Үкімет басшысының орынбасары – Ауыл шаруашылығы министрі Асқар Мырзахметов аграрлық саланы мемлекеттік қолдау бағытында атқарылған жұмыстарға тоқталды. Нақты айтқанда, бағдарлама аясында 8 бағыттағы субсидиялау ережелері қайта қаралған. Сондай-ақ, субсидияның он бір түрі алынып, 39 субсидия түріне өзгеріс енгізілген.
– Биылдан бастап мемлекеттік қолдауға қол жеткізушілердің қатары 7,5 есеге өседі. Бұл бағдарлама тетіктерін жүзеге асыруға енгізілген бірнеше өзгерістерден кейін жүзеге асып отыр, – деді А.Мырзахметов.
Қаржыландырудың нақтылануы аймақтардағы мал бордақылау алаңдарының санын үш есеге дейін көбейтуге жол ашпақ. Бұл өз кезегінде елдегі шаруалардың қолындағы асыл тұқымды мал басының көбеюіне ықпал етеді. Ал кооперация мүшелеріне қарастырылған жеңілдіктер ауылдың гүлденуіне жол ашатын қадам ретінде бағалануда. «Кооперацияға сатылатын 1 бас ірі қара үшін мемлекет қайтарымсыз 20 мың теңге тағы төлемек. Сондай-ақ, 1 литр сүтке 10 теңге, бір бас уақ малға 1500 теңге қосымша қаржы бөлінеді. Бұдан бөлек кооперацияға алынатын жемнің әр тоннасына 20 мың теңге төлеу көзделген. Алайда, бұл кооперацияға бірікпегендер мемлекеттік қолдаудан тыс қалады деген сөз емес. Қорадағы малы 30 бас ірі қарадан асатын шаруа сауылған әр литр сүтке 15 теңгеден, ал 400 бастан жоғары малы бар шаруа сүттің әр литрін 25 теңгеден субсидиялауға қол жеткізеді», деді министр.
Асыл тұқымды ешкі асыраушылар бірінші рет мемлекеттік қолдауға ие болмақшы. Дәл осындай мүмкіндік балық шаруашылығы үшін де туып отыр. Тауарлы балық өсірушілерге тұңғыш рет субсидия төленеді. Тіпті, балықтың ұрығы, тамағы, оны қадағалайтын техникаларына дейін инвестициялық субсидия қарастырылған. Яғни, биылдан бастап кооперативке біріккен ұжым қажетті техника сатып алар болса, кеткен шығынның 50 пайызын мемлекет бірден өтеп бермек.
Субсидиялауға қатысты тағы бір жаңалық – қаржыландыру тетіктерінің автоматтандырылуы. Бұл сыбайлас жемқорлықтың алдын алу мақсатында жасалған қадам. Келер жылдан бастап ауыл шаруашылығы саласын қолдауға бөлінетін қаржы көздері электронды тапсырыс беру жүйесіне көшетін болады.
«Ауыл шаруашылығын дамытудың 2017-2021 жылдарға арналған бағдарламасын» енгізу барысында көптеген құжаттарға түзетулер жасалған. Нормативтік актілер оңтайландырылып, 11 кодекс пен 25 заң тармағы өзгеріп, толықтырылды.
Жалпы, бұл өзгертулердің ауылдағы шаруаға шарапаты тиіп, жұмыстың жеңілдері сөзсіз.
Қалмаханбет МҰҚАМЕТҚАЛИ,
«Егемен Қазақстан»