Қарттарым аман-сау жүрші!..

«Қариясы бар үй – құты бар үй» екені ақиқат. Абыз ақса­қалы, шежіре кеуде анасы бар шаңыраққа бас сұқсаң ашулы кітап, шашулы қазынаның үсті­нен түскендей боласың. Сондай құт қонған қара шаңырақтың бірі алты ұл, алты қызды өмірге әкеліп, 23 немере, 14 шөберені тәрбиелеп отырған Қасымхан ақсақал мен Күлшәри әженің үлгілі отбасы. Күлшәри әже. Сексеннің сеңгіріне қадам басқан қарт ана ғасырға жуық өмір жолына көз жүгіртіп, қайта оралмас қыз ша­ғын, үлкен өмірдің табалды­ры­ғын жан жары Қасымхан ата­мен қатар аттаған сәтін, ел басына бұлт үйірілген зұлмат соғыс жылдары, одан кейінгі тың игеру, ту­ған жердің то­пырағына тамған әрбір жас, әрбір там­шы терді есіне алғанда иегі дірілдеп, көз­де­­рі­­не жас үйі­ре­ді. Қазақ да­ла­сы алма­ға­йып саясат­тың алаңы бо­лып тұрған сонау 1936 жылы дүниеге келіп, үлкен-кіші үйінде еркін күле алмайтын заманда балалық шағы бастан өтті. 1941-1945 жыл­дар­дағы соғыс кезінде тылда ма­сақ терді, шөп жиып шөмеле үйді. Шүкір, қазекем: «Орнында бар оңалар», деген ғой. Ауыртпа­лықты артқа тастап, ел болып ес жимаққа бет түзеген 1947 жылы тағдыр қосып Мамытқанов Қа­сым­хан екеуі шаңырақ кө­терді. Үйлендік екен, үй болдық екен деп отыратын заман емес, содан бастап зейнет жасына жетіп, қариялыққа аяқ басқанша шаруашылық­тың шашетек жұмысымен бел шешпей еңбектенді. 12 бала­ны өмірге әкеліп, Кеңес Ода­ғы кезінде, 1966 жылы «Ар­дақ­ты ана» атанды. Ұлды ұя­ға, қызды қияға қондырамын деп жүргенде қоғам өзгеріп, еліміз өз алдына тәуелсіз мем­лекет болды. Елбасы Н.Ә. На­зар­баев­тың Жарлығымен қарт ананың омырауына «Алтын алқа» тағыл­ды. Отағасы Қасымхан атамен шаңырақ көтергендеріне 60 жыл толып, немере мен шөберенің ортасында 80 жасын тойлап отырған Күлшәри әже өткенге көңіл жүгіртіп, болашаққа көз тігіп отырған қарт тарих іспетті. Қанат ЕСКЕНДІР, журналист.