Тәуелсіздігіміздің 20 жылдығы таяп келеді. Осы жылдар ішінде не тындырдық деу мұндайда табиғи заңдылық. Осы сұраққа жауап берер болсақ, онда, ең алдымен, халқы күнкөріс үшін сенделіп, көрші мемлекеттерді шарлап жүрмейтіндей өзіндік экономикасы орнығып, жұртты жұмыспен қамтыған, даму көрсеткіштері жағынан әлемдегі ең ширақ мемлекеттердің қатарына қосылған Қазақ елін құрып шықтық дер едім. Бұдан 15-20 жыл бұрынғы жағдайымыз баршамыздың көз алдымызда. 1991 жылы тәуелсіздігімізді алдық деп тақиямызды көкке лақтырып қуанған халық көп ұзамай-ақ жұмыссыздықтан сенделіп, үлкен күйзеліске ұшырады. Бұл күйзеліс 1997 жылға дейін жалғасты. Басқаны былай қойғанда, талантты ғалымдарымыздың өзі жөн тапқаны шет ел асып, ал олай істей алмағандары қап арқалап тауар тасып, саудагер болып кеткен еді. Ел мектептерінің көбінде мұғалімдер жалақысын бірнеше айлап ала алмаған жағдай болды. Мұндайда оқыту сапасы нашарлайтыны өзінен-өзі түсінікті. Оқушылар мектепке, студенттер аудиторияларына барғысы келмейтін күндерді бастан өткердік. Міне, осындай қиыншылықпен басталған тәуелсіздігіміздің алғашқы ауыр алты жылында Тұңғыш Президентіміз Нұрсұлтан Әбішұлы Назарбаев күйзелген елдің ортасына жиі барып, телеарналардан жиі-жиі сөйлеп, халықты төзімділікке шақырған сөздерінің әрқайсысында дерлік: «Оқушылар мектептен, студенттер лекциядан қалмасын. Жастар тәуелсіз Қазақстанның болашағы, болашақ тек қана біліммен жарқын», деген сөздерді айтушы еді. Мектеп директорлары мен университет ректорларын білім-ғылымға жауапкершілікпен қарауға шақырды. Жұрт өзегін жалғар нан таба алмай жүрген шақта Елбасымыздың бұлай алыс болашақты ойлауға шақыруы шын мәнінде қиялдағы істей көрінетін. Бүгінгі биіктен көз жүгіртсем, Тұңғыш Президентіміздің сол бір кездегі көреген сөздерінен демеу алған білім мен ғылымды еліміз шын мәнінде сақтап қала алған екен.
1997 жылы «Қазақстан-2030» Стратегиялық даму бағдарламасы жарияланды. Кезінде бұқаралық ақпарат құралдарының өзінде кейбір кертартпа топ өкілдері бұл бағдарламаға «Назарбаев өзі жауап бермейтін болашақтағы нәтижелер туралы алдарқатуда» деген пікір таңды. Ал шын мәнінде еліміздің таңдаулы ғалымдарының сарабынан шыққан бұл ауқымды жоспар өзінің дәлдігі мен өміршеңдігін іс жүзінде дәлелдеп шықты.
Жағдайдың сол бір аса оңала қоймаған кездерінің өзінде Тұңғыш Президентіміз білім мен ғылымды әрқашан да өз қамқорлығында ұстады. Бұл жалақылар мен шәкіртақыларды ұдайы өсіру ісінен көрініс тапты. Сондай-ақ, еліміздің барлық орта білім беретін мектептері компьютерлендірілді. Көбі интернетке қосылған, ал бұл күндері дарынды балалардың интеллектуалды мектептері ашылып жатыр. «Болашақ» бағдарламасы бойынша шетелдерде білім алатын жастарымыздың саны ұдайы өсіп барады. Бас-аяғы 15 жылдың ішінде білім-ғылымды инвестициялау 25 есеге өскен екен. Бұл посткеңестік аумақтағы мемлекеттер арасында тек қана Қазақстанда жүзеге асырылған игілік болып тұр. Айтқандай, тәуелсіздіктің алғашқы алты жылындағы күйзелістен Қазақстанның білім мен ғылымы онша көп зардап шекпей шыққан екен. Олай дейтін себебім, жоғары оқу орындарына түсуге ниет білдірушілер саны мен сапасы да уақыт озған сайын өсіп келеді.
1997-2007 жылдар аралығы Қазақстан үшін қарқынды даму кезеңі болды. «Қазақстан-2030» Стратегиялық даму бағдарламасын басшылыққа алған басқарушы биліктің білікті жұмыс істеуінің нәтижесінде алғашқы онжылдықтың өзінде дағдарыстарға іргесі шайқалмайтын мемлекет өмірге келді. Президентіміздің өзі мәлімдегеніндей, стратегиялық даму бағдарламасының алғашқы кезеңіне белгіленген жоспар қомақты нәтижемен және мерзімінен бұрын орындалған екен. Соның арқасында 2007 жылдың тамызында АҚШ ипотекалық жүйесінде орын алып, кейіннен тұмаудай жер шарының түкпір-түкпіріне тараған бүкіләлемдік қаржы дағдарысы кезінде Қазақстан зардапсыз шықты. Даму көрсеткішіміз тек 2008 жылы ғана азғантай «шегініс» жасаған болса, 2009 жылы даму қайта басталды. Бұл болуы мүмкін жағдайларды Елбасымыздың дер кезінде көре біліп, атқарушы биліктегі барлық күшті осал тұстарды бекітуге жұмсағандығының нақты нәтижесі. Өзінің жұмысының дұрыстығына іс жүзінде көз жеткізген Нұрсұлтан Әбішұлы 2009 жылы бұдан былай «Қазақстан-2030» Стратегиялық даму бағдарламасының екінші кезеңі басталатынын, ол шартты түрде екі бес жылдыққа бөлініп, «индустриялық-инновациялық даму бағдарламасы» бойынша көрініс табатынын мәлімдеді.
Егер 2007 жылы басталған бүкіләлемдік дағдарыстан Қазақстан қаншалықты ұтылды деген сұрақ туындай қалса, мен бұған «еліміз ұтылысқа емес, ұтысқа шықты» деп жауап берер едім. Ұлт Көшбасшысының тікелей нұсқауымен жұмыс істеген Үкімет және жергілікті атқарушы билік жұмыссыздықты болдырмауға, осы кезеңді пайдаланып кезегін күтіп тұрған әлеуметтік шараларды жүзеге асыруға күш салды. Соның нәтижесінде, тіпті қарқынды дамыған кездеріміздің өзінде салынбаған мектептер мен ауруханалар бой көтерді. Алыстағы ауылдарға мемлекеттік биліктің қамқорлығы барды. Соның нәтижесінде, жұмыссыздық қарқынды даму жылдарындағыдан да төмендеген екен. Ал 2009-2011 жылдарда бюджеттік міндетті төлемдерді екі есе өсіре алған тек қана біздің Қазақстан Республикасы болып тұр. Сондай-ақ, 2010 жылдың өзінде индустриялық-инновациялық даму бағдарламасын жасап, онжылдық жоспар бойынша жұмыс істей бастаған да біздің ел. Тіпті, 2010 жылдың өзінде 152 жаңа өндіріс орындары салынып, өмірге жолдама алған болса, мұның басым бөлігі шикізатты тереңдете өңдейтін өңдеуші кәсіпорындар мен жаңа тауарлы өндіріс компаниялары. Былтырғы жылы бір ғана Курчатов қаласында әлемде теңдесі жоқ өнім шығаратын төрт бірдей жаңа кәсіпорын жұмыс істей бастапты. Мінекей, инновация деп осыны айт!
Алдағы онжылдыққа инновациялық даму бағдарламасын міндеттеген Елбасымыз бұл тек қана отандық ғылым негізінде мүмкін болатынын, сондықтан да Қазақстан ғылымын ерекше қамқорлыққа алуды атқарушы билікке қатаң тапсырды. Соның нәтижесі болса керек, елімізде білім, ғылым туралы жаңа заң жасалынды. Алғашқы заңның жасалып, қабылдануы кезінде вице-министр ретінде барлық жұмыстың басы-қасында өзім жүріп, Елбасымыздың осы мәселеге қатысты қабылдауларында талай рет болғанмын. Сонда біз мүлде жаңа мемлекет құрып жатқандығымызды, білім беру жүйесі мен ел ғылымы да соған сай болуы, ұстанатын басты нысанамыз толықтай жүйе бойынша халықаралық стандарт екендігін, демек, білім мен ғылымымыз бәсекелестікке сай болуы қажет екендігін заңдастыруымызды Президентіміз талай рет ескерткен еді. Ол «көрпеге қарап көсілетін» кезеңде өмірге келген құжат болды. Солай дей тұрсақ та, осы уақытқа дейін алғашқы заңымыз өзінің жақсы нәтижесін бергенін еске сала кеткен жөн. Енді елдің еркін көсілетіндей жағдайы бар. Тек қана ұлттық қорымызда 70 миллиард доллардан астам алтын-валюталық қазынамыз бар екен. Алғашқы заңды қабылдар кезде мұндай байлықты ойлаудың өзі мүмкін емес еді. Қазақстанның жылдық дамуы былтыр 7 пайыздан асты. Халықтың жан басына шаққандағы ішкі жалпы өніміміз 9 мың долларға жетіпті. Бұл да алғашқы заң қабылданған кезде көзге елестете алмайтын жетістік еді ғой. Сондықтан да алғашқы заңға «өкпе жоқ», ал енді экономиканы түбегейлі өзгерту кезеңіне аяқ басқан, көсіле сілтейтін мүмкіндігі бар мына заманда басқа заң қажет болды. Мінекей, Президентіміз білім-ғылым туралы жаңа заң жасап, оны өндіріске енгізу барысында осы ерекшеліктерді ескеруді ерекше тапсырса керек. Ғалымдардың сан талқысынан өткен бұл заңымыз тәуелсіз Қазақстан Республикасының өркендеуіне нақты үлес қосатынына сенім мол. Өйткені, мұнда барлық тетік ескерілген, кімнің немен айналысатыны нақтыланған, ғылымды инвестициялау көздері мен ғылыми жаңалықтарды өндіріске енгізудің барлық тетіктері заңда баяндалған.
Айталық, жаңа заңда мемлекеттік жоғары ғылыми-техникалық кеңес құрылып, ол тікелей Үкімет басшысының төрағалығымен жұмыс істейтіндігі заңдастырылған. Сондай-ақ, ғылымның бес саласына басымдық беріліп, осы бес сала бойынша ғылыми кеңес құрылды. Бұл кеңеске отандық ғылымның ең талантты, тәжірибелі тұлғалары мүше. Бір сөзбен айтқанда, ғылымды басқару ғалымдардың өз қолына тиді. Осы бір тұсты оқырманға түсініктірек болу үшін кеңейтіп, баяндаған дұрыс шығар. Мәселен, ғылымды қаржыландыру кезінде «соңғы сөзді айтатын» осы ғалымдар кеңесі. Ғылымды қаржыландыру грантты және мақсатты инвестициялы болып бөлінген. Грант жекелеген ғалымдарға да, ғылыми топқа да, ғылыми мекемеге де беріледі. Тек олардың нақты ғылыми ізденіс бойынша жоспары қажет. Солардың ішінен елімізге қажетті дегендері іріктеліп алынады. Осы уақытқа дейін «әр қарындасқа бір сырға» жүйесімен бөлінген қаржы нақты нәтиже бермек түгіл, кері әсері мол болған бір тетік еді. Соның салдарынан
жалған ғалымдар саны көбейіп кетті. Олар ғылыммен айналысу үшін ғылыми атақ алған жоқ, ғылыми атақты пайдаланып, лауазымын өсіріп, шенеунік болуға асықты. Міне, жаңа жүйе бойынша ғылым осындайлардан арылады. Ал бұл өз кезегінде ғылыми жаңалықтың көптеп ашылуына кең жол ашады. Егер мақсатты инвестиция дейтін болсақ, онда мемлекет немесе жекеменшік капитал иесі белгілі бір істі жүзеге асыру, ғылыми негіздеме жасауы үшін берілетін қаражат. Айталық, Денсаулық сақтау министрлігіне балаларды аурудың алдын алу мақсатында егетін вакцинаның отандық түрін шығару қажет дейік. Мұндай жағдайда министрлік химик-фармацевт ғалымдарға немесе ғылыми топқа нақты тапсырма беріп, оларды тиісті қаржымен қамтамасыз етеді. Белгілі бір мерзім аралығында тапсырыс алушы жақ мақсатты межені алса, онда олардың ғылыми жаңалықтары тәжірибелік сынақтан өткізіледі, ақыр аяғында өндіріске жолдама алады. Мінекей, ғылым мен өндірістің арасын жақындата түсетін мұндай тетік көптен күткен ісіміз еді, ол енді өмірімізден көрініс тапты.
Еліміздің индустриялық-инновациялық даму бағдарламасы бойынша жұмыс істейтін кезеңде мұндай заңның өмірге келуі табиғи қажеттілік дедім. Меніңше, нәтиже көп күттірмейтін де секілді. Өйткені, қаражаттың бөлінуіне бұрынғыдай комитеттер мен департаменттердегі ғылымнан хабары жоқ шенеуніктер емес, ғалымдардың өздері және мемлекеттің жауапты тұлғалары қатынасады ғой. Айталық, елімізде жаңадан Индустрия және жаңа технологиялар министрлігі құрылып жұмыс істеп жатыр. Ол – Үкіметтегі екінші тұлға. Еліміздің онжылдық бағдарламасының орындалуына, яғни экономикамыздың түбегейлі өзгеруіне тікелей осы министрлік жауап беретін болады. Сондықтан да бұрынғыдай қаржыны игерсем болды деген ұстаным жүрмейді. Елге тек қана инновациялық өндіріс ошақтары қажет. Ал ол әлемдік бәсекеге төтеп бере алатын ХХІ ғасырдың немесе тіпті одан да арғы кезеңнің сұранысын қанағаттандыра алатын өнім шығаруы тиіс. Мұндайды тек қана ғылым жасайды. Ендеше, ғылымға қамқор болатын тағы бір министрлік жұмыс істеп жатыр деп ойлауға тиіспіз. Ал бұл министрлікте Білім және ғылым министрлігіне қарағанда қаражат мол. Қысқасы, ғылымымыз мемлекеттің толық қолдауына көшті деуге болады. Орайы келгенде айта кетейін, мұндай жағдайда бізде қамқорлыққа іс нәтижесімен жауап бере алатын ғалымдар мен ғылыми топтар жеткілікті. Енді осындай қамқорлық жағдайында «Ғалымдар қай салада ізденіс жүргізгені нәтижелі болмақ?» деген сұраққа жауап бере кеткен дұрыс шығар.
Ең алдымен айтарым, кез келген ғылыми ізденіс ел экологиясының бұзылмауына, керісінше, дұрысталуына бағытталуы қажет. Осы тұрғыдан алғанда, Қазақстан күні бүгінге дейін әлемдік соңғы тауар өндірісшілерінің шикізаттық аймағы болып келгені жасырын сыр емес. Кезінде КСРО индустриясын қазба байлықтармен қамтамасыз етіп тұрған біздің ел еді. Ұлы Отан соғысы кезінде «жауға атылған он оқтың тоғызы Қазақстан металынан жасалынды» деген сөзді еліміздің академиялық ғылымының негізін қалаушы Қаныш Имантайұлы Сәтбаев ағамыз айтып кеткен. Осынау «мақтан сөз» буына бізді мас қылып, Мәскеудегі жоғары билік Қазақстанда халық тұтынатын тауарлы өндіріс шығарушы зауыттар мен фабрикаларды құрмапты. Олардың бәрін Ресей, Украина, Беларуссия жерлеріне орналастырған екен. Бізден миллиондаған тонна руда сол елдерге тасымалданып, тіпті қарапайым өндірістік металдарды шығаратын домна пештерінің өздері де сол жақта салынған екен. Жалғыз Теміртау ғана бар байлығымыз болды. Мұның бәрін тәуелсіздік алғаннан кейінгі жылдарда қатты сезіндік. Қазақстандағы әскери стратегиялық мақсатқа жұмыс істейтін зауыттар қажетсіз болып қалды. Ал бұл миллиондаған жұмыссыздар армиясын өмірге әкелді. Осының бәрін айтып отырған себебім, біздің елімізде сол руда өндірісіндегі қалдықтар көптен де көп. Солардың барлығы да жер бетінде ашық жатқан кезде тірі табиғатқа зиянды. Экологиямыздың кейбір аймақтарда сын көтермейтіні сондықтан. Бір назар аударатын тұс, ғалымдар сол қалдықтардың барлығы дерлік пайдалы шикізат дейді. Қазақстан ғалымдарының ауқымды тобы әлгі қалдықтардан жаңа бір аса пайдалы, бәсекелестікке қабілетті тауарлы өнім шығару технологиясын жетік біледі. Солай бола тұрса да әлгі технологияны тиімді пайдалана алмай отыр. Мұны «игерілмеген тың» десе де болғандай. Біздің институт мамандарының күшімен Жамбыл облысындағы фосфорит кенінің қалдықтарын қайыра өңдеп, тыңайтқыштың жоғары сапалы жаңа түрі аз да болса шығарылып жатыр. Ал қалған жерлерде руда қалдықтары пайдалы өндіріс шикізаты болуы былай тұрсын, экологиялық зиян келтіруін өлшеусіз жалғастыра түсуде.
Бұл жерде шешімін таппай тұрған бір мәселе бар, ол – кен өндіру аймағын жекешелендіріп алған кәсіпкерлер төңірегін түгел, тіпті өндіріс қалдықтарын да өз байлығым деумен шектеліп, оларды басқаның пайдалануына бермейді. Демек, осыны жөнге келтіретін бізге жаңа бетбұрысты мемлекеттік бір заң керек. Онсыз әркім бас басына би бола береді. Заңда руда қалдықтары үшін жауаптылық бірінші кезекте тұруы тиіс. Кенді аймақты жекешелендіріп алғандар руда қалдықтарынан жаңа тауарлы өндіріс жасауға міндеттелсін немесе сондай өндіріс құрамын дейтіндерге оны тегін берсін. Әзірге бұл «әрі тарт та бері тарт» деген бір іс болып тұр. Соның салдарынан елімізде өмірге келіп, әлемнің дамыған елдерінің өндірісіне шикізат болатын талай игілік жұмысшы қолын күтіп жатумен қатар айналасындағы тірі табиғатқа елеулі зиян келтіруде. Мәселен, отандық ғалымдар мыс, уран рудаларының қалдықтарынан жер бетінде сирек кездесетін осьмий және рений изотоптарын алу технологиясын толық меңгерген. Ал дүние жүзі болса, мұндай тауарға аса зәру. Былтыр ғана іргедегі алып Қытай сирек металдар экспортына шектеу қойған кезде дүние жүзінің дамыған елдері «бір тарының қауызына сыйғандай» жағдайға тап болған. Қытай мұны қырсыққаннан жасаған жоқ, уақыт озған сайын қарқынды дамыған өз экономикасын аталған шикізатпен қамтамасыз ету үшін осылай істеуге мәжбүр болды. Демек, дүние жүзінде сирек металдарға сұраныс көп. Орайы келгенде айта кетейін, бір келі рений өндіру үшін 30 доллар ғана инвестиция құю қажет екен. Ал оның сатқандағы бағасы 3000 доллар. Елбасымыз индустриялық-инновациялық даму бағдарламасын атқарушы билікке міндеттеген кезде экономикалық өсімді қосымша құны мол тауарлы өндіріс жасау арқылы алу қажеттігін ескерткен болатын. Мұнда Президент мейлінше шағын сандарды ғана Үкіметке міндеттеді. Оны бұл арада атап көрсетудің қажеті жоқ.
Тек жүз есе пайда беретін өндірісті жасай алмай тұрғандығымыз өкіндіреді. «Қазақмыс» корпорациясы мен «Қазатомөнеркәсіп» ұлттық компаниясы аталған сирек металдарды не өздері өндірсін, не басқалардың өндіруіне жол ашсын. Мінекей, қазіргі кен игерушілермен осылай жұмыс істеуді заңдастыратын арнайы құжат бізге дәл бүгін қажет. Жоғарыда айтқанымдай, Қазақстан ғалымдары аталған сирек металдарды өндіру технологиясын баяғыда меңгерген. Ендеше, «бұл неге өндірілмей жатыр?» деген сұрақ жоғары биліктің күн тәртібіне шығуы керек. Өйткені, инновация дегеніміз ағаш өңдейтін зауыттар салу емес, бүкіл әлем өзі іздеп келіп қымбат бағасына сатып алатын тауарлы өндіріс қой. Ал сирек кездесетін металдар өндірісі сондай өндірістің нағыз өзі. Бұл саладан Қазақстан әлемдік рыноктың үлкен ойыншысы болып шығуға толық қабілетті. Мұндай жағдайда еліміз дойбышылар тілімен айтар болсақ, «екі жеп биге шығар» еді. Елбасымыздың бізден күтіп отырғаны да осы. Экологияға зиянсыз мол пайдалы өндіріс құру Нұрсұлтан Әбішұлының басты талабы. Егер біз уран және мыс қалдықтары жатқан жерде сирек металдар өндірісін ұйымдастыра алсақ, бұл табыстың көзін ашып қана қоймай, сонымен бірге, аймақтың экологиялық тазаруына да оң ықпал етер едік. Мінекей, ең алдымен, осыны ескеру керек. Қазіргі таңда Шығыс Қазақстанда тантал, бериллий өндірісі жолға қойылды деп естиміз. Қуанышты жағдай. Бериллий өндіретін әлемде екі-ақ мемлекет болса, соның бірі бізбіз. Ал тантал өндірудің технологиясын дүние жүзіндегі бес мемлекеттің бірі болып қолға алдық. Бұлардың қай-қайсысына да сұраныс жеткілікті. Мінекей, ХХІ ғасырдың өндірісі деп осыны айт!
Осындайда Индустрия және жаңа технологиялар министрлігін басқарып отырған азаматтар шешуші сөз айтса екен деген тілек бар. Өйткені, нағыз инновациялық өндіріс әзірге «түрен түспеген тың» секілді қозғаусыз жатыр.
Мен өзім химия саласының маманымын. Оның ішінде ғылыми-зерттеу бойынша маманданған салам полимерлер химиясы. Ал мұның мұнайдан алынатыны бесенеден белгілі. Біздің полимерлік химия саласындағы ғылымымыз полиэтилен, полипропилен, полистирол шығаратын кәсіпорындардың технологиясын ғылыми негіздеп беруге дәл бүгін даярмыз. Орайы келгенде айта кетейін, КСРО кезінде мұнайлы Батыста полистирол зауыты болған. Тәуелсіздіктің алғашқы жылдарындағы алапат дағдарыс оны да жойып тынғандай. Бүгінгі таңда еліміздің көптеген өндіріс орындары полимерлік шикізаттарды шет елдерден алдыруда. Мұндайға, әрине, қынжыласың. Өйткені, өзіміз оларға
«тиын-тебенге» шикі мұнай сатып, олардан мыңдаған доллар тұратын мұнай химиясы өнімдерін импорттап жатырмыз. Қынжылтатыны – қолдан келетін іспен айналыспай тұрғандығымыз. Тіпті еліміздегі үш мұнай зауыты сапалы жанармай шығаруға да қабілетсіз екен. ХХІ ғасырда өмір сүріп, ХХ ғасырда жүргендейміз. Техникаларға жағар май да шығармаймыз. Алып Қазақстан Республикасының Президенті Нұрсұлтан Әбішұлы Назарбаев ғылымды, инновацияны дамыту туралы айтқан жеті басым бағыттың бірінде осы мұнай-газ химиясын атаған болатын. Атырауда мұнай-газ химиясы зауытын саламыз дегенімізге көп уақыт өтті. Бірақ, ол зауыттың қашан өнім бере бастайтыны белгісіз. Жұмыс кестесінің қай деңгейінде жүрміз, оны да хабарлап жатқан ешкім жоқ. Әзірге салалық министрлік үш зауытты еуро-3, еуро-4 стандарттарына сай жанармай шығаратын деңгейде жаңғырту жұмыстары жүргізілетінін, сондай-ақ Павлодардағы мұнай өңдеу зауытын қалай жаңғырту мәселесі жайлы келіссөздер жүргізіліп жатқанын ғана баяндаумен шектеліп жүр. Жалпы алғанда, менің және менің әріптестерімнің пікірінше елімізде мұнай өңдеуді тереңдетіп, одан алуан түрлі өнімдер шығаратын өндіріс орындары өмірге келмейінше «қара алтынымыз» құмға құйған судай сатыла бермек. Әрине, мұнайдан түскен кіріс арқылы бүгінгі дәрежемізге жеткенімізді теріске шығаруға болмас. Солай бола тұрса да, шикі мұнай сатумен шектелу бос әурешілік екенін 2007 жылы басталған дағдарыстан бергі кезең дәлелдеп берді. Әлемдік рынокта мұнай бағасы түскен кезде бюджетімізді бірнеше рет қайта қарадық. Шығындарды қысқарттық. Ал егер Нұрсұлтан Әбішұлы айтып жүргеніндей, мұнай кірістеріне бағынбайтын бюджет жасақтаймыз десек, тек қана осы мұнайды тереңдете өңдеп, одан жанармай ғана емес, толып жатқан жаңа өтімді тауарлар түрлерін шығаратын өндіріс құру керек. Сонда мұнайдың берері 10 есе көбейеді.
Мәселен, полимерлік шикізат шығара алсақ, оның бір тоннасы мұнайдың 10 тоннасын сатқандағыдай табыс түсірер еді. Ал егер сол полимерлерден дайын бұйымдар жасасақ, құбырлар, балалар ойыншықтары, синтетикалық маталар өндіріп сатсақ, онда бұл табыс тағы еселенеді. Мінекей, еңбек өнімділігін арттыру, инновациялық индустрия құру дегенді өз басым осылай түсінемін. «Жақсының жақсылығын айт, нұры тасысын» дейді ғой. Сол айтқандай, индустриялық-инновациялық даму бағдарламасы жұмыс істей бастаған кезден бері бұл салада да ілгерілеушілік байқалды. Біздің «Ә.Бектұров атындағы Химия ғылымдары институты» АҚ Қазақ-Британ университетінің (ҚБТУ) құрамына енді. Ал университетті «Самұрық-Қазына» әл-ауқат қоры қамқорлыққа алған. Өйткені, бұл қордың құрамында «ҚазМұнайГаз» ұлттық компаниясы бар. Мінекей, осы «ҚазМұнайГаз» ұлттық компаниясы мен біздің ғылыми-зерттеу институтымыздың ғалымдары бір мақсатта жұмыс істеуге келісті. Ұлттық компания мақсатты тапсырыспен институтқа инвестиция құятын болды. Шынына келсек, бұл тәуелсіздіктің 20 жылы ішіндегі ең бір салалық дұрыс шешім деу керек. Егер әр саланың көшбастаушылары осы сала ғылымдарына нақты мақсатты тапсырыс беріп жатса, сала да, ғылым да дамиды. Меніңше, Елбасымыздың инновациялық экономика құрудағы көздегені осы.
Инновациялық экономика құру ісі ғылымның сан саласын дамытады. Ғылым өз кезегінде инновациялық экономика құруға қозғаушы күштей әсер етеді. Қазіргі кезде Президент белгілеген жеті басым бағыт бойынша инновациялық индустрия жасау ісі қарқынды жүріп жатыр. Бұл әсіресе, фармацевтика саласында ерекше көрініс тапқан. Елбасымыз дәрі-дәрмектің 30 пайызын өзінде шығара алмаған мемлекет БҰҰ шарттары бойынша, тәуелді және мешеу мемлекеттер санатына жататынын ерекше ескертіп айтып, отандық фармацевтиканы дамытуға Үкіметті міндеттеді. Қазірдің өзінде осы мақсатты бағдарлама бойынша елімізде бірнеше фармацевтикалық зауыттар өмірге келген. Менің сырттай бақылауым бойынша, бұл салада белгілі бір жетістікке жетеріміз даусыз. Бірақ, әттеген-ай дегізетін бір тұс бар, ол дәрі шығаратын негізгі құрамдас субстансалардың импортталатындығы. Ал біздің химик-фармацевт ғалымдарымыздың ашқан жаңалықтары – жаңа субстансалар шетелдіктер ұсынатын шикізаттардан ешқандай кем түспесе де оларда конвейерлік өндірістен шығаратын бір кәсіпорын болмай тұр. Меніңше, осы салаға ерекше көңіл бөлу керек секілді. Сонда ғана инновация ғылымды, ғылым инновацияны дамытқан болып шығады. Турасына келгенде, басқа жақтан субстанса тасып, дәрі шығару дегеннің өзі ұлттық тәуелсіздікке нұқсан келтіретін тұс емес пе?! Тіпті, дамыған Жапониядан, Еуроодақтың бірқатар елдерінен алдырған дәрі-дәрмектеріміз Қазақстанда «сынақтан өте алмай» талай дауды туғызғаны ұмытыла қойған жоқ. Инновациялық жобаларды іріктейтін үкіметтік жұмысшы тобы алдағы уақытта осы жағын ескерсе деймін.
Жалпы алғанда, Елбасымыз дамуымыздың алғашқы онжылдығына белгіленген нақты тапсырмаларында жоғарыда айтқанымдай, жеті басым бағытты айқындап берді ғой. Солардың бірі және бірегейі ұлттық әскери өнеркәсіп құру. Мінекей, инженер-физиктер мен химиктердің таланты ашылатын тұс осы. Сондай-ақ, бейбіт мақсаттағы ғарышты игеру бағдарламасы да ұлттық басым бағыттардың бірі. Ал бұл дегеніңіз, бүкіл қолданбалы ғылымға арқа сүйейтін және сол ғылымды өзімен бірге дамытатын тұс. Егер біз ғарышты игеру бағдарламасын ойдағыдай жүзеге асыра алсақ, онда, сөз жоқ, Елбасымыздың әлемдегі дамыған елу елінің сапында болу ұстанымының орындалғандығы. Себебі, ғарышты игеру арқылы біз сапалық жоғары деңгейге көтеріліп қана қоймай, жер мүмкіндіктерін, жер берерін мейлінше арзан бағамен және нақтырақ зерттей алатын боламыз. Айталық, ғарышты игергеннен бергі кезең ішінде КСРО державасы тапқан жерасты байлығы бүкіл ғарышты игеру бағдарламасына кеткен шығынды артығымен қайтарып берген екен. Мінекей, біздің ұмтылатын тұсымыз осы.
Ғарышты игеру үшін, ең алдымен, жер серіктерін орбитаға шығаратын өз зымырандарымыз болуы керек. Қазіргі таңда Ресей Федерациясы ғалымдарының бізбен бірге жұмыс істеуінен гөрі біздің тапсырыс бойынша «ақша табуы» басымырақ болып тұр. Десек те, Қазақстанның төл ғарыштық кешенін құруға олардың да атсалысқысы келеді. Орайы келгенде айта кетейік, өткен жылы Францияға сапары кезінде Елбасымыз дәл осы бағытта біраз келісім шарттарға қол жеткізіп қайтты. Демек, сең бұзылды, қозғалыс басталды деуге болады. Егер «Қазақстан-2030» Стратегиялық даму бағдарламасының екінші онжылдығында осы кешенді өмірге әкеле алсақ, онда нағыз инновациямыз сол болар еді.
Иә, Көшбасшымыз дамудың жаңа деңгейін көрсетіп берді. Ол – экономиканы инновациялық индустрия құру арқылы тұтастай мемлекетті шикізатқа тәуелділік құрсауынан шығару. Ал ғылымсыз инновация жоқ. Демек, қазіргі таңда «құланның қасынуына мылтықтың басуы» дегендей сәт туып тұр. Осы онжылдық ішінде ғылым мен өндірісті ажырағысыз деңгейде кіріктіре алсақ, одан арғы дамуымыз соған байланысты өрбиді. Меніңше, еліміздің білім-ғылым туралы жаңа заңы осы мақсатқа қызмет ететін бас құжат болып шыққандай. Әрине, заң бір бөлек те, оның орындалуы екінші мәселе. Кейде, тіпті, әп-әдемі заңдар «жөргегінде тұншығып» жатады. Сондықтан да жоғары ғылыми-техникалық кеңес бас болып, басым бағыт берілген салалық ғылыми кеңестер оны қостап, ақыр аяғында, нақты ғалымдардың, ғылыми орталықтардың және ғылыми мекемелердің нәтижелі жұмыс істеуін жолға қою керек. Ендеше, үкілі үмітіміздің нәтижесі көп ұзамай-ақ ел игілігіне айналады деуге болар. Ең бастысы, осы онжылдықта мемлекеттің жалпы жылдық ішкі өнімін 2,7 есе өсіру міндетін шешуге тиіспіз. Ал бұл тек қана инновациялық өндіріс арқылы қамтамасыз етілмек. Ендеше, ғылым мен өндіріс қайтсе де бір ырғақта жұмыс істейді деуге болады. Ең алдымен, бұл ұлттық сапаны жоғары деңгейге көтеретін бір іс болғалы тұр. Өйткені, жаңадан өмірге келетін өндіріс орындарының барлығы дерлік қолмен атқаратын «қара жұмыс» орны емес, компьютермен басқарылатын іс болып шығады. Яғни, елімізде сан алуан жаңа мамандық, бұрын-соңды көз көрмек түгілі атын да естімеген мамандық иелері өмірге келеді. Сондықтан да мұның өзі алыс болашақтардың гүлдене түсуі үшін бүгінгі ұрпақ қалаған берік негіз болмақшы.
Еділ ЕРҒОЖИН, химия ғылымдарының докторы, профессор, ҚР ҰҒА академигі, «Ә.Бектұров атындағы Химия ғылымдары институты» АҚ бас директоры.