«Мемлекет басшысының бұл мақаласы – ұлттық сананы жаңғырту жобасы және Қазақстан қоғамын дамытудың идеологиялық негізі. Сондықтан, оны жете түсініп, негізгі міндеттерді іске асыруға үлес қосу әрбір ел азаматының қасиетті парызы болуы тиіс», деді жиында ең алдымен сөз алған облыс әкімінің орынбасары Әсем Нүсүпова.
Баяндамашы мақалада білім саласына айрықша көңіл бөлінгенін, бүгінде 91 шығысқазақстандық жас шет елдің 11 беделді оқу орындарында «Болашақ» бағдарламасымен білім алып жатқанын, өңірдегі 8 жоға-
ры оқу орны мен 82 колледжде 62 мың жастың оқып жүргенін атап өтті. Өңірде мәдениет саласына да ерекше мән беріліп, былтыр аймақтағы бес бірдей тарихи орынға әлемнің үздік археолог ғалымдарының қатысуымен қазба жұмыстары жүргізілгенін, Катонқарағай ауданындағы Берел жазығында аспан асты мұражайы ашылғанын, бұл бағыттағы жұмыстардың биыл да жалғасын табатынын жеткізді.
Әсем Нүсүпова Елбасы мақаласында атап өтілген «Туған жер» бағдарламасын жүзеге асыруға шығыс жұртшылығының белсене қатысатынына сенім білдіріп, өңірдің бұл тарапта өз тәжірибесі, өз үлгісі бар екендігіне тоқталды.
«Шығыс Қазақстанда бірнеше жылдан бері «Туған жерге тағзым» акциясы жүзеге асырылып келеді. Акция аясында осы өңірден қанат қаққан кәсіпкер, меценат азаматтардың көмегімен құны 25 миллиард теңгені құрайтын 4 мыңға жуық жоба іске асырылды. Мектеп, балабақшалар, спорт кешендері салынды», деді облыс әкімінің орынбасары.
«Нұр Отан» партиясы облыстық филиалы төрағасының бірінші орынбасары Әнуарбек Мұхтарханов Елбасының мақаласы көзі қарақты, көкірегі ояу жұртты бейжай қалдырмайтынын, ұлтымыздың құндылықтарын көзіміздің қарашығындай сақтауға шақыратынын тілге тиек етті.
«Мақалада прагматизм мәселесіне ерекше көңіл бөлінген. Қанымызға сіңген көптеген дағдылар мен таптаурын болған қасаң қағидаларды өзгертпейінше, біздің толыққанды жаңғыруымыз мүмкін емес деп анық айтты. Президент еліміздің эволюциялық дамуы, ұлттық бірыңғай тұтастық, білім беру салаларын қамтитын рухани жаңару жолын ұсынды», деді ол.
Бұдан кейін сөз алған Қазақстан халқы Ассамблеясының мүшесі Лео Шик: «Жұртшылық жылы қабылдап жатыр. Алайда, алдымызда үлкен міндет тұрғанын ұмытпайық. Елбасы мақаласында жүктелген міндеттерді өңірдің әрбір тұрғынына жеткізуге тиіспіз», деді.
Облыстық мәслихаттың депутаты Риза Молдашева Мемлекет басшысы сөз еткен «Туған жер» бағдарламасының мәні терең екендігін, жастарды патриоттық рухта тәрбиелеуге ерекше үлес қосатынын атап өтіп, журналистер қауымына да артылар жауапкершілік жүгі салмақты екендігін жеткізді.
Жиын соңында сөз сөйлеген Семейдегі электртехникалық колледжінің директоры Азат Сарпеков шығысқазақстандық жастардың Президент мақаласын зор ықыласпен қабылдағанын, әсіресе, «Жаңа гуманитарлық білім. Қазақ тіліндегі 100 жаңа оқулық» жобасы замандастарының ерекше қызығушылығын туғызып отырғанын айтты.
Азамат Қасым,
«Егемен Қазақстан»
Өскемен
