Іс-шараға Қорғаныс министрінің орынбасары генерал-майор Талғат Мұхтаров, Әуе қорғанасы күштері бас қолбасшысының тәрбие және идеологиялық жұмыс жөніндегі орынбасары генерал-майор Қайрат Садықов, Құрлық әскерлері бас қолбасшысының тәрбие және идеологиялық жұмыс жөніндегі орынбасары полковник Дулат Адырбеков және Әскери-теңіз күштері бас қолбасшысының тәрбие және идеологиялық жұмыс жөніндегі орынбасары капитан Ермек Байғабылов қатысты.
Дәрістің көрсетілімі интернет арқылы онлайн режімде барлық республикалық мектептерде ұйымдастырылғанын айта кеткен жөн. «Мемлекеттің құрылуы, дамуы және гүлденуі үшін 25 жыл – өте қысқа мерзім. Алайда, Елбасы Нұрсұлтан Әбішұлы Назарбаевтың басшылығымен біз күллі әлемдік қоғамдастыққа еліміз бұрынғы Одақ елдерінің арасында және бүкіл әлемде ең үздік болуға лайық екенін дәлелдедік. Еліміздің 25 жылдық дамуында әскеріміз де өте қарқынды, жоспарлы дамыды және қазіргі таңда жеткілікті жарақталған кәсіби Қарулы Күштеріміз бар», – деп атап өтті Қорғаныс министрінің орынбасары генерал майор Талғат Мұхтаров.
Оның айтуынша, өткізіліп отырған аталған дәріс уақыттың талабына сай өзекті әрі отансүйгіштікке тәрбиелеуде аса маңызға ие. Сондай-ақ, ол 1 мамыр Қазақстан халқы бірлігі күні мерекесінен кейін және 9 мамыр Ұлы Отан соғысындағы Жеңіс күнін дәстүрлі мерекелеу Отан қорғаушылар мен болашақ ұрпақтар үшін қанды майданда жеңіске қол жеткізген аға буын арасындағы рухани байланыс пен сабақтастықтың символы іспеттес екенін де айтып өтті.
Сонымен қатар, генералдар республикалық мектеп оқушыларына Қазақстан армиясының тарихы мен бүгіні және жеткен жетістіктері туралы әңгімелеп берді.
Ал өз кезегінде мектеп оқушылары әскерилерге ойларында жүрген сан түрлі сауалдарын қойып, жан-жақты жауап алды. Қызықты әрі ұмытылмас әсер сыйлаған ерекше дәріс үшін алғыстарын білдірді. Іс-шараның соңында Қарулы Күштердің 25 жылдығына арналған бейнеролик көрсетілді.
Рауан ҚАЙДАР,
«Егемен Қазақстан»