пайдалануға берілетін автомобиль жолдарының сапасы бойынша аудит пен ревизия жүргізуі қажеттігі туындауда», – деді депутат.
Өз кезегінде Жеңіс Қасымбек айтылған сын, ескертпелердің барлығы орынды екендігін атап өтіп, олқылықтарды қалпына келтіруде бірлесе еңбек етуге шақырды.
Осыдан кейін жалғасын тапқан тақырыпты талқылау барысында тиісті органдардың өкілдері халық қалаулыларының сауалдарына жауап берді. Ал жарыссөзде «Kazlogistik» Қазақстанның көлік одағының бас директоры Қанат Әлмағанбетов пен «BI Group Construction» акционерлік қоғамының басқарма төрағасы Арман Жәкенов сөз алды. Сондай-ақ, Үкімет сағаты шеңберінде Мәжілістің жалпы отырыс залының фойесінде көрме ұйымдастырылғанын да айта кетейік.
Нұрлыбек Досыбай,
«Егемен Қазақстан»
