Ынтымақтастыққа ынталылық

Ақордада Астана қаласында өтетін Шанхай ынтымақ­тас­тық ұйымына (ШЫҰ) мүше мемлекеттер Қауіпсіздік кеңес­те­рі хатшыларының 6-шы кездесуі аясында Президенттің көмекшісі – Қауіпсіздік Кеңесінің хатшысы Марат Тәжин Қытай Халық Республикасы Мемлекеттік кеңесінің мүшесі – Қоғамдық қауіпсіздік министрі Мэн Цзяньчжумен кездесті. «Екі мемлекет басшылары ара­сындағы байланыс, министр­лік­аралық және ведомствоаралық үнқатысу, Қазақстан мен Қытай арасындағы экономикалық ынты­мақтастық бүгінде өсу биігінде. Биылғы жылдың ақпан айында Қазақстан Президенті Қытайға ресми сапармен барған еді. Бұл кездесу барысында екіжақты әріп­тестіктің сан қырлы тұстары төңірегінде келіссөздер жүрген болатын», деді М. Тәжин. Ол өз сөзінде осы жылдың маусым ай­ында ҚХР Төрағасы Ху Цзинь­тао­ның да Қазақстанға  арнайы са­пары көзделіп отырғанын айта келе, бұл сапар қос мемлекеттің стратегияаралық байланысын ны­ғайта түседі деген сенімін жет­кізді. «Сіз Астанаға келген сапа­рыңызда сондай-ақ Қазақ­стан­ның Ішкі істер министрлігімен нәтижелі келіссөз жүргіз­геніңізді білеміз. Еліміздің Премьер-Министрімен де кездесу өткіздіңіз. Осы орайда, мен өзара әріптестік байланысымыздың кей­бір ма­ңыз­ды тұстарын талқы­лауға мүм­кіндік алғанымыз үшін де алғыс айтамын»,  деді Қауіпсіздік Ке­ңе­сінің хатшысы. Мэн Цзяньчжу өз кезегінде әріптесінің сөзімен келісетінін, бұл екі ел байланысындағы өсу ырғағының белгісі екенін жеткізді. «Бүгінде Қазақстан-Қытай ынтымақтастығы жоғары деңгей­де дамып келеді.  Қазақстан бас­шысының біздің елімізге сапары нәтижесінде қос тараптың қаты­суымен көптеген келісімге қол қой­ылды. Бұлардың барлығы екі­жақты қарым-қатынасқа тың серпін береді деп ойлаймын», – деді Қытай Халық Республикасы Мем­лекеттік кеңесінің мүшесі – Қоғам­дық қауіпсіздік министрі өз сөзінде. Тараптар өңірлік қауіпсіздік­тің өзекті мәселелері жөнінде де пікір алмасып, ортақ мүддені көздейтін бағыттар бойынша екі және көпжақты іс-қимылды те­рең­детуге ниет білдірді. Мәселен, ШЫҰ аясында саяси, эконо­ми­ка­лық және гуманитарлық ынты­мақ­тастықты кеңейту қажеттігі айтылды.  ШЫҰ-ның Өңірлік тер­­роризмге қарсы құрылы­мы­ның терроризмге, сепаратизмге және экстремизмге қарсы әрекет ету міндеттерін шешудегі рөлі де назардан тыс қалмады. Есірткінің заңсыз айналымымен күрес жө­нінде бірлесе күш-жігер жұм­саудың маңыздылығы да тілге тиек етілді. Кездесу соңында биылғы жыл­дың 15 маусымында Астанада өтетін ШЫҰ саммитіне дай­ын­дық мәселелері талқыланды. Ләйла ЕДІЛҚЫЗЫ.