Қазақстан халқы Ассамблеясы облыстық филиалы төрағасының орынбасары Сейсенбай Жетпісбаевтың айтуын-
ша, әртүрлі ұлт өкілдерінен құралған жастарымыздың белсенділігі бірінші кезекте Елбасының барша қазақстандықтарды ұлтаралық және конфессияаралық келісімді одан әрі нығайтуға шақырған мақсат-мүддесін одан әрі нығайтуға бағытталуда. Екіншіден, жергілікті Ассамблеяның жас қанатын қалыптастырушы және шығармашылық ұжымдарда ән салып, би билейтін өнерлі әрі басқа да қоғамдық жұмыстарға қатысатын бұл жастар болашақта біздің жолымызды жалғастырушы буынымыз.
Айтса айтқандай, 1 наурыз – Алғыс айту күніне орай өткен мерекеге арналған концертте өзге ұлт өкілдерінің жастары сахнаны керемет шуақты ән мен күйге бөлеп, жиналған жұртшылықты сүйсіндірді. Олар «Анагениси» хореографиялық ұжымы, «Мирас», «Ялкын», «Вир», «Раздолье», «Жаураночек», «Лазарки», «Калыновонамысто», «Дэймокх», «Наири», «ОдларЮрду», «Минги тау», «Анен», «Сеспель», «Эвришим», «Настарин», «Тейбелах», «Авив» және «Анахну», «Нарциз» және «Сырены», «Кардьесапомусики», «Самрук» сияқты орыс, украин, белорус, татар-башқұрт, еврей, чешен, балқар, корей тағы басқа этностардың ән-би ансамбльдерінің өнерлі жастары болды.
Бұл күндері Достық үйінде облыстық 23 этномәдени бірлестік, Жастар бірлестігі, Ұлттық жаңғыру мектебі, 42 шығармашылық ұжым жұмыс істейді. С.Торайғыров атындағы мемлекеттік университет жанынан Ассамблея кафедрасы ашылды. Оқу орнында этномәдени бірлестіктер жетекшілерінің, мүшелерінің қатысуымен Ассамблеяның құрылуы, достық, бірлік, қазақстандық патриотизм, қазақ тілінде сөйлеу, үйрену, тәуелсіздік жылдары қалыптасқан қазақстандық мінез ұғымдары жайлы арнайы дәріс сабақтары өткізіледі. Мақсат – отаншыл, елсүйгіш, қазақ тілін ана тілім деп білетін, елім, жерім деп жүрген өзге ұлт өкілдерінің басын қосу.
Былтыр «Бірлік-Единство.KZ.» шекаралас ынтымақтастық жастар форумы өтті. Оған Ресей, Армения, Беларусь, Қырғызстан, Оңтүстік Корея, Тәжікстан, Германия және Польша жастары қатысты. Сондай-ақ, «Ертіс – достық өзені» шекаралас ынтымақтастықтың халықаралық фестивалін өткізу дәстүрге айналды. Қазір Достық үйінде фольклорлық, драмалық, хореографиялық ұжымдар қызмет жасауда. Мысалы, «Достық» ансамблі, бишілер тобы, бондурашылар ансамблі, вокалдық топ, «Бірлік» мектеп хоры, «Арай», «Учтаулар» би топтары, декоративті-қолданбалы өнер студиясы жұмыс істейді.
– Біз тұратын үй өте көңілді. Бұл бірлік пен достықтың шаңырағы, – дейді жастар.
Ұлттық жаңғыру мектебінде 14 ұлттық орталықтың бөлімшесі, 2 мәдениеттану орталығы бар. Сабақтар өткізу үшін 14 оқу кабинеті, 2 мультимедиалық кабинет, 1 музыкалық студия жабдықталған. Жыл сайын мектепке 500-ден астам оқушы барады.
Иә, мұнда күн сайын осындай сауық-сайран. Достық үйіндегі жастар этнобірлестіктер үлкендерімен бірге Наурыз мейрамын көңілдегідей қарсы алып өткізсе, енді 1 мамыр – Қазақстан халқының бірлігі күні мерекесіне қызу да-
йындалуда. Таңертеңнен кешке дейін клубтарда сабақтар өтеді, 18 вокалдық-хор және 16 хореографиялық ұжым репетиция жасайды, оларда әртүрлі жастағы адамдар бар.
Фарида БЫҚАЙ,
«Егемен Қазақстан»
Суретті түсірген
Мақсат АЙТБАЙ
Павлодар
