Сон ИЛЬ-ГУК: «Көрерменнің ықыласына тәнті болдым»

Биыл «Кореяның Қазақстандағы жылына» орай, аталған елдің Мәдениет, спорт және туризм бірінші вице-министрі Мо Чхоль-Мин бастаған делегацияның Астанаға арнайы келгенін бұған дейін хабарлаған болатынбыз. «Кореяның Қазақстандағы апталығы» фестиваліне қатысу үшін ат арытып жеткен қонақтардың арасында Кореяның белгілі өнер адамдары мен ұжымдары бар екенін де айтқан едік. Солардың бірі «Ханзада Жумонг» сериалы арқылы көптің ықаласы мен қошеметіне бөленген белгілі актер Сон Иль-Гук. Астанада Корея делегациясымен болған баспасөз мәслихатынан кейін оңтүстік­корея­лық актермен әңгімелесудің сәті түскен еді. – Сіз бала кезіңізде актер болғыңыз келмепті. Алайда, уақыт өте келе осы жолды таң­дапсыз. Неге? – Иә, мен бала кезімде дизайнер болуды армандадым. Алайда, сол мамандық бойынша университетке оқуға түсе алмадым. Сосын менің таныстарым басқа кәсіпті таңдауға кеңес берді. Мәселен, сахнадағы өнерге бай­ланысты. Ал сахнадағы өнер актерлік мамандыққа тікелей қа­тысты екенін білесіз. Сол себепті, мен ақыр соңында театр факультетіне оқуға түстім. Міне, менің актерлік жолым осылай басталды. – Көпшілікке таныс «Теңіз әміршісі» сериалынан кейін барып, «Ханзада Жумонг» сериалына шақырту алыпсыз. Яғни, әуелі «Теңіз әміршісі» сериалы арқылы танымал болған екенсіз. Бұл сериалға түсуге қалай келдіңіз? – Жалпы алғанда, менің «Теңіз әміршісі» деген сериал арқылы танымал бола баста­ға­ным рас. Сол кезде отбасымызда да түрлі қиыншылықтар болған еді. Осы сериалдан кейін ма­териалдық жағдайымыз да тү­зелді. Сондықтан, «Теңіз әмір­шісі» деген сериал мен үшін ыс­тық. «Теңіз әміршісі» се­риа­лын­дағы Хе Шиннің рөлінде бас­тапқыда басқа актер ойнауы керек болатын. Алайда, ол актер­дің басындағы белгілі бір жағ­дай мен себепке байланысты мені шақыртты. Өзіңіз білетін шығарсыз, бұл сериалдағы Хе Шин – жағымсыз кейіпкер. Оның үстіне ол сериалдағы бас­ты кейіпкер емес. Алайда, соған қарамастан, мені көрер­мендердің басым көпшілігі жақ­сы көріп кетті. Негізінен мен кө­бі­несе жағымсыз кейіпкер­лердің рөлінде көбірек ойнаппын. – Ал «Ханзада Жумонг» сериалына түсуге арнайы ұсыныс білдірілді ме? – Тарихта Ханзада Жумонг – жан-жаққа тарап, бытырап кеткен тайпалардың басын қосып, адамдардың жүрегіне үміт отын ұялатқан, сөйтіп, ұлы Когуре, яғни Корея мемлекетінің негізін қалаған белгілі тұлға. Сон­дықтан, сериалға түсуге ұсыныс түскенде қатты қуандым. Ұсынысты бірден қабылдадым. – Қазіргі таңда қандай кино­ларға түсіп жүрсіз? Театр сах­на­сында да ойнайсыз ба? – Жақында ғана бір крими­нал­дық сериалдың түсірілімі аяқ­талды. Ал мамырдың ортасына қарай, бір спектакльде ойна­мақ­пын. Бұл спектакль Кореяның тәуелсіздігі жолында күрескен бір қайраткердің басынан кешкендері туралы. Бұдан кейін де бірқатар киноларға түсуді көздеп отыр­мын. Ол кинолардың атаулары қан­дай екенін әзірге айта алмаймын. – Корея киноиндустрия­сы­ның өзіне тән өзгешелігі мен кино түсіру үдерісіндегі ерекшелігі туралы не айтасыз? – Менің білетінім, Жапония мен Америкада әдетте киноны тұ­тастай түсіреді, сосын мон­таж­дайды. Экранға содан кейін жібереді. Ал Кореяда сериалдың ал­ды­мен 20-30 пайызы түсіріледі. Монтаждалады. Экранға жіберіледі. Біз сол арқылы көрерменнің «реакциясын» байқаймыз. Се­риал­дың қалған бөлігінде көрер­меннің көзқарасына қарап оты­рып, киноға өзгеріс енгіземіз. Корея киноларының Қазақстанда кеңінен танымал болуының сыры осында жатса керек. Меніңше, біздің сериалдарымыздың басты артықшылығы осы. Екіншіден, корей сериалдары көбінесе жеке капитал қаражатына түсіріледі. Мемлекеттік бюджет қаражаты­мен түсірілетін сериалдар аз. – Ал өзіңіз продюсер болып, кино түсіру ойыңызда жоқ па? – Жоқ. Мен актермін. – Болашақта Қазақстанмен бірлескен киноға түсу ойы­ңыз­да бар ма? – Әрине, егер мүмкіндік бо­лып жатса, қуана-қуана түсер едім. – Сіз өзіңіздің жасыңыздан анағұрлым жас көрінесіз. Өзі­ңіздің кескін-келбетіңізді, сырт­қы пішініңізді жақсы сақтап тұру үшін не істейсіз? Маман­дығыңыз да күрделі ғой. – Ең алдымен, алкогольдік ішім­діктерді ішпеймін. Темекі шек­пеймін. Менің сыртқы піші­нім­нің жастығы саламатты өмір салтын ұстануымнан ғой деп ой­лаймын. Екіншіден, мен көкөніс өнімдері мен жеміс-жидектерді ғана жеймін. Ал ет өнімдерін жемеймін. 10 жылдың жүзі болды. Осыдан бірер күн бұрын маған кәуап әзірлеп қойыпты. Әлгіні көріп, қатты жегім келгені-ай. Үшін­шіден, мен спортпен шұғыл­данғанды жақсы көре­мін. Оның ішінде триатлонды ұна­та­мын. Төр­тіншіден, әрдайым тек жақсы нәрселер туралы ойлауға тыры­самын. Бір сөзбен айтқанда, оптимиспін. – Астанаға келгенде 500-ге тарта көрерменіңізбен кездесіп, оларға қолтаңба берге­ні­ңізді білеміз. Өзіңіздің Қазақ­стан­да танымал екеніңізді білгенде қандай сезімде болдыңыз? – Мені жақсы көреді екен. Тіпті мен ойлағаннан да асып түсті. Өткен жылы Қазақстан Президенті Нұрсұлтан Назар­баев­тың Кореяға жасаған сапа­ры­на орайластырылған қабыл­дау­да болдым. Бұл – актер үшін құрмет. Себебі, актер көпшілік арасында танымал болмаса, оны мұндай қабылдауларға шақыр­май­ды ғой. Сол кезде мен Қазақ­стан жұрты­ның маған деген ықы­ласы жақсы екенін естіп қалған едім. Ал Аста­наға келгенде көрерменнің маған деген ықыласының шына­йы екеніне көзім жетті. Астананың база­ры­на барғанда да осындай ықы­лас­ты байқадым. Мені бірден та­нып, «Жумонг, Жумонг» деп жат­қандары да болды. Менде ба­сын­да базарға бару деген ой болмаған еді. Алайда, базардың жанынан өтіп бара жатып, неше түрлі көз тартар көкөніс пен жеміс-жидектерді көріп, еріксіз аялдадым. Тағы бір айтатыным, менің Кореяда бір досым бар. Қазақ­станнан. Есімі – Әйгерім Айдарова. Ол мені Қазақстан Президентімен кездесу кезінде қазақ тілінде сәлемдесуді үйретті. Сон­дай-ақ, қазақ жеріне бар­ғанда орыс тілінде емес, қазақ тілінде сөйлеуге кеңес берді. Сондықтан, мен қазақ тілін аздап үйреніп жүрмін. – Сіздің зайыбыңыз судья екен. Өнер адамы мен судья қа­лай кездесіп жүр? Отба­сы­ңыз­дың қандай болғанын қалайсыз? – Бізді сіз секілді журналистер таныстырды. Содан кейін екеуміз кездесіп жүрдік. Кейін, бір жарым жылдан кейін үйлен­дік. Әрине, мен балаларымның көп болғанын қалаймын. Бірақ әзірге баламыз жоқ. – Естуімше, сіздің арғы атаңыз генерал болыпты. Мұ­ның сіздің өміріңізге қан­дай да бір әсері болды ма? – Иә, менің атам – Корея тарихындағы белгілі адам. ХХ ғасырдың басындағы тәуелсіздік жолындағы қозғалыстың басын­да тұрған, жапон басқын­шы­ларына қарсы күрескен генерал Ким Чжа Чжиннің шөбересімін. Ол туралы деректі фильмдер тү­сірілген, тарих пәні оқулық­та­рында да ұлы атам туралы мәлі­меттер кездеседі. Ал анам актриса болған. Қазір саясатпен айналысады. Депутат. Ал жалпы алғанда, текті тұлғаның ұрпағы болу, тарихта аты қалған жан­ның шөбересі болу маған үлкен жауапкершілік жүктейді. Әңгімелескен Ләйла ЕДІЛҚЫЗЫ.